O  Aperila 1, 2013 lea ua faalauiloa e le Faatonusili o le Matagaluega o Fefaatauaiga(DOC), o le a amata aloaia ai suiga fou mo le talosagaina o laisene pisinisi a le atunuu, ma le faamoemoe o le a le toe atoa le masina o faagasolo pepa talosaga mo le laisene.

O lea fuafuaga na faalauiloa e le susuga ia Lafaele Keniseli i le taimi o le fonotaga a le kapeneta i le Aso Faraile na te’a nei, ina ua faatonuina e le alii kovana le DOC e faalauiloa ni isi o a latou suiga ua faamoemoe e faia mo le manuia o le tautua a le malo i le atunuu.

Ua i ai le faamoemoe o le DOC afai ae maea ona faatulaga uma taiala ma aiaiga mo le suiga fou, ona tuuina atu loa lea o le latou ata faataoto i le tamaoaiga o le malo mo le isi lima tausaga i le ofisa e mataituina fuafua mo sa latou faaiuga.

O fuafuaga uma mo le talosagaina o se laisene pisinisi, o le a mafai ona tuu faatasia e le tagata talosaga i totonu o le pepa talosaga ma tuuina atu loa i le ofisa mo le iloiloina.

O le faafitauli o lo o feagai ma le au faipisinisi pe a talosaga se laisene, o le tele o feuiaiga e manaomia ona faia, aemaise ai o le tele o ofisa e tatau ona saini faatoa mafai lea ona talosaga se laisene.

Na taua e Lafaele e faapea, o isi faafitauli e aofia ai le tau savali o le tagata e ave solo lana pepa o lo o fia faatumu i ofisa mo le saini, ae o isi foi taimi e umi lava ona poloka le talosaga i isi ofisa mo le tau faatulagaina o a latou vaega e moomia le faataunuuina ao lei tuuina atu le laisene i le tagata.

“E le o toe savali le tagata e ana le talosaga e tau faasaini mai ni pepa, ae o le a savali le ofisa o le DOC e faatino tulaga uma e pei ona manaomia, ina ia mafai ai ona faataunuu le manulauti a Lolo ma Lemanu e pei oan valoia i le la faamoemoe o le Faamuamua lea o Tagata,” o le saunoaga lea a Lafaele.

O le talosaga a le tagata e le o se tagata nofomau mo se laisene, e manaomia e le tulafono le tatau lea ona iloilo totoa lea talosaga ina ia mautinoa o lo o faamalieina uma vaega o le tulafono mo le faavaeina o se pisinisi.

FAUTUAGA A LE FONO

Ina ua molimau Lafaele i luma o le Fono mo le faamaoniaina o tofiga a le kovana mo ia, o le isi lea mataupu sa tele i ai fesili ma fautuaga a afioga i senatoa ma faipule, o se auala e faa faigofie ai ona faagaioi talosaga mo laisene pisinisi, ona ua maitauina le tele o feuiaiga e manaomia ona faatinoina e tagata ona faatoa maua lea o le laisene pisinisi.

O le isi foi fautuaga sa tuuina atu e faipule i le alii faatonu, o le toe vaavaai i le tulafono o laisene pisinisi, ona ua toatele naua pisinisi mai Asia ua maitauina le i ai i le atunuu, ma o ni isi o nei pisinisi o lo o latou faaaogaina le isi vaega o le tulafono lea e mafai ai e le pisinisi ona sponsor tagata mai fafo, lea ua avea ai nei ma faafitauli numera tasi i le atunuu.

Na faafetaia e le alii kovana ia Lolo Matalasi Moliga le DOC ona o fuafuaga ua faataoto mo le manuia o le atunuu.

Na taua e le alii kovana e faapea, e le mafai ona manuia le malo ma le atunuu pe afai e le galulue faatasi faatonu ma ana tagata faigaluega.