Na taua i molimau a sui e to’atolu o le afioaga o Pago Pago i luma o le Faamasinoga Maualuga i le vaiaso nei e faapea, o pepa na tuuina atu e sui o le Faletupe o le ANZ latou te sainia mo le nonogatupe o lo o finau ai nei, e le’i fa’amalamalaina atu, ae sa na o le tuu atu lava ma le faaupuga e saini.

O sui e toatolu o le afioaga o Pago Pago na valaau e le itu a le Faletupe e molimau e aofia ai le afioga i le Maoputasi ia Mauga Tasi Asuega, o le tofa Tuaolo M. Fruean ma le afioga a Vaivao Etelani.

Ina ua fesiligia e le loia a le Faletupe ia David Vargas molimau uma nei e uiga i pepa sa tuuina atu e sui o le Faletupe latou te sainia, sa latou taua ai e faapea, na pau lava le faamatalaga na tuu atu ia i latou, ia saini pepa e fai ai latou ma sui o le nuu mo le nonogatupe, ae le faapea na latou sainia pepa ona o le talitonuga, afai e tula’i mai se faaletonu i le totogia o le nonogatupe, o latou e pa’u i ai le ululu o le laau.

O le afioga a Vaivao lea o lo o taua i faamaumauga a le Faletupe, o le Teutupe a Alii ma Faipule o Pago Pago, o le sui lea o le afioaga na mua’i valaau e le loia a le Faletupe e molimau mo le latou itu.

I lana molimau na saunoa ai Vaivao e faapea, ina ua agai atu sui o le Faletupe mo le sainia o pepa o le nonogatupe i totonu o le maota o le Pago Community Center, sa na o le tuu atu lava e le teine o le Faletupe o pepa ia te ia, ma fai atu ia te ia e saini uma pepa, e aunoa ma le faamalamalamaina atu i le gagana faaperetania po o le Faa Samoa foi.

Na fesili le alii loia o Matailupevao Leupolu Jr, o ia lea o lo o tulai mo le Esetete o Mageo Malu Mageo ua maliu, pe fia pepa sa ia sainia i le aso lea, na tali le molimau, e ova i le 5 pepa sa ia sainia.

Fai mai Vaivao, pe a ma le 10 minute le umi na faia ai le sainigalima i le va o i latou ma sui o le Faletupe, ae ina ua maea, e le’i fautuaina i latou e le Faletupe i se avanoa e saili ai se fautuaga a se loia e tusa ai o pepa ua latou sainia mo le nonogatupe.

Na taua e Vaivao e faapea, e ui sa galue o se ‘financial officer’ mo le Faletupe o Atina’e a Amerika Samoa i le 1996, Sui Peresetene o le Faletupe ma Peresetene, e leai se taimi na ia faatumuina ai ni pepa mo ni nonogatupe a ni tagata, e leai foi sona agavaa i lea galuega.

Na fesili Vargas ia Steve Watson le Peresetene o le ANZ, pe fia se paleni o le nonogatupe a Pago Pago e oo mai i le aso 31 o Tesema 2012 o totoe, na tali Watson, e $29,691.25

O le autu o le nonogatupe e pei ona taua i molimau, e toe faafou ai le Pago Community Center.

Ao le’i fesili Vargas i le molimau lona lua, na talosaga Tuaolo i le Faamasinoga mo se avanoa na te faamanino ai ni isi o mataupu e ao ona silafia e le Faamasinoga.

Na taua e Tuaolo e faapea, o le mataupu lenei na amata mai i se aitalafu sa i ai i le va o le Faletupe ma le Bowling Alley i tausaga ua mavae, lea e ova i le $200,000, ona talosaga loa lea o le afioaga i le faletupe mo se nonogatupe e $100,000 e amata ai galuega mo le toe faafouina o le Hall.

Na fesili Vargas ia Tuaolo po o lana saini lea o lo o i luga o pepa a le Faletupe, lea ua avea nei ma mau faamaonia a le faamasinoga, na tali Tuaolo, “ioe, o la’u saini lena, ae ou te le’i sainia ni pepa ona o se nonogatupe mo a’u, e leai, fai mai le Faletupe, ou te saini i le pepa e fai ai a’u ma sui o le pulega a Alii ma Faipule o Pago Pago.”

Saunoa Tuaolo, e leai se mea na te sainia ai fua se nonogatupe pe afai na te iloa e manuia ai se isi tagata.

