Ads by Google Ads by Google

FINAGALO TUILAEPA IA FA’AAUAU E LOLO GALUEGA A TOGIOLA

“TUSA LAVA PE FESUIA’I NOFOAIGA A IA TUMAU PEA LA TATOU MAFUTAGA”

Na manino i se vaega o le saunoaga a le afioga i le alii Palemia o le malo o Samoa, i le aso o le faauuga o Lolo Matalagi Moliga ma Lemanu Peleti Mauga mo le tofi Kovana Sili ma le Lutena Kovana, e naunau ina ia toe faaauau e le alii kovana ia Lolo galuega sa amata mai e le afioga i le matua ia Togiola Tulafono, a’o avea ai o ia ma kovana sili o le malo mo le nofoaiga na maea atu nei.

“Ou te manatu, tusa lava pe fesuisuia’i nofoaiga i lenei itu ae tumau pea la tatou mafutaga fesoota’i,” o le saunoaga lea a le afioga i le alii Palemia, susuga Tuilaepa Lupesoliai Sailele Malielegaoi

Na taua e le alii Palemia e faapea, o le tele o galuega sa latou galulue faatasi ai ma le afioga i le matua ia Togiola ao tulai mai i le foe, ua mafua ai ona ae ae Samoa i manuia ma faa faigofie ai tulaga o fesootaiga faaonoponei i tulaga o fesootaiga i auala televavave, e mafua mai i le uaea o fesootaiga o lo o taoto i le sami, le ‘fiber optic’, faapea ai taaloga ma isi.

Fai mai Tuilaepa, o sootaga ma galuega sa galulue i ai Samoa ma Amerika Samoa mo se manuia o tagata i le lumanai i taimi ua te’a, o natura ia e faia e malo e vavalalata ma fesootai gafa ma le faamoemoe, o mea e fai e le isi taitai, pe lelei pe faaletonu, e faaauau e le isi taitai ma le faamoemoe e manuia uma ai malo.

“Ou te faamoemoe o le a faaauau pea e le nofoaiga fou ua tulai mai lea agaga lelei, aemaise lava i mataupu e aafia ai lo tatou itulagi o le Pasefika,” o le saunoaga lea a Tuilaepa.

Na taua foi e Tuilaepa e faapea, o le tele o galuega ma atina’e sa galulue faatasi ai Samoa ma Amerika Samoa i le taimi o le nofoaiga a Togiola, lea ua mafua ai ona manuia atunuu e lua.

O le finagalo o le alii Palemia, pau le auala e mafai ai ona toe faaauau ia fesootaiga vavalalata i le va o Samoa e lua, o le galulue faatasi lea o ona taitai, o le finagalo foi lea o Togiola a’o tula’i mai i le tofi kovana sili, o le galulue soosoo tauau lea ma le malo o Samoa, ina ia saili auala e mafai ai ona siitia le tamaoaiga ma le soifua manuia o tagata.

E pei ona silafia e le atunuu, o ni isi o galuega soosoo tauau i le va o Samoa e lua ao avea Togiola ma kovana sili, o fonotaga faavaomalo ia ma le malo o Samoa i tausaga taitasi, lea e masani ona malaga atu ai Togiola ma ni isi o lana kapeneta i Samoa mo fonotaga ma le Palemia ma lana foi kapeneta i le isi tausaga, ae o le isi tausaga ua malaga mai le alii Palemia ma lana aumalaga mo fonotaga i le teritori nei.

I le fonotaga mulimuli i le va o Samoa e lua i le masina o Novema na te’a nei, na manino ai i le saunoaga a Togiola ona moomooga, ia faaauau pea e le kovana sili ma lana faigamalo o le a tulai mai galuega ua maea ona latou faataoto, mo le manuia ma le agai i luma o Samoanalua.