Foa’i LDS Uarota Pavaiai muamua - Falema’i & DOH

O le taeao ananafi na fa’aso’o ai le pale fuiono o le Ekalesia a Iesu o le Au Pa’ia o Aso e Gata Ai i lana Uarota muamua i Pavaiai, ina ua latou toe taliu mai e foa’i le silia ma le ta’i 50 o ‘ie ‘afu, aluga, taga aluga ma ‘ie moega, ina ia fesoasoani ai i le galuega faifaipepa a le Mamalu o Foma’i, le pa’ia o tausima’i ma le aufaigaluega o le Pulega a le Falema’i tele i Faga’alu ma le Matagaluega o le Soifua Maloloina i lona falema’i i Tafuna, Leone, Amouli ma le Manu’atele!

 

“O lenei foa’i, e fiafia tele Uarota eseese o le matou ekalesia e fa’atino i lea tausaga ma lea tausaga, aua e mautinoa e i ai le mana’omia o tatou falema’i uma lava, ia lelei ona tausia o tatou tagata, i so’o se taimi e fa’agasegasea ai, ma sulufa’i mai mo togafitiga.” O se fa’amatalaga amata lea a le susuga Dr. Tony Tuitele, o se tasi o ali’i foma’i o le tatou atunu’u ua litaea nei ma o ia foi o le Peresetene o le Siteki a le LDS Pago Samoa i Sisifo.

 

O le vasega o e mautofi o le LDS i Pavaia’i na masi’i mai e fa’ao’o mai lea foa’i taua, ma sa auai mai ai le susuga le Epikopo Fa’atauva’a Uitualagi, le susuga le Fesoasoani Muamua ia Vailu’u Pitoitua ma ni isi o tina o le Aualofa.

 

O Dr. Tuitele sa fai ma fofoga feso’ota’i o le latou Ekalesia ma le Ofisa o le Soifua Maloloina i lona fo’i taupulega atoa, le Fa’atonu Tuileama Nua, le sui Fa’atonu Farah Utu, Faleileesi Uele, Fa’atonu o Tamaitai tausima’i Margeret Sesepasara, Dottie Tuiavi’i ma le mamalu lautele o le aufaigaluega tofia sa maimoaina ma fa’afetaia lea foa’i taua.

 

O le susuga Papali’i Marion Fitisemanu sa ia tula’i e fai ma fofoga tali o le Matagaluega o le Soifua maloloina i lea taeao, ma sa latou toe fa’ailo ai fo’i le fa’afetai, aua o le masani lava lea a lea Ekalesia i ona Uarota e fia, e foa’i pea mo le Falema’i LBJ Medical Center ae maise fo’i o le matagaluega i ona falema’i fa’aitumalo e lima ua i ai nei, fa’atasi ai ma le Manu’atele i Ofu ma Ta’u.

 

I le vaiaso na te’a sa o mai ai fo’i Pavaiai LDS Uarota muamua ma le 50+ aluga, 50+ ie afu, 50+ taga aluga, 50+ ie moega mo le falema’i tele i Faga’alu ma sa taua’aoina lea i le vasega o CEO, Dr Ladua ma nisi fo’i o le taupulega i lena itu o le tautuaina o gasegase o le mamalu lautele o le atunu’u.

 

Ina ua mae’a sa faia se tali fa’afetai a le DOH e ala i le malu o le taeao, ma sa talisua fa’atasi ai le pa’ia o le Ekalesia ma sui fo’i o le Matagaluega sa auai.

Comment Here