E ui e lei aloaia mataupu ua faaoemoe kovana Togiola Tulafono e tuuina atu mo lana Fono Faapitoa, peitai ua ia taua nisi o mataupu o le a ia tuuina atu i luma o le Fono, lea e aofia ai ma tulafono fou ua maea ona ia tuu atu i le fono ae lei faauluina i luma o maota e lua.

O nisi o pili ua maea ona tuuina atu e le kovana i le fono ae lei faauluina, e aofia ai le tulafono e taoto atu ai le malosi i le Matagaluega o Fefaatauaiga ma Alamanuia mo le lesitalaina o pisinisi fou; tulafono e faamalosia atili ai gaioiga faafoma’i; faapea ai ma le tulafono mo le puipuiga o le gataifale.

O isi mataupu e aofia ai tofiga a le kovana mo komiti o le Falema’i, komiti o Fefaatauaiga, faapea ai ma le peresetene o le Faletupe o Atina’e.

Na teena uma e le Senate tofiga a le kovana mo komiti e tolu e pei ona taua, ae ua finaglao le kovana e toe tuuina atu i luma o le fono ana tofiga nei, faatasi ai ma lana talosaga i le fono ina ia pasia ana tofiga, o lo o manaomia tele le faagaioi o galuega a komiti ma le faletupe i le taimi nei mo le tautuaina o le atunuu.

Saunoa le afioga i le alii Senatoa ia Galea’i Tuufuli e faapea, o le isi komiti e tatau ona vave iloilo e le fono, o le komiti a le falemai lea ua maea konekarate a isi sui e toalua, ma o loo manaomia ni isi e sui tulaga mo le faia o faaiuga a le komiti.

Saunoa Galea’i, a atoa totino o le komiti o le a faa faigofie foi ona faia faaiuga, aemaise lava tulaga i le tautua a le falemai mo le atunuu ma faaiuga i siitaga faapea ai totogi ma tau o vailaau ma fualaau o loo mana’omia.

O le isi komiti o lo o manaomia le faapasiaina, o le komiti o Fefaatauaiga. Na faailoa e Togiola i ave taxi o lo o faasea i le aveese lea e le malo o tint o a latou taavale, e le mafai e sui o le komiti o loo i ai i le taimi nei ona iloilo le talosaga a le aufai taxi, sei vagana ua atoa sui o le komiti e manaomia, peitai e afai e faaauau pea ona teena e le fono sui sa ia tofia mo le komiti, o le umi foi lea e le mafai ai ona gaioi le komiti.

O le aso Gafua o le vaiaso fou lea ua faamoemoe e nofoia ai le fono faapitoa ua valaauina e le alii kovana, peitai e le o manino mai i le taimi nei pe taunuu lea fono pe leai, ona o lea ua pisi faipule mo le palota, aemaise ai o nisi o Senatoa ua faailoa mai le malaga ese atu ma le atunuu.

I le feiloaiga mulimuli a le fono ma le alii kovana ao le’i tapunia le tauaofiaga a le fono i le lua vaiaso talu ai, na talosaga ai Togiola i taitai o le fono ina ia faautagia mataupu o lana fono faapitoa e faapasia, ma ia valaau atu lava na o ia e sau e molimau pe afai e le toe talitonuina e le fono ana faatonusili.