Ads by Google Ads by Google

Fuafua Komiti LBJ faatula’i Faalapotopotoga Saili tupe

Ua i ai se fuafuaga a le Komiti Faafoe o le falema’i a le LBJ e faatula’i se Faalapotopotoga saili tupe (charitable hospital foundation) mo le falema’i, ina ia fesoasoani i tulaga o tupe maua e faatino ai tautua a le falema’i.

 

O lea mataupu na aofia i le saunoaga a le Taitaifono o le Komiti Faafoe a le LBJ ia Toloitaufa Sandra King Young, ina ua saunoa e faafetaia sui o le Ekalesia Mamona (LDS) lea na malaga mai mo le tauaaoina o sa latou foa’i mo le falema’i, o ni masini ia e saili ai le gasegase o le kanesa o le susu mo tina ma tamaitai o le atunuu.

 

Na taua e Toloitaufa e faapea, na te lagolagoina se tasi o manatu e faapea, o le malosi o soo se atunuu e afua mai i aiga ma le lagolago a ona tagata, ma talu ai o lea tulaga ma le manaoga o lo o feagai ma le falemai, e lagolagoina ai e le komiti faafoe le talosaga mo le faavaeina o se Faalapotopotoga saili tupe e fesoasoani ai mo le falema’i.

 

I se talanoaga ma le Samoa News ananafi, na taua ai e Toloitaufa e faapea, o le fuafuaga e faatula’i se faalapotopotoga saili tupe mo le falemai, o se fuafuaga ua leva na tatau ona fai.

 

“O le toatele o tagata sa talanoa mai i le komiti, sa latou faailoa mai lo latou lagolagoina o lenei faamoemoe, ma ua matou manatu ai, e ui o lo o tulaga faaletonu le tamaoaiga o le atunuu i le taimi nei, ae o se mea e tatau ona fai le saili o tupe mo le falemai, matou te talitonu foi o le tiute lea o tagata uma ia fesoasoani i le falema’i,” o le saunoaga lea a Toloitaufa.

 

Ua i ai le fuafuaga a le komiti e tofia ni isi e galulue i le faalapotopotoga lenei mo le faatinoina o lenei faamoemoe, e le gata e saili tupe i le atunuu ae faapena foi ma tagata o lo o aumau i fafo atu o Amerika Samoa.

 

Na taua e se tamaitai foma’i e lei finagalo e faalauiloa lona suafa e faapea, “O se fuafuaga taua ma talafeagai lea ua saunoa i ai le taitaifono o le komiti, ou te lagona e lagolagoina foi e le pulega a le falema’i.”

 

Ina ua fesiligia pe o se tulaga talafeagai, sa ia taua, “e talafeagai, ma o se fuafuaga e le gata ua leva ona tatau ona faataunuu, ae ua toatele fo’i i latou ua latou fautuaina le pulega a le falemai ina ia vaavaai i ai, ona e mafai ai ona maua alagatupe e fesoasoani atili ai i le auaunaga a le falema’i o lo o tuuina atu mo le atunuu.”

 

O le mataupu i le faatuina lea o se Faalapotopotoga Saili tupe mo le falema’i e fesoaosani ai i le tau sailia o tupe e faatino ai lana tautua, na laga e ni isi o le atunuu i le Fonotaga faalaua’itele lea sa faia a le pulega o le LBJ ma tagata lautele ina ua faalauiloa siitaga o ana pili i le ogatotonu o le tausaga na te’a nei.

 

O le agaga autu na faaalia e ni isi o tootoo na faatasi atu i lea fonotaga, afai e faatula’i e le falemai se faalapotopotoga saili tupe e pei o le faalapotopotoga o lo o taua o le ‘Women Hospital Auxiliary - WHA’, o le a mafai ona maua ai e le falema’i le isi faamama avega mo lana tautua i le atunuu.

 

E pei ona silafia, o le vaega a le WHA ua silia ma le 30 tausaga talu ona faavae ma tautua i le falema’i i Fagaalu, ma ua atulasi foi fesoasoani ma foa’i ua maea ona latou tuuina atu mo le falemai, e fesoasoani ai i le tele o manaoga

 

Saunoa le afioga i le alii faipule ia Faimealelei Anthony Allen, o ia foi lea o le sui taitai komiti o le komiti a le Soifua Maloloina i le maota o sui e faapea, o le faavaeina o lenei faamoemoe, o le a fesoasoani malosi ai i le falema’i i le itu tau tupe.