“E ui ina ua fai si tuai mai o meaalofa sa tatau ona maua tonu mo le Kerisimasi ae taua o lea lava e mafai ona taua’aoina i le agaga o le tausaga fou 2013!” O se lagona fa’aalia lea o le tina o Moana Hatcher, lea o lo o fa’atina i ai le to’atele o ta’ita’i o le US Army Reserve ona o lona laoa mautotogi, sa masani ona fa’akonekarate e alaala ai ni ali’i ta’ita’i o le Army Fa’aleoleo i Tafuna.

O lea ua to’ai taunu’u fa’amomoli o pusa tetele mo meata’alo a le fanauiti, ae maise o latou au’upega e fa’aaoga i taimo o ‘au’auga. Ona o nei mea sa aumai mamao e se tasi o papalagi matua e alaala i North Carolina, sa asiasi mai i le ali’i o Major Troy Kennedy, lea sa avea ma Installation Officer o le US Army Reserve mai le tausaga 2006 se’ia o’o i le 2008.

Ona o le asiasiga mai a Ralph S. Howard sa ia matauina ai le fanauiti i le ta’elega i Utulei, o masani i latou e ‘au’au ai ma le fiafia, ae le fa’aaogaina e i latou ni polou pe o ni mata maulu fo’i.

“Ona o le agaga alofa atu i tamaiti Amerika Samoa ia ‘au’au ae ua la’eia nei au’upega e tausia ai lo latou soifua maloloina, o lea ua ou manatu ai, e sili ona faimeaalofa atu ai i lenei vaitaimi fiafia!”

O sana vala’au mai lea i le tina sa mafai ona ia te ia lona tuatusi, Moana Hatcher o Vaitogi. Ina ua tu’uva’a ese atu Major Kennedy mai Amerika Samoa, sa toe malaga mai Ralph ma talimalo ai le aiga o Hatcher i Vaitogi ia te ia i le tausaga 2011, ma o lona taliu atu i North Carolina, ua ia melia mai ai lenei meaalofa mo so’o se tamaititi lava o lo’o i ai i le Pediatrics a le Falema’i, po’o nisi fo’i nofoaga faitele e pei o le ta’elega i Utulei.

O pusa nei sa i ai i totonu meaalofa o manu felanulanua’i e faimeaalofa ai i le fanau e afua mai le pepe se’ia o’o i le ta’i fitu tausaga le matutua.Na fa’ao’o e le faletua o Moana le meaalofa i le aso ananafi i le Potu Piliaki o le Falema’i i Faga’alu, fa’atasi ai ma le talavai a le Wells Baby Clinic i Tafuna Dispensary ae le’i taina le itula 8:30 i le taeao.

Ona e na’o le to’alima lava ma’i sa fa’ataotolia i le falema’i i Faga’alu, o lea sa toe a’e ai se tofa ina ia fa’ao’o atu i le talavai a le fanau i Tafuna lea tufa’aga.

“Fa’afetai lava, e le’i i ai se mafaufau o le a maua ni mea ta’alo a le fanau i lenei taeao, ae o mea lelei lava nei mo le fanauiti, e le fa’aoso ulavale ai i latou, ae fa’afiafia e alofa i manu ma fagafao!” O se tala lea a se tasi o tina ua taofia lona suafa, ona o tulaga o aiaiga o tulafono tamau a le falema’i e tusa o aia tatau a ma’i i nofoaga e pei o le falema’i.

Na fa’afetaia fo’i le galuega alofa e tama’ita’i Tausima’i sa tiute i le taeao ananafi i le Potu Piliaki, “Fa’afetai i lena ali’i agalelei, o se tasi lea o mea e fa’aoso fiafia i le fanau, pe a uma ona tui e tagi, ae a tu’u atu i ai nei meaalofa fa’apitoa, e fa’ana ai i latou ma galo ai tiga o tui po’o vaila’au e fa’ainumia ia maua lo latou malosi!”

Ona o le a toe fa’ao’o se tala i fafo i lea tama matua o Ralph Howard, o le a fa’aalia ai ni ata i le tatou nusipepa e fa’amautinoa ai e ia, ua faia lona mana’o, ma o lo’o i ai fo’i le agaga fa’afetai o tatou tagata ua taua’aoina i ai nei oloa, e tatau ona fa’ao’o atu ia te ia.

O le ali’i faia’oga o le A’au, Zero I’aulualo ma le faletua o Tupu, sa avea ma sui o le Sosaiete Aau a Amerika Samoa latou te talia fo’i mea faigaluega mo ‘au’auga sa taua’aoina.

O sana tala mai, “Fa’afetai o le a fa’aaogaina nei mea faigaluega mo ‘au’auga a le fanau i le vaitaimi o le Taumafanafana ma le tu’uaga umi o A’oga, aua o mea ua taua’aoina e aoga tele lea mo le fanau fa’ato’a a’oa’o le a’au. O le a fa’aaogaina lava nai mea i le taimi nei, i taimi e a’oa’o ai fanauiti lava 3-5 tausaga e fuafua i le laiti o latou ulu ia ofi lelei ai mata ma pulou a’au.”