Foia faafitauli na feagai ma Aunuu tulaga tau Eletise

Mai le tele o tausaga o feagai pea tagatanuu o le motu o Aunuu ma tulaga pagatia i tulaga faaletonu tau eletise, o le vaiaso nei lea ua faai’uina ai ma le manuia galuega mo le faafouina o pou uila uma lava i totonu o le motu, e aofia ai le fausia o isi pou uila fou faataamilo i le motu atoa ma aga’i atu ai i luga o le mauga, le nofoaga e le’i o o muamua i ai le eletise.

 

Na taua e nisi o le motu o Aunuu na valaau mai i le Samoa News, le faafiafiaina o i latou ona o le suiga ua i ai le tautua a le Puleaga a le Eletise ma le Suavai (ASPA) mo le motu, e le gata ua malamalama atoa le motu, ae ua le toe tupu fo’i le faafitauli sa i ai muamua, o le oo atu i taimi o faigalotu a aiga i le afiafi ae tape atu afi eletise, faatoa toe faaola i le isi aso e sosoo ai.

 

“E le o toe tupu le faaletonu lena i le eletise i Aunuu i le taimi nei, e le gafa ua ola faasoloatoa afi eletise, ae ua malamalama faasoloatoa tulimanu uma o le motu i le malolosi o le susulu o moli, e muliga ai fo’i taulaga o atunuu i fafo i le tulaga lea ua i ai Aunuu,” o le saunoaga fiafia lea a se tasi o tagatanuu o le motu i le Samoa News.

 

Na taua fo’i e le molimau e faapea, na avea le agaga fiafia o tagata o le motu i le tulaga lelei ua siitia i ai auaunaga a le ASPA, ma itu na faaalia ai e tagata uma le agaga talimalo ma le loto alofa, e ala i le taimi o fafaga a aiga ta’itasi a’o feagai ai tama faigaluega ma le faatinoina o le galuega.

 

E tolu vaiaso na galulue ai sui o le vaega o le Laina (Line Crew) a le ASPA mai Tutuila nei mo le toe fesuia’iina o pou uila uma lava i totonu o le motu o Aunuu, e aofia ai ma le faapipiiina o moli fou ma isi pou uila fou, e pei ona faamaonia mai e se sui o le ASPA e le faataga ona talanoa i tusitala i mataupu faapenei.

 

Na taua e le sui o le ASPA e faapea, o le aufaigaluega mai Tutuila sa faatinoina lenei galuega, sa i lalo lea o le taitaiga a le susuga ia Pulemau Sei ma Elia Iese, faatasi ai ma le alii onisinia ia Dave Pu’a.

 

“O galuega sa faatinoina e aofia ai le faapipiiina o moli fou uma lava i totonu o le motu, ma faasolo atu ai le tautua i le faapipiiina o moli i luga o le mauga, le vaega o lo o fai ma sulufaiga a le motu i taimi o faalavelave faalenatura e pei o galulolo,” o le saunoaga lea a le molimau, atoa ai ma lona faamaonia mai o le le toe i ai o se faaletonu i afi eletise, e le o toe motusia fo’i le eletise e pei ona i ai i tausaga ua mavae, ae ua ola faasoloatoa.

 

Ina ua fesiligia le afioga i le Faipule o le itumalo e tusa ai o lea tulaga, na faamaonia mai ai e le afioga ia Talaimatai Elisara Su’a suiga lelei ma le matagofie ua i ai tautua a le ASPA i totonu o Aunuu.

 

“O le taimi nei ua ola uma moli i totonu o le motu, ua faafou uma fo’i pou uila ma ua oo atu lava le eletise i luga o le mauga, e le gata o le ala savali ae faapea fo’i luga o le auala taavale,” o le saunoaga lea a le alii faipule.

 

Na faafetaia e le afioga a Talaimatai le afioga i le alii faatonu o le ASPA ia Utu Abe Malae ma le Fono Faafoe, aemaise ai lava alii sa galulue i le faaleleia o le auaunaga o le eletise i Aunuu, ona o le galuega ua matagofie ma manaia.

 

“O le taimi nei, e le o toe motusia le eletise e pei ona masani ai i aso ua te’a, se’i vagana lava ua fesuia’i afi ona faatoa motusia lea o le eletise mo sina taimi puupuu, o se tala fiafia fo’i lea mo le isi lea vaega o si o’u itumalo,” o le saunoaga lea a le alii faipule.

Comment Here