Ads by Google Ads by Google

Fuafua se feiloaiga a le Kovana ma le Fono

Ua talia e le Fono Faitulafono le talosaga a le kovana sili, mo sa latou feiloaiga e talanoaina ai nisi o mataupu o lo o tulai mai ai le le femalamalamaa’i i le va o le Fono ma le malo, atoa ai ma le faailoa atu e le Fono o so latou finagalo i le valaauina o se Fono Faapitoa mulimuli o lenei nofoaiga, e faamae’a ai nisi o mataupu taua e le’i maea ona soalaupule.

O le itula e 8:00 i le taeao nei i le maota fono ua faatulaga e le Fono e feiloai ai ma le afioga Togiola Tulafono.

O le Aso Tofi na te’a nei na tusi atu ai Togiola i le Peresetene o le Senate ma le Fofoga Fetalai o le maota o sui, e talosagaina ai se feiloaiga i le aso ananafi i le Fale Laumei i Utulei.

I le maota o sui, na faailoa ai e Savali Talavou Ale le tasi o le faafitiga o aleaga i afioga i faipule, o le a latou talia le faaoloolomaau a le alii kovana, ae i le Senate, e le gata sa latou talia le talosaga a le kovana, ae ua tuu atu ai ma le fautuaga, e le faataunuuina le feiloaiga i le Fale Laumei e pei ona talosagaina e le kovana, ae o le a faataunuina lava i le maota fono.

Na taua e Togiola i lana tusi e faapea, o lo o taua pea le le faamalieina o le Fono Faitulafono i molimau ma faamatalaga o lo o tuuina atu e Faatonusili o Matagaluega a le malo, i ni isi o mataupu o lo o fia malamalama ai le fono, ma atonu o le faavae lea o le faatuai o ni faaiuga a le fono i nisi o mataupu ua uma ona ia tuuina atu i ai.

“O le mea lea ua a’e ai se manatu, pe le alagatatau ea ae saili atu se avanoa ou te tula’i ai e faamalamalama nisi o ia mataupu o loo lagonaina ai pea le faaletonu o finagalo o le Fono,” o se vaega lea o le tusi a le alii kovana.

Sa ia taua foi e faapea, ua lamalama faaiu le tauaofiaga masani a le fono, ae o lo o tele pea mataupu taua e le o faagaioia i galuega a le fono.  Ua faamoemoe le kovana o lea feiloaiga, o le a mafai ai ona fesili atu le fono ae tali mai o ia ma lana kapeneta.

Sa ia talosagaina foi taitai o le fono mo sa latou fautuaga i le ono valaauina o se fono faapitoa i se taimi o i luma, pe talafeagai foi lea faamoemoe pe a maea le palota ia Novema.

Sa tofu Senatoa ma Faipule ma tusi valaaulia mai le alii kovana aua lenei feiloaiga.