Ua i ai le manatu o le tina o Lemigao Tinae, o lana aoga faitau tusi mulimuli lenei ona malolo litaea loa lea, i le tuanai ai o tausaga e 37 o lana tautua mo le matagaluega o aoga, i le aoga a le Uifaatali Pita Coleman i Pago Pago.

I lana saunoaga sa ia taua ai e faapea, o lana aoga faitau tusi mulimuli lenei mo le tuuaga umi o aoga e aoao ai le gagana Samoa ma le gaga Faaperetania, lea e aofia ai tamaiti aoga e toa 18 mai le vasega 3 ma le 4.

O a’oa’oga sa fa’afeagai ma le tama’ita’i Faia’oga o le Faletusi sa ia a’oa’oina ai le faitau i gagana e lua: Samoa ma le Peretania, Sipela i gagana fo’i na e lua, toe a’oa’o ia toe tusia e i latou se fa’amatalaga e tusa ai o le tala o le tusi sa ia faitauina, fa’atulaga mai pe tali mai i fesili tau vaega eseese o le tusi sa faitauina.

Ua fa’atauva fo’i le fanau uma lea, pe mata e fia ni tusi po’o ni tala sa e faitauina i lenei umi e lima vaiaso sa fa’atautaia ai le a’oa’oga fa’apitoa lenei. Ua fa’ailoa mai e le tina faia’oga faitau, “O le to’atele o fanau sa auai, sa sili ona faigata, ona fa’anofo filemu ma ia lagona le faitauga faitele i totonu o le vasega ina ia mafai ona malamalama lelei, i le gagana peretania lea.” E iloa e le tama’ita’i faia’oga lea fita, ona e le o mafai ona talia e le fanau mai le amataga o le vasega, fesili tau le nofoaga o lo’o fa’ailoa mau na tupu ai lea tala ma tusia aga’i i ai le tala atoa, O le autu fo’i o tala fa’aperetania sa faitauina sa faigata ona malamalama ai le fanau, peita’i, i le taimi ua mae’a uma ai lenei a’oa’oga fa’apitoa, fa’afetai lava, ua to’atele i latou ua mafai ona talia sa’o nei fesili uma.

O le tama’ita’i ua avea le vasega i le tele o ana tusi ua mae’a faitau o le tama’ita’i mai le Level 2 o Salaivai Joe Setefano ma sa auai uma ona matua i lenei fa’amoemoe i le taeao ananafi. O ia lea ua matua maua lava le pine auro o le faitau, numera, ma le malamalama lelei i tala o tusi sa ia faitauina.

I le fa’ai’uga fo’i o lenei polokalama ua fa’atulaga ai meaalofa, fa’atasi ai ma api ma penitala e fa’aagaaga mo i latou i le amataga o a’oga a le fanau e le o toe mamao fo’i. O ato matagofie e saunia ai i latou mo a’oga, ae maise o nai a latou sukalati ma lole e fa’afiafia atili ai i latou e a’o’oga. O nei meaalofa uma e aofia ai ma le latou fa’ailoga, sa saunia lea e le tama’ita’i pule o Coleman Elementary i Pago Pago, Sherry Vasai Ta’ase, fa’atasi ai ma le tina faia’oga i le faletusi Lemigao Tinae, lea ua avea lenei vasega, ma taualuga o lona soifua auauna ai mo le a’oa’oina o le fanau i tomai mo’omia mo le Faletusi.

“O se mitamitaga lava ia te a’u, pe afai ae ou va’aia se tasi o nei fanau sa a’oa’oina, ua suitulaga mai ia te a’u i lenei galuega, afai e le o se alo sa aoaoina i lenei a’oga, ae o se isi lava fo’i a’oga sa tautua ai e aofia ai ma a’oga maualuluga.” O se tala lea a Tinae.

Ua o’o fo’i i le iloa lelei sipela ma le tusitusi, ua fa’ailoa e Tinae, “O le faigata lava lea e tasi ua ou matauina e lo’u tina faia’oga!” O le fa’amalo fo’i a le tama’ita’i pule a’oga Vasai Ta’ase, ona o lea tina matua, ua avea ma fa’ata’ita’iga lelei i olaga o faia’oga talavou, ia tu’u sina taimi e fa’aalu e fesoasoani ai i le fanau o lo’o fia maua le atamai e faitau, numera ma le sipela ae tainane le tusi tala pe toe fa’amatala mai le tala, i au lava upu, na e faitau ai!