O se fonotaga a Obama ma le sui o le Malo Saina lea o le a malaga ane i Amerika, le ali’i Sui Peresetene Xi Jinping, sa mua’i malaga mai fo’i lea sui i le tausaga e 1985 ma talia e Iowa, o se fonotaga fa’a-manamea, ae iloga mai e le o ni mataupu faigofie o le a talanoaina ai.

O le aso o le fonotaga o le aso fa’apitoa mo “Manamea” Fepuari 14, 2012, ma e faia lava i le falepa’epa’e lea fonotaga.

Aisea ua malaga mai ai lea sui taua o le Malo o Saina? Ioe ua i ai fe’ese’esea’iga o Saina ma Amerika ua tula’i mai i le taimi nei, i le tele o nisi o mataupu tau i meatau fa’aniukilia, meatau fa’atau atu i atunu’u o lo’o tutupu ai fevaevaea’iga ma vevesi i le taimi nei, ae maise fo’i o nisi o mataupu e aofia ai ma le suau’u fa’atau ma lona tau ua si’itia pea i le alolagi atoa.

O lo ua i ai fo’i le fa’asalalauga mai ta’ita’i o Saina, ina ia utagia e Amerika, ia le oso atu fua i totonu o Malo Tau Asia ma le Pasefika.

O le ali’i sui Peresetene o lo’o malaga mai nei o Saina, Xi, ua fa’ailoa mai, o lo’o soloa’i atu lea sui e avea ma Peresetene o le Malo o Saina, ma o lona naunauta’iga o i ai, atonu e aoga lona o’o mai ma fono fo’i ma le fa’aao o le Malo o Amerika, ma ia ave’esea ai nisi mea fa’anenefu i le va o malo e lua.

O lo ua i ai fo’i le fa’amoemoe e faia fo’i se la’ua fonotaga ma le afioga le Sui Peresetene Joe Biden, ma na toe asia ai Kalefonia ma Iowa lea sa mua’i malaga mai i ai o ia i le tausaga e 1985.

Na talimalo fo’i le susuga le sui Peresetene o Saina Mr. Xi i le malaga atu a le ali’i sui peresetene o le Malo Amerika, Joe Biden ia Aukuso 2011, lea fo’i sa mafua ona fa’atula’ia lea malaga ina ia mafai ona maua’a ni feso’ota’iga lelei ma le Malo o Saina, ae ua molimau mai le Ofisa Autu i Uosigitone, e latou te le’i iloa lava lea malaga ma lona taua na afua mai ai, aua ua tele lava ina fa’afeto’aia mai e Saina le Malo o Amerika i le tele o mea fa’avaomalo o tutupu nei ma mana’omia ai feutaga’iga a ta’ita’i i le va o malo tetele.

O Xi e na’o le 58 tausaga o lona soifua, ma e tauau e avea o ia ma Peresetene o le faigamalo fa’akomenisi a Saina pe a litaea le ali’i o Mr Hu, lea e ta’ita’ia nei lea malo tele. Ua le o toe tula’i mai le va fealoa’i o Saina ma Amerika i se tulaga faigofie, ma e tauau lava e ono tupu se mea pe afai o le a fa’aauau ai pea ona sofa’i mai e Saina manatu fa’aalia o le Malo Amerika i nisi o mataupu le saogalemu o le lalolagi atoa, fa’aleleia o le tautuaga o le lalolagi e ala i le suau’u ma oloa tau suau’u, ma le tulaga o le tausiga o le saogalemu ma to’afilemu o le lalolagi.

O le Failautusi o le Tupe a le Malo o Amerikia, Timothy Geithner na malaga fo’i i Saina i le amataga o le masina nei, ma ia taumafai ai mo ni ala e feso’ota’i ai ma Saina i tulaga o le suau’u a Iran, peita’i, ua fa’ailoa mai le tali a Saina ia Amerika, “Aua le fes’ota’ia fua le suau’u a Saina mai Iran ma le malosi’aga fa’aniukilia  lea e fete’ena’i ai Iran ma Amerika.”

Ua fa’apea lava fo’i ona fa’aalia mai le tulaga le fiafia o Saina e aofia fua Amerika i mataupu fa’avaomalo a le Asia Pacific, ma ua latou fa’ailoa fo’i lo latou le fiafia i le fa’atauga a Amerika o a latou meatau i le malo o Taiwan.

Na fa’ailoa mai e le Emepasa o Amerika i Saina, Mr. Gary Locke i sana talanoaga mai luga o le televise, “O le ali’i sui peresetene o Mr. Xi o se tasi e lelei tele ona manatu fa’aalia e tusa ai o le va o Saina ma Amerika. Ua mae’a faia muamua e ia nisi feso’ota’iga ma le setete o Iowa i le tausaga 1985 ma e tele na’ua lona sao i tulaga tau fa’ato’aga sa fa’atautaia i Amerika ae sa fesoasoani mai i ai Saina. O se tasi e fetala’i lana tofa saili ae le o ma iloa e Amerika lea sui.” Ua ia fa’aalia, e fiafia tele le ali’i o Mr. Xi i lea itu o Amerika ma le tvasega o ta’ita’i o ia setete.

saunia: Leua Aiono Frost