Ads by Google Ads by Google

Finau pea pule Ofisa o Tiute mo totogi ovataimi lana aufaigaluega

Tumau pea le tali leai a le kovana

 

Na talosagaina e le alii pule o le Ofisa o Tiute le afioga i le alii kovana, ina ia toe silasila i lana faaiuga ua faia e taofia ai le toe taliaina o ni ova taimi i soo se Ofisa o le malo, ona e i ai lona talitonuga o lona Ofisa o lo o sili ona pagatia i lea faaiuga.

 

Na taua e Vaetagaloa G. L Lefiti i lana tusi ia Lolo Matalasi Moliga e faapea, o le tautua a le Ofisa o Tiute i le malo e le na o le tasi se vaega, ae aofia ai le puipuia o tupe e ulufale mai i totonu o le atunuu ma tuaoi o Amerika Samoa, mataituina o oloa mai fafo ina ia mautinoa e totogi le lafoga, ma le vaavaaia o aupega ma fualaau faasaina e  ulufale faanana mai i le atunuu.

 

Na taua e Vaetagaloa e faapea, o le sini autu o le auaunaga a lona ofisa ia mautinoa o lo o malu puipuia laina tuaoi o le teritori, peitai o ni isi o faafitauli o lo o feagai ma i latou, o le laititi o le fale o lo o faatino ai a latou galuega i le taimi nei i le malae vaalele i Tafuna.

 

O ni isi o mataupu na fesiligia e le alii kovana ina ua taliu mai i lana malaga i Hawaii i le masina o Mati na te’a nei, o le mafuaaga e ala ai ona siaki e le Ofisa o Tiute tusi folau a tagata, ma le mafuaaga e umi ai ona laulaututu tagata malaga i laina e faatali ai le taimi e siaki ai a latou uta.

 

O lo o tu’ua’ia e Vaetagaloa ia le kamupani vaalele o le Hawaiian Air, i le mafuaaga e tuai ai la latou tautua mo pasese ma o lea faaletonu ua faamoemoe latou te talanoa ai ma le pule fou a le kamupani vaalele ua i ai nei.

 

Na fa’aalia foi e Vaetagaloa i le suiga fou ua i ai i tulaga o tusi folau,lea ua le toe siaki e sui o le Ofisa o Femalagaaiga ae ua siaki e sui o le Ofisa o Tiute, o lo o fa’aata atu ai suiga ua faia e le matagaluega o le Puipuiga Lotoifale a le malo o Amerika, ina ia mautinoa e tasi lava le vaega latou te faatinoina le galuega ma le faamaoni.

 

Na ta’ua e Vaetagalo le le faigofie o le faamalosia o tulafono i le malae vaalele aua o iina e mapuna a’e ai le le lava onosa’i o tagata, o isi foi taimi latou te maua ai iina ma faifeau palalauvale.  Ae ui i le tele o faafitauli o le galuega, na taua faaalia e Vaetagaloa lona faafetaia o lana aufaigaluega, ona o le galulue filiga ma le punoua’i ina ia mautinoa, o lo o saogalemu laina tuaoi o le teritori mai le ono ulufale mai i ai o ni fualaau faasaina, po o ni isi lava mea e ono lamatia ai le saogalemu o tagata.

 

Ae na saunoa le alii kovana e faapea, e i ai lava auala e mafai e Ofisa taitasi o le malo ona uia ina ia taofia ai le tulai mai o ni ovataimi i soo se vaega a le malo.

 

“O lea ua ou faatonuina faatonusili uma o le malo, ou te le toe taliaina ni ova taimi e toe tuuina mai,” o le saunoaga lea a Lolo.

 

Fai mai Lolo, e talitonu lona loto i le tele o tiute tauave a le Ofisa o le Tiute e pei ona faaalia e le alii pule i lana tusi, ae o lona talitonuga afai e faaauau pea ona totogi ova taimi nei i tagata faigaluega, o le tupe lena e mafai ona aumai e totogi ai ni isi tagata faigaluega fou e faa faigaluega e fesoasoani i le aufaigaluega o lo o i ai, ina ia taofia ai ova taimi ae maua ai galuega fou mo isi tagata.

 

Na taua e Lolo i le ulua’i taimi na ia faalauiloa ai lona taofia o ova taimi e faapea, o se tasi o mafuaaga ua manatu ai e taofi ova taimi, ia mafai ona faaaoga le tupe lea e alu e totogi ai ova taimi mo isi tagata faigaluega e faa faigaluega ai tagata fou, ina ia maua ai foi ni a latou galuega e tausi ai a latou aiga.