Ads by Google Ads by Google

Finau Sui Fofoga Fetalai teena ripoti Komiti Teuteu a maota e lua


Komiti Teuteu a le Fono i le taimi o le latou fetufaaiga i le taeao ananafi e talanoaina ai suiga a le Senate i le pili o le paketi a le maota o sui. [ata AF]
ausage@samoanews.com

E ui o lea ua talia ma le agaga fiafia e le Maota o Sui le ripoti a le Komiti Teuteu a Maota e Lua, ina ia aloaia loa suiga a le Senate ua faia i le Pili o le Paketi a le maota o sui, ae na tau fa’a faigata le mataupu ina ua tula’i le afioga i le Sui Fofoga Fetalai i le taimi o le latou tauaofiaga ma fa’atula’i le mau, e teena le Ripoti a le Komiti Teuteu.

 

Na muamua tula’i le Ta’ita’i o le Komiti o le Paketi a le maota o sui, afioga Vailiuama Steve Leasiolagi ma fa’atula’i le mau ina ia pasia le Ripoti a le Komiti Teuteu, lea fo’i na fa’alua e ni isi o afioga i Faipule.

 

Na sosoo ai loa ma le tula’i o Fetui Fetu Jr ma fa’atula’i le mau e sui ai le mau,  teena e le maota o sui le ripoti a le Komiti Teuteu. Na faaloa e Fetui i le maota e fa’apea, na te le lagolagoina suiga a le Senate, ae sili pe a toe fa’afo’i lava le paketi a le Kovana i lona tino na ulufale atu ai i le Fono Faitulafono.

 

“Silasila fo’i le mamalu o le maota, o lo o fia maua e le faigamalo ni tupe e fa’atino ai lana tautua. O lea fo’i o lo o taoto i le Fono le tele o pili tupe a le Kovana, ae foliga mai e le o mamafa i ai le silasila a le maota maualuga. Sa ou manatu fo’i tatou te finau lava i suiga a le Senate seia oo lava i le po. Ae o la’u mau lena, tatou teena le ripoti a le Komiti Teuteu,” o le saunoaga lea a Fetui.

 

Na tula’i le afioga i le ali’i faipule ia Famealelei Anthony Fu’e Allen ma fa’aoloolomaau i le maota ina ia talia le ripoti a le Komiti Teuteu, ina ia fa’a faigofie ai galuega a le maota, ona ua leai ni aso o totoe o le galuega.

 

Na tutulu le afioga a Faimealelei ao tula’i e fa’aleo lona agaga fa’afetai i le Fofoga Fetalai, e tusa ai o lona finagalo sa fa’aalia i le taimi o le iloiloga a le Komiti Teuteu.

 

“Faafetai atu i lau afioga i le Taitai o le maota mo le galuega i lenei taeao (taeao ananafi). Ua e le manatu lava i le lua va nonofo ma le afioga i le Peresetene, ae ua e saunoa fa’ata’ita’i ona o lou puipui i le maota lea. O le 7 lenei o tausaga talu ona ou tula’i mai i le nofoa o le itumalo, ae o le taeao lenei ua ou iloa ai le toa o lou loto, e te le fefe e te saunoa i le mea moni. Ae ou te talosaga atu i le mamalu o le maota, tatou talia le ripoti a le Komiti Teuteu,” o le saunoaga lea a Faimealelei na mafua ai ona toe tula’i Fetui ma toe faaui i tua lana mau, ae lagolagoina loa le manatu ina ia pasia loa le ripoti a le Komiti Teuteu, e ala i lo latou sii aao uma e fa’ailoa ai lo latou lagolagoina o le ripoti.

 

ILOILOGA A LE KOMITI TEUTEU A MAOTAE LUA

 

Na tau siisii le tai i le taimi na lalafo ai afioga i Senatoa ma Faipule i le talanoaina o suiga a le senate i le pili o le paketi a le maota o sui, lea na teena e afioga i Faipule i le aso Lua na te’a nei.

