Na mua’i tutula’i le Pulesili o le ASPA, le afioga i le matua ia Utu Abe Malae,  ma ia fa’alauiloa le tulaga mo’omia o i ai i le tautua a le Puleaga o le Eletise ma le Suavai Taumafa e ao ina fa’atino mo le suavai taumafa, suavai fafoa’i ma le aoina o le lapisi i le atunu’u.

O nei auaunaga uma e ese mai fo’i i le eletise ua tatau ona va’ai toto’a i ai i latou ma fa’atino loa i le taimi nei, aua ua autausaga paipa vai e le’i toe suia, fa’apea fo’i ma paipa o le suavai lafoa’i latou. O so’oga o paipa ua afua ai ona pa pa, ua loa tausaga e le’i toe siakia ma faia ni suiga i nei mea uma, ae o le soifua maloloina o tagata lautele e ao ina va’ai toto’a i ai le ASPA.

Sa ia fa’ailoa mai, “O a lava o outou manatu fa’aalia, pe o se fesoaosoani mai foi i ni fautuaga mo i matou, e matou te fa’aaogaina, aua e le’i fa’amautuina le si’itaga lea ua manatu le ASPA e fa’ae’e i le tausaga fou i le suavai ma le suavai lafoa’i fa’apea le aoina o le lapisi, ae leai se si’itaga o le tau o le eletise mo le tausaga nei ma le 2016.”

Sa fa’ailoa e Utu e faapea, “O le si’itaga lea sa tau fa’ae’e i le tausaga nei ia Oketopa, ua toe soloia, e leai se si’itaga lena.”

Peita’i e fesiligia pea e tagata pe aisea e faia ai le si’itaga lea? Talu mai le ASPA, e ao ina  fa’ae’e se si’itaga ina ia gafatia e le ASPA ona fa’ataututu i mea nei:

• Tau o mea e fa’agaoioia ai le tautua ua si’itia fo’i mai fafo e le mafai ona fa’aauau le auaunaga pe afai e le si’itia le tau o le auaunaga ta’itasi mo le lautele pe afai e le fa’ae’e se si’itaga.

• E ao ina toe fa’aleleia mea uma e fa’atino ai le auaunaga ua au tausaga e le’i toe va’aia lelei ma faia lipea aua o lo’o tele le maumau i nisi o tautua ae maise ai le suavai mama, ona o paipa ma so’oga o paipa ua pa pa i lalo o le palapala.

• E tatau ona toe faalautele atili le tautua lea, ona o tulaga o lo’o mo’omia o i ai, aua ua tupu pea le atunu’u, ma e le o toe lavatia e le tinoitupe toina mai fafo e fa’aauau ai le lelei pea o le auaunaga pe a leai se si’itaga e fesoasoani atili e una’ia nei mea uma.

O le tele o nei galuega lipea, e pei ona faailoa e le ASPA,  e ao ina fa’aleleia ma toe suia ituaiga paipa e fa’aaogaina mai le u’amea i le ituaiga paipa fou lea ua iloga mai e saogalemu ai le fa’ao’o atu o le suavai mama i le mamalu lautele.

Ua tele fo’i paipa ua pa p a i lalo o le eleele, ae ua le mafai ona toe fa’aleleia ona ua fa’agaoioia fo’i isi poloketi e le ASPA, o ia poloketi o lo’o matele ina fa’atupe mai e le USEPA ina ia mautinoa le soifua laulelei o le atunu’u atoa.

Ua le manatu le ASPA ina ia si’itia fa’atasi uma auaunaga o lo’o latou fa’atautaia mo le atunu’u atoa. Ua eseese taimi e fa’ae’e ai si’itaga, ona o le manatu i le mamalu o le atunu’u ma le oia o i ai i tau o le soifuaga o i ai.

Na fa’akonekarate mai e le ASPA se kamupani mai fafo e i ai sui agava’a i ituaiga o tautua fa’apea ina ia latou fa’atautaia le sailiga o le auaunaga ma ituaiga si’itaga e fa’ae’e i tautua. Sa saunoa fa’apitoa fo’i le sui o lea kamupani o Dan Jackson i lea fonotaga fa’alaua’itele.

“E ese mai le matou galuega lenei nai lo isi galuega sa matou fa’atautaia i isi setete uma, aua o lenei galuega, sa tu’uina mai le galuega e fa’atautaia, ma ia sailia se si’itaga e fa’ae’e e talafeagai ma le mana’omia o i ai i le tautua ia fa’aleleia atili ma ia fa’alautele toe si’itia le la’asaga e talafeagai fo’i ma le mana’omia,” o le saunoaga lea a Jackson.

“Peita’i, sa i ai ma le mana’oga fa’apitoa, ia faia le si’itaga ia talafeagai ma le aiga lima vaivai, po’o le tau o le auaunaga, ia tu’uina i le tau sili ona maulalo e gafatia ai nei mea uma, ona o le manatu i aiga ta’itasi ma lo latou tamaoaiga maua,” o a Jackson lea.

O le isi lea ala ua fetu’una’i ai le si’itaga, ua le tasi’i fa’atasi uma, ae ua si’i auaua’i le suavai mama i le isi tausaga, le suavai lafoa’i ma le aoina o le otaota i isi tausaga.

Ua toe fa’amanatu mai lava e Utu e faapea, “Manatua, e matua ogaoga fa’ama’i ma ituaiga o gasegase e ono maua ai le atunu’u, pe afai o le a le feso’ota’i le tautua lautele lenei o le suavai, ma ona la’asaga mama e o ina i ai, ma toe fa’aleleia nei mea uma ua leva ona tatau ona fa’aleleia e mautinoa ai lona tulaga mama o le suavai taumafa.”