O le taeao nei lea ua fuafua le malo latou te failaina ai moliaga faasaga i le ali’i talavou lea ua tu’uaia i le maliu ai o Lopeti Lihua, i Iliili.

O le ali’i o Arthur ‘Afa’ Blake na pu’e faapagota e leoleo i tafatafa o le nofoaga na tula’i mai ai le faalavelave i Iliili i le Aso Sa na te’a nei, ma ua taofia nei i le falepuipui i Tafuna mo le 48 itula, e faatali ai le failaina e le malo o ona moliaga i le taeao nei.

Na taua e le loia a le malo o lo o taulimaina le mataupu lenei, o Camille Philippe e faapea, ua sauni le malo e molia Blake i le moliaga mamafa o le faaoolima i le tulaga muamua lea e mafai ona faasala ai se tasi i le toese mo le olaga atoa.

Na faatumulia fafo ma totonu o le fale faamasino mo Faamasinoga Faaitumalo i le taeao ananafi i leoleo suesue (CID), mo le puipuia o le saogalemu o Blake ina ua auina atu o ia i luma o le faamasinoga i le taeao ananafi.

E tusa ai ma ni isi o faamatalaga fou sa mafai ona tuuina mai e leoleo e faatatau i lenei mataupu, o Blake sa nofo i le fale o Lihua i le taimi a’o le’i tula’i mai le faalavelave, ae ina ua tula’i mai le faalavelave, na sola ese o ia ma le aiga, peitai o le vave o galuega a leoleo i le sailia o lenei ali’i na mafai ai ona maua o ia.

Na taua e le toalua o Lihua i le Samoa News e faapea, o le a matua misia lona toalua ona o lenei faalavelave faafuase’i ua vave motusia ai la latou mafutaga ma e le’i iloa e lona toalua le taimi na savali atu ai Blake ma le u’amea ma ta ai o ia.

E tula’i mai le faalavelave lenei o lo o nofo vaavaaia Blake i luma o le Faamasinoga Maualuga mo le lima tausaga, ina ua ta’usala o ia i le moliaga o le faaoolima e mafua mai i se faalavelave na tula’i mai i le aso 29 o Tesema, 2010 ina ua alu ma se agaese ma taumafai e osofa’i ai se ali’i ao faia se taaloga volipolo.

I faamaumauga a le faamasinoga na taua ai e faapea, na faateia le au voli ina ua savali atu Blake ma le agaese ma osofa’i ai se ali’i sa i ai i le taaloga volipolo, ae na misi le ta ma le manu’a ai se vaega o le tino o lea ali’i.

Na taumafai Blake e toe faaauau lana osofaiga ae na vave ona laga atu i ai isi o le au voli ma taofia loa lana gaioiga o lo o faia, atoa ai ma le aveese mai o le agaese mai lona lima.

O le tausaga e 2012 na ioe ai Blake i le moliaga o le faaoolima i le tulaga lua, ma faasala ai o ia e le faamasinoga e taofia i le toese mo le 20 masina, o se tasi lea o tuutuuga o lana nofovaavaaia e lima tausaga.

O ni isi o tuutuuga o lana nofovaavaaia e aofia ai le faasa lea ona ia toe soli se tulafono a le malo.

A’o le’i taofia ma molia Blake i le faalavelave lea, o ia lea na manu’a i le faalavelave lea ua faa falepuipui ai le ali’i leoleo o Ray Noa, ina ua faaoolima i ai Noa e ala i lona faaaoga o se fagupia e togi ai lona ulu.