 

O le fonotaga a le Komiti Teuteu na usuia lea i le vaega o le maota o le Senate o lo o fa’aaoga mo a latou taumafaga.

 

Na fa’amanino e le afioga a Magalei Logovi’i, o le taitai lea o le Komiti o le Paketi a le maota maualuga e fa’apea, o le mafua’aga o suiga a afioga i Senatoa, ina ia toe fa’afo’i le aofaiga o le paketi a le Fono i le tulaga tuai sa i ai, ae aua ai nei toe tau talosaga i le Kovana mo se tupe mai lalo o le Paketi Faaopoopo (Supplemental Budget).

 

Saunoa Magalei e fa’apea, e ui e $700,000 le tupe a le fono o loo i ai i lalo o le Paketi Faaopoopo a le Kovana, e na o le $500,000 lea ua finagalo le Senate e aveese mai i lalo o le Polokalame Faapitoa, ma le fa’amoemoe a pasia le Paketi Faapitoa, ona aumai lea o le tupe a le Fono o loo i ai e toe faatumu ai vaega tupe na aveese mai i lalo o le Polokalame Faapitoa a le kovana, ina ia aua ai ne’i i ai se fa’aletonu i atina’e ma galuega ua fuafua le kovana e fa’atino.

 

Na faamanino atili fo’i e Magalei e fa’apea, o le tupe lea ua manatu le Senate e faaopoopo i le paketi a le Fono, o lo o faamoemoe e fa’atau ai vaega e fa’atino ai galuega a le Fono (materials & supplies), ma totogi ai fo’i pili o le moli - ae le o i ai se manatu e faa faigaluega ai ni isi tagata faigaluega e pei ona manatu i ai ni isi o Faipule.

 

Saunoa le Fofoga Fetalai ia Savali Talavou Ale e fa’apea, e le tatau ona faaitiitia tupe ua uma ona fa’atulaga e le Kovana mo lana Polokalame Faapitoa, ona o atina’e e taua ma aoga mo le atunu’u. Sa ia taua fo’i le naunau pea o le maota o sui ina ia pasia le paketi i lona tino na aumai ai e le faigamalo, e aunoa ma le toe faia i ai o ni suiga.

 

Na faamanino e le afioga i le Peresetene ia Gaoteote Tofau Palaie le taua tele o le atoa o le paketi a le Fono, ina ia fa’atino ai ana galuega ua uma ona fuafua. E le tatau fo’i ona ui le paketi a le Fono i lalo o le Paketi Faaopoopo a le Kovana, aua o le Fono, o le isi lea Vaega Tumaoti a le Faigamalo.

 

Na faamanino atli e Gaoteote i le Komiti Teuteu, e le taitai lava le $6.9 miliona lea ua aumai e faatino ai galuega a le Fono, o le tulaga fo’i lea e tatau ona malamalama lelei afioga i faipule i le mafua’aga o suiga.

 

Na fa’atula’i e le afioga a Tuaolo M. Fruean le mau ina ia tuu loa le mataupu i le palota, ae na saunoa Fetui ma fa’amanino e faapea, e le o pogisa le maota o sui i le mataupu o lo o latou finau ai, o lo o malamalama lelei i latou i le tatau lea ona pasia le paketi i lona tulaga na ulufale mai ai.

 

Na toe saunoa Savali e fa’apea, e leai se eseesega o le aveese mai o tupe mai le Polokalame Faapitoa ae toe faatumu mulimuli. E le gata i lea, e tatau fo’i ona fai se faaiuga a le Fono i pili tupe na aumai e le faigamalo e saili ai ni tupe mo le malo. Ae ona o le tulaga i le va nonofo fa’ata’ita’i, ua ia manatu ai loa e talia suiga a le Senate.

 

Na faai’u lana saunoaga i lona talosagaina lea o le maota maualuga, ina ia galulue fa’atasi mo le fa’atumauina o le mamalu o le Fono.