Fuafua Komiti Fu’a e valaaulia le ausiva ma le fautasi mai Samoa

E ui e le i faamautuina mai le polokalame a le Komiti o le Fu’a mo lenei tausaga, peita’i na taua e le afioga i le Alo o Salamasina ia Satele Galu Satele i le taeao ananafi i le Samoa News, o lo o i ai le fuafuaga e i ai valaaulia mai Samoa mo le fu’a o lenei tausaga.

 

“...o lo o i ai le fuafuaga e i ai nai valaaulia mai Samoa mo le fu’a o lenei o lenei tausaga, aemaise lava i tulaga o pese ma siva faaleaganuu, atoa ai ma fautasi, ae o ia fuafuaga uma e le i faamautuina i le taimi nei,” o le saunoaga lea a Satele i se faatalatalanoaga ma le Samoa News i luga o le telefoni.

 

Ae na taua e se molimau faatuatuaina i le Samoa News, e lua valaaulia ua fuafua le komiti e tuuina atu mo le malo o Samoa, o ia valaaulia e aofia ai le ausiva faaleaganu’u e tasi atoa ai ma le fautasi, ma o le filifiliina o le ausiva ma le fautasi e malaga mai i le valaaulia a le malo o Amerika Samoa, o le a taoto atu pea i le faaiuga a le afioga i le alii Palemia o Samoa, susuga Tuilaepa Sa’ilele Malielegaoi.

 

Na taua fo’i e le molimau e faapea, e tolu ausiva faaleaganuu o le a faafiafia i le aso o le fu’a o lenei tausaga, ma o ia ausiva faaleaganuu e aofia ai le tasi mai Samoa, tasi mai Tutuila nei, lea ua filifilia i ai le afioga o Pago Pago, ma le isi siva mai le kamupani a le StartKist Samoa.

 

O le taeao ananafi na fono ai le afioaga o Pago Pago i lalo o le taitaiga a le afioga i le Maoputasi ia Mauga Tasi Asuega, mo le talanoaina o le tulaga e faatatau i le latou valaaulia mo le fu’a i le pese ma le siva faaleaganu’u.

 

I le fonotaga a le alii kovana ma lana kapeneta i le vaiaso na te’a nei, na faalauiloa ai e le tofa Lolo Matalasi Moliga e faapea, o le isi fonotaga a le kapeneta o lo o sosoo nei, o le a faalauiloa ai e le Ofisa o Mataupu Tau Samoa la latou polokalame mo le sisigafu’a o lenei tausaga, i lalo o le taitaiga a le afioga Satele, o le Failautusi o le Ofisa o Mataupu Tau Samoa.

 

Ina ua faalauiloa e Lolo ma lana faigamalo polokalame o le fu’a o le tausaga na te’a nei, sa faaalia ai le leai o ni valaaulia mai Samoa ona o tulaga faaletonu sa i ai le tamaoaiga o le atunuu, ma le faanaunauga, talosia ia o o mai i lenei tausaga ua tulaga lelei le tamaoaiga o le atunuu, ina ia mafai ai ona aumai ni valaaulia mai Samoa.

 

O le vaiaso nei lea ua faamoemoe e fono ai le komiti o le tapenaga o le fu’a mo le faamautuina o le latou polokalame, ao le i tuuina atu i luma o le kapeneta a le alii kovana.

Comment Here