Ads by Google Ads by Google

Fonotaga Mafutaga Tina EFKAS

O le aso Gafua na amata ai sauniga fa’apitoa e tatala aloa’ia ai le Fonotaga a le Mafutaga a Tina o le Ekalesia Fa’apotopotoga Kerisiano i Amerika Samoa, lea e masi’i mai ai Ekalesia mai Amerika i Matu ma Amerika Saute, Hawaii i Sisifo ma Hawaii i Sasa’e, Niu Sila ma Ausetalia ae maise fo’i o le tatou lotoifale nei i ona Matagaluega i Sasa’e, Sisifo, le Fagaloa ma le Tutotonu ae maise le Manu’atele.

Na va’aia le pa’e loaloa o le Mafutaga i lana toniga fa’atulaga mo le ulua’i sauniga lotu lea, ua pei ua o’o i le lagi i le laugatasia o le mafutaga a tina i pulou papa’e lalelei, o toniga papa’e atoa ma e ui la ina fa’asa, ae ua le tineia ma le agaga fia papa’e loaloa, ua fa’afetauia i ai ma tautaliga ma taulima ae maise o asoa.

E ui ina sa fa’asa lea tulaga, ae o le manatu o nai isi tina sa latou “go the extra mile” ua fa’ailoa mai, “O aga o le fiafia ma le Olioli, ua to’ai taunu’u mai i lenei tausaga o le mafutaga, ae o lo’o maualuga le masina i le soifua maua o ta’ita’i ma faletua o toea’i’ina se’ia pa’ia mai le amataga o le latou fonotaga.”

Ina ua amatalia, sa tofia nisi o tina e ta’ita’i, o le tulaga fo’i o le Failautusi sa tula’i ai le faletua o Mine Pase, ua le nofoia, ona tula’i lea o le faletua Si’aitolo Poufa mai Atu’u, na te faia tiute fa’afailautusi mo le Mafutaga, e tatalia ai le amatalia o le fonotaga, ma sailia aloa’ia ai se tasi e tula’i mai na te tau’avea lea tofiga mo le isi lua tausaga.

Sa mataituina le tolaulauina o suafa uma lava o sui totino o le Mafutaga ua fa’ia mai le fuifui a’o i ai le mafutaga i le savaliga o le lua tausaga ua tuana’i.

E fa lelei lauga na tima’ia le mafutaga mo le nofo sauni ai i le fonotaga i lenei tausaga, atoa ai ma le fa’ala’ei’au atu i tina uma, “Ia tutumau i le Olioli ma Galulue, ia le solomuli i le galuega, ae ia galulue ma le fa’atuatua i lou fa’amoemoe e te maua le ola e fa’avavau.”

E sili le to’a 100 i latou na lisia suafa mai Matagaluega uma lava o le Ekalesia Fa’apotopotoga Kerisiano i Amerika Samoa ua maliliu i lenei lua tausaga ua tuana’i e o’o mai i le amataga o lenei fonotaga 2012.

O le amataga o mataupu e talanoaina o le fonotaga, ina ua mae’a fonotaga laiti e vaega ta’itasi mai le amataga o le vaiaso, na fa’atoa atoa lupe i le fuifui mo le fonotaga i le aso Tofi ma le Aso Faraile lea na ta’ita’ia e Hawaii le fonotaga, i se latou “Fa’amalositino uiga ese le aoga mo tina uma!”

Peita’i, o se tasi o mataupu sa iloga ona tau fete’ena’i ai taofi, ina ua tula’i le Faletua o le Ti’akono Toea’ina Tofiga Tufele ma fa’aulu se mataupu ina ia faimeaalofa atu i le mafutaga i le tina sa tula’i mai mo le tele o tausaga e avea ma Failautusi - Mine Pase.

O le meaalofa sa fa’aulu mai e $50,000. peita’i, e to’atele na’ua i latou sa latou le manana’o ai, ae na pasia mulimuli ane ai, e faimeaalofa le mafutaga i lo latou sui totino lea i le na’o le $5,000.

O tulaga tau suiga i tofiga o lo’o tutula’i mo le Laulau, ua mae’a ona faia fo’i le palota ma ua tula’i mai ai le laulautofi fou mo le isi lua tausaga o lumana’i:

Taitaifono o Luisa Young mai le Matagaluega a Kalefonia i Saute. O le ua tofia e avea ma Teutupe o Fiasili Puni Haleck; O le Sui Ta’ita’ifono ua tula’i mai ai le faletua o le Faife’au Toea’ina o Vailala Vaitautolu mai Vaitogi, ae o le Failautusi o lenei lua tausaga ua tofia ai le Faletua o Meafou Fa’avae Fa’ata’ita’i.