Foa’i Ofisa o Aoga pusa’aisa mo aoga i le atunu’u

O le vaiaso nei lea ua amata tufatufa atu ai e le Matagaluega o Aoga a le malo, tauala atu i le polokalame a le School Lunch pusa’aisa tetele ta’itolu mo aoga tulaga muamua uma i totonu o le atunu’u, e pei ona amata ai i le aoga a le Peter Coleman i Pago Pago i le taeao ananafi.

 

I se faatalatalanoaga a le Samoa News ma le Tama’ita’i Pule o le School Lunch ia Christina Fualaau i le taeao ananafi, sa ia fa’amaonia mai ai le tofu uma o aoga i Tutuila ma Manu’a ma pusa’aisa aua le fa’aleleia atili o le latou auaunaga mo fanau aoga i le atunuu.

 

“O le vaiaso lenei o le a amata taulimaina ai e aoga eseese i le atunuu a latou pusa’aisa ma le Matagaluega o Aoga, ma le fa’amoemoe o le isi lea vaega o la matou auaunaga mo fanau aoga, ina ia lelei ma mautu tulaga uma e tausia ai i latou a’o i ai i totonu o faleaoga,” o le saunoaga lea a Fualaau.

 

O isi vaega o lo o galulue ai le School Lunch mo le fa’aleleia i le vaiaso nei i totonu o umukuka a aoga ta’itasi e aofia ai le suiga o ogaumu tuai i ogaumu fou, fa’apea ai ma isi tama’i pusa’aisa e fa’amalulu ai vaiinu mo fanau.

 

O isi suiga e pei ona saunoa i ai Fualaau, o le taumafai lea ina ia kiliva atu taumafa a fanau aoga i aso uma, ina ia taofia ai le toe tula’i mai o le fa’aletonu lea sa mafua ai ona fa’asea le aoga a Pago Pago, i le leaga lea o vaega o lo o kiliva atu mo taumafa a fanau.

 

O ni isi o ia suiga e aofia ai le fautuaina o le Matagaluega o Fa’atoaga, e le toe taliaina ni fualaau ‘aina e kiliva atu i pepa iila, ae ua fautuaina le fa’aaoga o atigi pusa poo ato, ina ia faigofie ai ona malu puipuia le tino o fualaau ‘aina i le taimi e kiliva atu ai i faleaoga.

 

E pei ona silafia, o le vaiaso na te’a nei na toe tula’i mai ai fo’i le fa’aletonu i le aoga a Pago Pago, ina ua ripotia le tele o fualaau ‘aina sa kiliva atu mo le kukaina ai o taumafa a fanau aoga na leaga ma lafoa’i i le lapisi ina ua le aoga.

 

Na fa’aalia le le fiafia o le afioga i le Matua ia Pulu Ae Ae Jr sa fai ma sui o le aoga i Pago Pago e fa’apea, ina ua toe alia’e mai fo’i lea fa’aletonu i taumafa a fanau aoga.

 

O le taeao ananafi na feiloa’i ai Pulu ma le faletua ia Fualaau mo le fa’amaninoina o lenei mataupu, ma fa’aalia ai e Pulu lona agaga faafetai i le Matagaluega o Aoga aemaise ai o le faigamalo, ona o le amanaia atu o se lagona vaivai e tusa ai o tulaga o lo o tausia ai le fofoga taumafa o fanau aoga.

 

“E leai se manatu o Pulu e fa’aleaga le galuega a le School Lunch po o le faigamalo fo’i, pau le lagona, ia silafia e le Matagaluega aemaise le School Lunch tulaga fa’aletonu o lo o tula’i mai i taumafa a fanau aoga,” o le saunoaga lea a Pulu.

 

Na fai fo’i le afioga i le matua ma sui o le aoga a Pago Pago e fa’afetaia ai le foa’i mai le matagaluega, e pei ona i ai pusa’aisa e tolu sa latou tauaaoina i le aso ananafi.

 

Na fa’aalia e le faletua ia Fualaau lona fa’afetaia o Pulu e tusa ai o lona lagaina o le mataupu e fa’atatau i vaega sa fa’aletonu o meaai a le fanau, atoa ai ma lana saunoaga, e aoga tulaga fa’apea e vaavaai i ai lana vaega mo le fa’aleleia atili o le latou tautua.

 

O le mae’a ai o se iloiloga sa faia i luma o le maota o le Senate i le vaiaso na te’a nei, na talia ai loa le fautua ina ia taofia le toe faatauina mai o fualaau ‘aina o lo o fa’aaoga i ai vailaau e tausi ai e pei o kapisi, pi ma isalaelu e pei ona faamaonia mai e Fualaau i le Samoa News.

 

“Pau fualaau ‘aina ia o lo o fa’atau mai i le aufai fa’atoaga i le atunuu o esi pula, fa’i, fa’i pula, kukama, maukegi ma le talo, o isi fualaau ‘aine e pei o moli ma le apu, o lo o fa’atau mai i fafo,” o le saunoaga lea a Fualaau.

Comment Here