“Aisea ou te faamaonia ai fua se nonogatupe e manuia ai Leala, a’o ia o le isi tagata e pito sili ona tele ana tupe i totonu o le atunuu,” o le saunoaga lea a Tuaolo.

Na toe fesili Vargas ia Tuaolo pe sa ia malamalama i le pepa sa ia sainia, na tali Tuaolo, “pau le tala a le teine o le bank ma le ali’i palagi na fai mai ia matou, “tau lava o le saini o pepa”, e aunoa ma se faamalamalama mai ia i matou o ni isi tulaga i tua atu.”

O le ‘teine o le bank’ ma le alii palagi’ na taua e Tuaolo i lana molimau, o le tamaitai ia Malia Fa’alua ma Andrew Chamber, o i laua ia na fai ma sui o le Faletupe i le taimi o le sainiga lima sa faia.

Na avea le taumafai o Vargas e fesiligia Tuaolo pe sa i ai ni isi nonogatupe a lona aiga ma pisinisi a lona faletua na saini ai lona aao, ma itu na faamanino ai e Tuaolo i le faamasinoga le faamaoni o lana molimau, ina ne’i manatu le Faamasinoga o ia ma lona nu’u e valea.

“O a’u sa avea ma Faamasino lagolago muamua,” o le saunoaga lea a Tuaolo, “sa faatautoina a’u i lalo o le ta’utinoga lenei, e tatau ona ou faamaoni, e tatau foi ona totogi tupe o lo o o’u nofo aitalafu ai, ma sa ou usitaia ia tautinoga i le taimi a’o avea a’u ma Faamasino, sosoo ai ma le taimi na avea ai a’u ma Komesina o Leoleo, lea lava ou te ola ai e o’o mai i le taimi nei, ou te totogi tupe ou te aitalafu ai,” o le saunoaga lea a Tuaolo.

“Ae o le mataupu lenei, e le sa’o, ana faamalamalama mai e le Faletupe ia te a’u faapea, ou te totogiina le nonogatupe lenei pe afai e i ai se faaletonu, ou te tautino atu i le faamasinoga, ou te le sainia se pepa, e leai se mea ou te sainia ai fua se pepa, ou te tauto atu i luma o le Atua, e leai se mea ou te sainia ai fua se pepa.”

Na toe fesili Vargas ia Tuaolo pe o le a le mafuaaga na ia sainia ai pepa na tuu atu e sui o le Faletupe ia te ia, ae na tali Tuaolo, “E tasi lava le mafuaaga na ou sainia ai pepa nei, o a uma tupe e maua mai i le fale lea i taaloga Bingo ma faagaioiga e fai ai, e alu uma e totogi ai le nonogatupe, aua sa iloa lelei e le Faletupe, e ova i le $20,000 e maua e le matou nuu i le masina mai le fale lea.”

I le faaiuga o lana saunoaga sa ia taua ai e faapea, i le tele o auala eseese na taumafai i ai le nuu e uia ina ia maua ai se tupe e toe totogi ai le nonogatupe, e leai ma se auala na manuia.

Fai mai Tuaolo, o ia o le faiupu o le nuu ae o Mauga o le Maoputasi, ma ua salalau o la igoa i totonu o le atunuu, ma ua manatu ai tagata o laua o ni tagata leaga ona o lenei mataupu, peitai ua uma ona ia fautuaina le afioga a Mauga ma le nuu, afai latou te iloa o lo o aitalafu i latou i le Faletupe, e tatau ona totogi le aitalafu, ae talu ai o le mataupu lenei e le o sa’o, e leai la se mea o le a totogi ai fua e le nuu lea nonogatupe.

I le saunoaga a Mauga, sa ia lagolagoina ai le molimau a Vaivao ma Tuaolo, e lei faamalamalamaina atu e sui o le Faletupe le uiga o pepa ia i latou i le taimi na latou sainia ai.

“Matou te le’i sainia pepa o le nonogatupe ona o le manatu e maua ai sa matou sene apa, ae na matou sainia mo le manuia o le nuu o Pago Pago.  Soo se matai Samoa lava, o le fatu o ana gaioiga uma ia fai mea lelei e manuia ai le nuu, aiga ma le itumalo,” o le saunoaga a Mauga.

O le afioga i le alii faamasino sili lagolago ia Lyle L. Richmond na faatautaia lenei mataupu, i le lagolagosua a afioga i alii faamasino lagolago ia Mamea ma Muasau.