Ua masani le atunu’u i le fa’afofoga lea i folasaga malie a ta’ita’i o le atunu’u e tusa ai o galuega fa’atino ma aiaiga fo’i e ao ina uia! E tusa po’o le a se tele o se galuega ua mae’a ona fa’atuina, ma ua iloga mai i le atunu’u ua avea ma tila fo’i o tomai ua mae’a autasia i ai, ae fa’amalie lava lafoga a tama o le atunu’u ma avea ai o se mea mama le tautua tele ua mae’a ma ua au.

“Ua matou o ese mai le EOB leaga ua tutulu tele, ma ua ‘ati uma e isumu uaea o matou masini komipiuta!” O le tutulu o le fale o le tatou malo o lo’o le iloa, ae ua aliali fo’i, ma ua avea fo’i ma ni ala e tu’ufesili ai mafaufau o tagata, ae po’o fea o i ai i latou e ao ina va’aia toto’a lea fo’i aseta a le malo?

Tali loa le ta’ita’i o le Malo, “Po’o le a lava lo outou fia o ese mai le fale o le Malo, e le sainia lava e le Kovana la outou fa’atagaga e o ai e lisi i se isi mea, e fa’apena lava ona le mafai ona tula’i ese. Ua mae’a fa’aleleia le taualuga o le fale ma ua punitia fo’i na tutulu, o isumu latou, e i ai lava isumu i Amerika Samoa, ma e ‘aina lava e i latou uaea o isumu o komipiuta, o le afuaga lena e fa’aigoa ai o isumu!”

Fa’atonu o galuega, “Fai a Oe, ua e iloa e sili atu le tomai o tama na e tusia ata o fale tetele na!”

O le mau talitonuina o le atamai o le isi, o se mea lelei, peita’i, e le o solituina tulafono tau fausaga o fale tetele, o lo’o ua mautalitonuina le tomai o i latou o inisinia fa’apitoa mo fale tetele mai Niu Sila a le Kamupani Faufale ua mae’a fa’akonekarate mo le fa’atinoina o lea maota.

Matagofie le galulue fa’atasi, ma ua mautinoa, ua mae’a fa’amalie tulafono uma o galuega fa’atautaia i le atunu’u.

O se mea moni e fa’afetai fo’i i le mataala o le afioga le Kovana Sili, aua ua ia fa’ailoa mai, “Ana ou le taofia le fa’ao’o atu o le $1.5miliona o se sao o Amerika Samoa mo le SPIN e ala i le fonotaga na afua ai lenei fale, ua iloga mai ua maumau, aua o le SPIN ua le o toe i ai, ua soloia e malo uma o le pasefika sa avea na totino. Peita’i, o se mea na mafua mai ai mo i tatou, lea ua tutula’i, ma ua tino mai, ua lelei na’ua.”

Ia ‘aua la le manatu i tatou, o fa’atamala o tatou ta’ita’i na tofia mo e lima ta’ita’ia le tatou faigamalo, fa’afetai o musuia e le Agaga o le Atua i latou i taimi e ao ina fa’asaoina mai ai fo’i si o tatou va’a mai ni fa’aletonu i le ala, ae afai fo’i e sasi i latou, e tofusia i tatou ma sasi i lenei olaga, atonu e laiti o latou sasi ia i tatou lea e matua tele le faitio.

Tapena se ta’ita’i fou, ia fai fo’i ma le tonu ou faiva i lou taimi e avea ai ma foemua o le tatou malo, ia sao uma i tatou i le folauga sousou aua a malu le tai, e leai lava se fa’aletonu e popole ai. Ae o tai sousou e iloga ai tautai o le vasa!

E moni ai Paulo, “va’ai se mea o le va’a e mau ai, aua o le sousou lenei, e te motu ese atu loa mai le va’a, ua e le i ai, ae a maua mai lava oe i totonu o le va’a, e sao lava e o’o i le taunu’uga o le tatou malaga!”