Ads by Google Ads by Google

Foa’i a le Polamalu Fa’aSamoa Initiative i le LBJ

E lua loli tetele ma uta tutumu ua mae’a fa’ao’o ane i le Ofisa o le Sapalai a le LBJ i Faga’alu, o so’o se ituaiga o mea faigaluega e mo’omia e foma’i mo le fa’atautaiga o taotoga eseese, o mea faigaluega mo tama’ita’i tausima’i e fa’atino ai latou galuega, ae maise o moega fa’apitoa mo i latou e gasegase i ma’i sua ua tutupu i papatua ma nisi fo’i o moega e faia ai taotoga eseese, nofoa fa’apitoa e mafai ona momoe ai tagata tausima’i i le po e tiute ai i latou, e o’o i moega o pepe fou fa’ato’a fananau mai.

 

O lenei foa’i atoa, sa tu’ufa’atasia e le Hospital Sisters Franciscan Order mai le Setete o Illinois, o se latou galuega fa’apitoa mo tagata lautele, ae ua fa’aauala mai lea i le “Toe Tima’i Fa’asamoa a Troy & Theodora Polamalu Foundation” mo Amerika Samoa.

 

E to’atolu foma’i sa o’o ane e taua’aoina aloaia lenei foa’i i le taupulega a le LBJ: le ali’i foma’i o Tom Rutherford MD, le tama’ita’i Tausima’i o Denise Walsh ma le tama’ita’i Foma’i o Cindy Citrone. Sa auai ma le tama’ita’i o Elizabeth Brady o le sa avea ma so’oupu o lenei aumalaga a Troy Polamalu ma le faletua.

 

E ese mai nei ali’i foma’i ma tamaitai tausima’i, o lo’o ua i ai fo’i foma’i fa’apitoa o lo’o auai atu i le fa’atasiga a le Polamalu Foundation ma le fanau a’oga i nofoaga ua atofa i ai, ina ia latou va’aia fa’apitoa nisi o le fanau e fa’amanu’alia i ta’aloga o le a fa’atautaia.

 

Ua fa’ailoa mai fo’i, e faia talavai lautogia mo le lautele o tagata o le atunu’u, ma ua mae’a le talavai i Amouli i le aso ananafi, ae o le aso e faia ai le talavai i le falema’i i Tafuna. O le aso e soso’o ai e faia ai le talavai i Leone mo i latou uma e tulata i lea fo’i falema’i fa’aleitumalo.