O le ali’i lea na ia folafola lona fasiotia o lana uo teine atoa ai ma leoleo ina ua vili e lana uo teine leoleo mo se fesoasoani, ua taofia nei i le toese i Tafuna, se’i vagana ua totogi le $50,000 ona faatoa mafai lea ona tatala o ia i tua e faatali ai taualumaga o lana faamasinoga lea na amata mai i le vaiaso na te’a nei.

O le a le mafai ona faalauiloa le igoa o le ua molia ona o le puipuiga i le ono faa faigofie ai ona iloa le tamaita’i o lo o aafia ma lana tama.

O moliaga e 9 ua tuuaia ai le ua molia, e aofia ai moliaga mamafa e lua o le talepe fale i le tulaga muamua ma le tete’e atu i leoleo a’o taumafai e pu’e fa’apagota o ia, ma moliaga mama e 7 e aofia ai solitulafono e 4 o le faaoolima i le tulaga tolu, 2 moliaga o le faatupu vevesi, ma le moliaga e tasi o lona taofia faapagota o se tagata.

O le mataupu lenei na tofu atu i le Ofisa o Leoleo i Tafuna, ina ua logo e le tinå talavou na a’afia le ofisa o leoleo mo se fesoasoani i le aso Lua na te’a nei, 9 Iulai 2013, i le maea ai lea ona fasi e le ua molia o ia, ma tofia ai loa le ali’i leoleo ia Iapani Tiumalu e gafa ma le suesueina o lenei mataupu.

Na taua e le tinå talavou na aafia i leoleo e faapea, ua silia ma le 3 tausaga le umi o le la mafutaga ma le ua molia, o ia fo’i o le tama o lana tama o lo o i ai atoa ai ma lona ma’itaga ua 4 masina le umi.

E tusa ai ma faamaumauga a le faamasinoga, o le vevesi na tulai mai ina ua fesili le na aafia i le ua molia pe faafefea ona alu i le fale, ma avea lea ma itu na ita ai le ua molia ma togiina ai lana uo teine i le fagu ‘conditioner’ sa taatia i luga o le laulau i le mae’a ai lea o se la taugaupu, o lea na tu ai loa i luga le na aafia ma alu i le fale o se tasi o ana uo e sosoo lava ma le fale o lo o nofo ai, ae na mulimuli atu ai foi le ua molia ma ia tu’itu’i i le faitoto’a o le fale lea ma tauanau le tama’ita’i e ana le fale ina ia tatala atu le faitoto’a.

Ina ua musu le tamaitai e ana le fale e tatala le faitotoa i le alii ua molia, na faaaoga ai loa e le ua molia se naifi e vane ai le faitoto’a pito i tua ina ia mafai ai ona alu i totonu, ae na avea lea ma itu na tatala ai loa e le tama’ita’i e ana le fale le faitoto’a ae alu atu e saili mai lona to’alua mo se fesoasoani, ma maua ai loa le avanoa a le ua molia e ulufale ai i totonu ma alu atu ai loa ua fasi le na aafia e ala i lona futi o lona ulu ma amata ona fasi o ia, ae faafuase’i loa ona taunuu le tamaloa e ana le fale ma ia taofi gaioiga a le ua molia ae una’i o ia i fafo ma le fale. O le taimi fo’i lea na vili ai loa e le tinå na aafia leoleo mo se fesoasoani.

Na tagi ma loimata le tinå na aafia ma fai i lana uo ma lona toalua e aua ne’i toe tatalaina le faitoto’a o le fale, ina ne’i alu atu le ua molia ma fasioti o ia.

Na taua e ni molimau se to’alua i leoleo e faapea, ina ua aveese mai le ua molia mai totonu o le fale ae ta’ita’i atu i fafo, sa ia vaaia ai lana uo teine o lo o ia viliina leoleo, ma o iina na faia ai loa lana folafolaga i lona fasiotia lea o lana uo teine i le naifi, atoa ai ma lona fasiotia o leoleo e oo atu e loka o ia, e le kea fo’i o ia i ni leoleo.

E le’i umi se taimi ae taunuu loa leoleo ma latou vaaia ai le tumutumu o tagata o le nofoaga na tula’i mai ai le faalavelave, sa latou vaaia fo’i le ua molia o lo o tu mai i le isi itu o le malae ma ona lima o lo o tu’u i totonu o le taga o lona ofu o lo o fai e foliga mai o lo o taumafai e nana se mea.

Na fesili leoleo i le ua molia po o ia te ia se naifi na tali le ua molia ioe, o lea na faatonu ai loa e leoleo o ia ina ia aveese le naifi, peitai sa musu o ia e aveese le naifi ae na ia faalala le naifi i leoleo, ma e faatele ona fai leoleo i le ua molia e aveese le naifi, lea na i’u ai loa i lona tuu ese o le naifi mai lona lima ma agai atu ai loa leoleo ma taumafai e loka ona lima, peitai sa tete’e ma tafiti solo le ua molia seia oo lava i lona toe taumafai e aapa i le naifi, ae na vave gaioiga a leoleo ma mafai ai loa ona loka ona lima ma taofia loa o ia i totonu o le taavale a leoleo.

Na faamatala e le tinå na aafia i leoleo e faapea, e le o se taimi muamua lea ua fasi ma faapologa ai o ia e le ua molia. Sa ia taua e faapea, o ni isi o taimi e manao ai le ua molia la te momoe peita’i sa fai i ai e leai leaga o lo o ma’itaga o ia ma e aafia ai lana pepe, ae o isi taimi e faamalosi ai lava e le ua molia ona fai gaioiga e faamalie ai ona lagona, o isi foi taimi na te sasae ai ona lavalava ae faamalosi ona la faiaiga.

O le isi faalavelave na tulai mai i le aso 28 Iuni 2013, lea na ita ai le ua molia ina ua masalosalo lona loto sa vili lana uo teine i le Social Service e o atu e ave o ia ma lana tama i le shelter latou te nonofo ai, ma mafua ai loa ona fasi e le ua molia lana uo teine e ala i le futi o lona lauulu ma tu’i lona ulu, toe toso o ia i totonu o le fale taele ma loka ai ona ua leo tele lana tagi.

I le aso 5 Iulai 2013 e pei ona taua e le tina na aafia i leoleo, na viliina ai le Ofisa o le Social Service ma talosaga i ai o atu e ave i laua ma lana tama i le shelter, ae na avea ma itu na ita ai le ua molia ma tago ai i le naifi ma folafola lona fasiotia o ia, o le aso fo’i lea na fasi ai o ia e le ua molia.

I le aso 8 Iulai, na toe fasi ai fo’i e le ua molia lana uo teine e ala i lona ta tu’i o ona foliga ma toso lona ulu, ma sa molimauina e leoleo unaoa ma maosia i foliga ma le tino o le na aafia. O le masina o Ianuari 2013 na ta’usala ai le ua molia i le solitulafono o le faia lea o sauaga faasaga i lona aiga, e pei ona taua i faamaumauga a le faamasinoga.

O le vaiaso nei lea ua faatulaga e toe fofogaina ai le mataupu a le ua molia i luma o le fa’amasinoga faaitumalo, ae afai e mafai ona tatala o ia i tua mai le toese, ua poloaina o ia ina ia e saili se isi nofoaga e nofo ai ma aua ne’i ona toe taumafai e faafesootai le na aafia i soo se auala, tausi ma le filemu ma aua ne’i ona toe soliina se isi tulafono a le malo.