Ads by Google Ads by Google

Folafola e au ta’aalo le fo’i mai ma pine auro mai Papua

Ua folafola e ni isi o au ta’aalo a Amerika Samoa mo Ta’aloga a le Pasefika i Papua Niu Kini i le masina fou, lo latou fo’i mai i le atunu’u ma pine auro o le manumalo.

 

Na taua e le Failautusi Aoao o le Komiti Faafoe o Taaloga a le Olimipeka i Amerika Samoa (ASNOC) ia Bill Young e fa’apea, e maualuga lona talitonuga e tele le avanoa e manumalo ai Amerika Samoa i pine auro mai ta’aloga eseese o le a tausinio, fa’avae lea i luga o faaiuga ma le maualuga o le tomai ua mafai ona ausia e ni isi o au ta’aalo.

 

“O le tulaga lea ua i ai tapenaga a le tatou au si’isi’i e le fesiligia lena tulaga, o lea sa maua mai le tatou pine auro mai ta’aloga siisii a le Pasefika i le tausaga na te’a nei, o lea foi e koleni a tatou sui e to’alua i avanoa sikolasipi i Niu Kaletonia, e i ai la le manatu maualuga e tele le avanoa e mafai ai ona manumalo ni isi o le tatou au siisii i pine eseese e aofia ai ma ni pine auro,” o le saunoaga lea a Young i le Samoa News.

 

Mo le au Tenisi, lea fo’i o loo avea ai Young ma Peresetene o lea Asosi o Taaloga i le atunu’u, sa ia taua ai fo’i le tulaga lava lea e tasi. Na taua ai e Young le maualuga o le avanoa e mafai ai ona fo’i mai ni isi o le au ta’aalo ma pine auro i Papua Niu Kini, fuafua lava i le maualuga lea ua oo i ai tapenaga a le au i le taimi nei.

 

Na taua e Young i le Samoa News e fa’apea, o sui e to’atolu o le au Tenisi lea fa’atoa taliu mai i le atunu’u i le vaiaso nei, sa auai i latou i ni ta’amilosaga eseese se tolu sa faia i Kalefonia ma Hawaii i le tolu vaiaso talu ai, ma sa tulaga ese ma mataina le latou taumafaiga sa oo i ai.

 

“O le isi to’alua o i latou nei sa taunuu lava i le sailiga siamupini ma faiaina uma mai ai, ae o le isi to’atasi sa au lana taumafaiga i le sailiina o le tulaga tolu ma le fa, ma manumalo ai i le tulaga tolu, pe a fuafua atu la i le maualuga lea sa oo i ai taumafaiga a i latou nei, fa’atasi ai ma isi sui lelei o le ‘au o loo koleni atu i le atunu’u, e i ai le talitonuga e ono manumalo fo’i la tatou au Tenisi i ni pine auro mo le atunu’u, atoa ai ma ni pine siliva poo le apamemea fo’i,” o le saunoaga lea a Young.

 

Na taua e le tama’ita’i sinia o le au Tenisi a le atunu’u ia Florence Wasko lona talitonu atoatoa i le latou au lea ua filifilia mo taaloga i Papua, aemaise ai le tulaga maoa’e sa oo i ai taumafaiga a i laua e to’alua sa malaga i le ta’amilosaga lea sa faia i Fiti i le amataga o le masina nei.

 

Mo le au Basketball a le vaega o ali’i ma tama’ita’i, o le isi lea ‘au na taua e Young e tele lona talitonuga e ausia e le au a Amerika Samoa se tulaga maualuga i taaloga i Papua, pe a fuafua i le tulaga maoa’e o loo i ai ta’amilosaga sa tausinio ai ni isi o alo o le atunu’u mai Hawaii ma Kalefonia, lea ua mafai ona fai ma sui o Amerika Samoa i Papua i lenei tausaga.

 

O ni isi o i latou nei e aofia ai le ali’i o Frankie Eteuati lea o loo maualuga lana taalo i totonu o Hawaii, faapea ai ma le tama’ita’i o Destiny King mai fo’i le setete o Hawaii.

 

“I la’u vaai i le tulaga lea ua i ai tapenaga a le au a alii ma tamaitai i le taimi nei, e tele lo’u talitonuga e manuia Amerika Samoa i se pine auro i lenei tausaga, e le o se folafolaga e fa’amaualuga ai le loto, ae o le talitonuga sa’o lava o loo aumai i le tulaga ua molimauina i tapenaga a alo ma fanau a le atunu’u,” o le saunoaga lea a le susuga a Samoa Samoa, le faiaoga o le au basketball a le vaega o ali’i.

 

Ina nei le manatu mamafa ni isi o le atunuu i sui e to’atolu o le au ‘aau lea ua filifilia mo Papua, ae na taua e Young e fa’apea, o matati’a o loo umia e i latou nei mai ta’amilosaga eseese sa tausinio ai i Hawaii ma Kalefonia i totonu o le masina o Me ma Iuni 2015, ua maitauina ai le tele fo’i o le avanoa e mafai ai ona manumalo la tatou vaega ‘aau i ni pine auro.

 

“O le au uso o Daniel ma William Hardman ma le tama’ita’i o Tilali Scanlan lea ua filifilia e avea ma sui o le atunuu i Papua i taaloga ‘aau, o loo latou umia ni matati’a i taaloga a Kolisi i Hawaii ma Amerika, ma o ia fo’i matati’a o loo faatulagaina i le lisi o matati’a maualuluga i le faatulagaina o ta’aloga a le lalolagi, ma e i ai lo’u talitonuga e tele fo’i le avanoa e mafai ai ona ausia e le tatou vaega ‘aau ni pine auro mai vaega eseese e 12 lea o le a tausinio ai i latou i Papua,” o le saunoaga lea a Young.

 

Na fa’ai’u le saunoaga a Young i lona faapea mai i le atunu’u, “Afai e lei manuia le au taaalo a Amerika Samoa i ta’aloga o le Pasefika i le 2011, ua sauni ali’i ma tama’ita’i e to’a 85 lea ua filifilia e fai ma ave fu’a a Amerika Samoa i Papua, e finau ma le loto atoa mo ni pine auro mo lau tapuaiga Amerika Samoa.”