Ua amata galue le Malo o Amerika Samoa mo le faamutaina o lana konakarate ma le kamupani a le Whitehorn Construction, ina ua pasi la aso sa faatulagaina (Aso Faraile ua tuana’i), e le’i toe faaooina atu i le malo sa latou ‘bond’ fou ma ua faamaonia mai lea tulaga e le loia a le kovana, ia Steven Watson.

O le faai’uga o le masina o Me na faailoa mai ai e le malo le pepelo o ‘bond’ sa faaulu e le Whitehorn i le latou tauofoga sa faia mo le faatinoina o le galuega mo le toe faaleleia o le alatele mai i le magatolu i Nu’uuli se’ia o’o atu i le malae vaalele.  Ma i se tusitusiga mai i le kovana sili, le tofa Lolo M. Moliga sa ta’ua ai le sainia pepelo o faamaumauga o le ‘bond certificates’ na faauluina e lea kamupani.

Na mafai ona alia’e lenei mataupu ina ua faafesoota’i mai e se tasi o sui o le kamupani Inisiua a le Chubb Group ia le ofisa lotoifale mo Galuega Lautele faapea le Ofisa a le Loia Sili, ma faailoa i ai, o le kamupani/tagata lea na auala atu ai le ‘bond’ a le Whitehorn (e silia ma le $399,000), e le faigaluega mo le latou ofisa inisiua, e pei ona faalauiloa mai se sui o le malo (e le’i fia lolomia lona suafa) i le Samoa News.

Ma o lea na tu’uina atu ai loa e le malo le tuutuuga i le Whitehorn ina ia uma ifo le 46 aso faigaluega, ua maea ona toe faaulu sa latou ‘bond’, ae peitai, e o’o mai lava i le amataga o lenei vaiaso, e le’i maua lava se ‘bond’ fou mai i le Whitehorn.

Na fa’ailoa mai e Watson i le Samoa News, o lo o faia nei ni a latou feutagaiga ma le ofisa o alatele a le malo feterale ina ia faamaonia lo latou lagolago i le faaiuga a le malo lotoifale ina ia faaleaogaina loa le konakarate me le Whitehorn. 

Sa fa’aalia mai foi e Watson e faapea, ua iai nisi vaega o le galuega ua maea ona faataunuuina ma ua maea foi ona totogia se vaegatupe i lea kamupani.  Ma sa ia ta’ua foi e faapea, a maea ona faamutaina le konakarate, o le a faia loa se feutagaiga i le va o le malo ma Whitehorn i le vaegatupe e tatau ona toe totogi mai e le Whitehorn i le malo, e faapea foi i le malo.  Ma o le a mafai ai loa e le malo ona tu’uina atu lenei galuega i le kamupani na soso’o lana ofo ma le Whitehorn po o le toe faasalalauina o lenei galuega mo ni tauofoga fou.