Ads by Google Ads by Google

FOLAFOLA' AVE PASI LE FASIOTIA O LONA TO'ALUA

O le ali'i 'ave pasi lea ua tu'uaia e le malo i lona folafolaina lea o lona fasiotiina o si ona to'alua fa'aipoipo ma fa'anini'i lona tino (tulou), ua fa'atonu e le fa'amasinoga fa'aitumalo e alu e sa'ili se isi nofoaga e nofo ai, ma aua ne'i toe taumafai e fa'afeso'ota'i le fafine ma lana fanau i so 'o se taimi, se'i vagana ua toe tu'u atu e le fa'amasinoga se isi poloa'iga e mafai ai ona latou toe feso'ota'i.O lenei mata'upu na tofu atu i luga o le laulau a le Ofisa o leoleo i le po o le aso 16 Novema, pe tusa o le te'a o le 10:00 i le po, ina ua taofi e le tama o le fafine le ta'avale a leoleo na pasi ane i luga o le alatele, ma ia fa'ailoaina i ai folafolaga a le ua molia ua fai i lona afafine (to'alua o le ua molia).O le taimi lea na toe aga'i atu ai loa le ta'avale a leoleo i le fale o le ua molia ma taumafai ai leoleo e vala'au le igoa o lea ali'i, peita'i e le'i tali mai o ia. Mulimuli ane sa toe fo'i loa le ta'avale a leoleo.Ina ua latalata atu le ta'avale a leoleo i le Ofisa i Fagatogo, sa va'aia ai e leoleo le ua molia o lo 'o savali ane i tafatafa o le ofisa o leoleo, ma maua ai loa le avanoa o ali'i leoleo e taofi ma fesiligia ai o ia i le mafua'aga na ala ai ona latou o atu i lona fale.Na taumafai ali'i leoleo e fa'atalatalanoa le ua molia ma fesiligia i le mafua'aga o le vevesi e pei ona tula'i mai i lo la aiga, peita'i sa le'i tali lava le ua molia i se fesili, e le'i fia talanoa fo'i o ia i leoleo.Na ta'ua e leoleo lo latou fa'alogoina o le malosi o le manogi o le ‘ava malosi mai le tino o le ua molia i le taimi sa latou talatalanoa ai.Na ta'ua i fa'amaumauga a le fa'amasinoga le fesiligia e ali'i leoleo o le ua molia, pe moni sa ia fa'afefeina lona to'alua, peita'i sa le'i tali o ia.Na ta'ua e leoleo, o le fafine na telefoni i lona tama ma fa'amatala i ai folafolaga a le ua molia ua faia ia te ia, ma sa'ili ai loa e le tama se fesoasoani mai leoleo.Ua toe tatalaina i tua le ua molia e fa'atali ai le isi ona iloiloga lea ua fuafua le fa'amasinoga e toe vala'auina i totonu o le 2 vaiaso, e fa'atali ai su'esu'ega a le malo o lo 'o fa'aauau pea e uiga i lenei mata'upu.A'o tatala ai le ua molia i tua, ua poloaina o ia ina ia aua ne'i ona toe tagofia le 'ava malosi i so 'o se taimi, pe toe taumafai fo'i e fa'afeso'ota'i le fafine ma lana fanau. Ua poloaina le tu'uina atu o ona pepa malaga e taofi e le malo se'i mae'a lona fa'amasinoga ona toe fa'afo'i atu lea ia te ia, ma ua fa'asa ona ia tu'ua le atunu'u pe taumafai fo'i e sola 'ese mai le teritori.