I se polokalame fuafua a le Matagaluega o Aoga ua tuuina atu i le afioga i le alii kovana sili ia Lolo Matalasi Moliga, ua ta’ua ai i lea fuafuaga o le a tuu faatasi i se sauniga e tasi faauuga a vaega 12 mo aoga maualuluga a le malo i Tutuila nei, ma ua faamoemoe e faia i le malae o le Veterans Memorial Stadium i Tafuna.

O lea fuafuaga faataoto e pei ona saunoa le Faatonusili o le Matagaluega o Aoga ia Vaitinasa Dr. Salu Hunkin-Finau, e le gata o le a faasaoina ai le taimi ae o se avanoa fo’i lea i le atunuu atoa e o atu faatasi ai i le lagolagoina o le aso faapitoa mo fanau aoga i le atunuu.

Ina ua faatoa tula’i mai Vaitinasa i le tofi faatonusili  i le tausaga na te’a nei, sa ia faia ai fo’i se isi suiga fou i auala e faatino ai faauuga a fanau aoga, ma o se suiga e le i nofo lelei i finagalo o le to’atele o matua, ae sa matua lagolagoina e le Asosi a Matua ma Faiaoga (PTA) a aoga maualuluga i le atunuu.

O le suiga tele sa faia i le tausaga na te’a nei, o le faaitiitia lea o taimi o faauuga a aoga i le na o le 90 minute, e ala i le na o le faalauiloa o i latou ua faauluulu i ai vasega fa’auu, e aunoa ma le toe faia o ni lauga a i latou nei e pei ona masani ai i le tele o tausaga.

O faafitauli na tutupu mai i le auala lea i tausaga ua mavae, o ni isi o taimi e sili atu ai i le to’atasi fanau aoga e faauluulu i ai vasega faauu.

Na taua e Vaitinasa e faapea, o le suiga fou sa faia i le tausaga na tea nei, sa matagofie ma lelei ona o le lagolago malosi atu a puleaoga ma faiaoga, faapea ai matua ma tamaiti aoga.

Ae mo suiga fou mo lenei tausaga na saunoa ai Vaitinasa e faapea, sa la fetufaa’i ma le alii kovana e faatatau i lea tulaga, ina ia faataunuu le faauuga a le aoga maualuga i Manu’a i le aso 9 Iuni, ae tuu faatasi ai faauuga mo aoga maualuluga uma i Tutuila nei i se sauniga e tasi, lea ua fuafua e faia i le aso 11 Iuni i le malae taaalo i Tafuna.

O se tasi o faaopoopoga i le polokalame lea, o le a faia lava sauniga faapitoa a aoga taitasi e tufatufa ai a latou faailoga taualoa, ao lumana’i ai le aso mo le faauuga tuufaatasi.

Saunoa Vaitinasa e faapea, o le fuafuaga e pei ona faataoto, e le gata o le a faasaoina ai le taimi mo taitai o le atunuu ma le atunuu atoa, ae o se avanoa lelei foi lea e mafai ona o atu faatasi ai le atunuu atoa i matua ma fanau aoga, e lagolago le aso faapitoa mo fanau aoga.

O le isi itu lelei mo lenei fuafuaga e pei ona saunoa Vaitinasa, ina ia lava ai le taimi mo le vaiaso atoa e faataunuu ai fuafuaga a aiga ma matua mo fanau faauu e pei o ‘aiga ma fiafiaga.

faaliliu Ausage Fausia