Na fa’ai’u le saunoaga fa’aumiumi a le afioga i le ali’i senatoa ia Tuaolo M. Fruean i luma o le maota maualuga i le taeao ananafi, i lona talosagaina lea o le ali’i peresetene o le Senate ia Gaoteote Palaie Tofau, ina ia ave se fautuaga i le alii kovana mo sana poloaiga e fa’amalosia ai vaega uma o le malo e aofia ai ma Vaega Tumaoti, ina ia tausisi ma mulimulita’i i tulafono o loo fa’atulaga ai totogi o tagata faigaluega a le malo.

E mafua lea fautuaga mai le afioga i le ali’i senatoa mai le Maoputasi, ona o le mataupu i le eseese o totogi o ta’ita’i ma tagata faigaluega a le malo, ese fo’i totogi o loo maua e ta’ita’i ma isi tagata faigaluega o Vaega Tumaoti a le malo.

Na leoleoa le afioga a Tuaolo i luma o le senate i le taimi o folafolaga a le maota, ao saunoa e fa’aleo lona le fiafia i le tulaga o loo i ai totogi o ni isi o tagata faigaluega a le Pulega o le Eletise ma le Suavai (ASPA), fa’atusatusa i le tulaga o loo i ai totogi o ta’ita’i o le malo e aofia ai le kovana a le Fono Faitulafono.

“E iivi o’u mata pe a ou vaai atu i totogi a le vaega a le ASPA, fa’atusatusa i le tulaga o loo i ai totogi o le kovana ma afioga i ta’ita’i o le Fono Faitulafono,” o le saunoaga lea a Tuaolo.

Sa ia fa’atusatusa totogi o ta’ita’i o le malo o Amerika ma le Konekeresi, faapea ai totogi o ta’ita’i o le malo o Amerika Samoa, ma isi vaega o le malo fa’apea ai ma le Fono Faitulafono, ona ia saunoa lea e fa’apea, “O le totogi o le peresetene a Amerika e $400,000, e tulaga ese ai lava le totogi o le peresetene nai lo totogi o senatoa ma faipule o le konekeresi e sosoo ane ai.”

“Ae o le a le totogi lena e te i ai,” o le fesili lea a Tuaolo i le Peresetene o le Senate, “E na o le $25,000 i le tausaga, se’i vaai a fa’amaliuliu mai nei senatoa e ofo le loto ae se’i vaai i totogi, e lagona ai le ma’asi’asi, ae o le fesili, afai e le o sa’o ona fai nei totogi, o ai la e fa’asaoa mea ia,” o le fesili lea a Tuaolo i le maota.

(O totogi o le Peresitene o le Senate ma le Fofoga Fetalai o le Maota o Sui o lo’o faailoa mai i le tusi tulafono e ta’i $30,000 i le tausaga. O totogi o afioga i senetoa ma faipule - e le aofia ai ta’ita’i o le Fono - e ta’i $25,000 i le tausaga.)

“E lei tuuina atu i ni Vaega Tumaoti a le malo ni malosiaga latou te ta sii maualuga ai o latou totogi, ma sa’oloto ai lava le tagata latou ia pe sii i luga i le ta’i $157,000 o latou totogi i le tausaga,” o le saunoaga lea a Tuaolo.

Na taua e le ali’i senatoa le ofo o lona loto i totogi o ni isi o tagata faigaluega a le ASPA ua ova i le ta’i $100,000, ae o le totogi o le ali’i kovaa e le atoa se $100,000.

Ae tusa ai o le Paketi ua fa'ataoto a le ASPA mo le Tausaga Tupe fou 2016, e na o le to'alua lava tagata faigaluega e ova atu i le ta'i $100,000 o la totogi i le tausaga, ma o se tasi o i laua ia o le Pulesili o le ASPA lea e $150,000 lona totogi.

Sa taua e Tuaolo e fa’apea, i le avea ai o le Fa’amasinoga o le isi vaega tumaoti o le faigamalo a Amerika Samoa, ua tuu atu ai fo’i ma le malosi i le Fa’amasino Sili na te fa’atulagaina ai totogi o lana aufaigaluega uma, peita’i, e le o le tulaga lena o loo faia e le fa’amasino sili.

“E na o le to’atasi lava le fa’amasino o loo fa’atulaga e le fa’amasino sili lona totogi, ae o isi tagata faigaluega uma lava, e laina tutusa uma i lalo o le tulafono o loo fa’atautaia ai totogi a le malo, o le mafua’aga lena e taua ai le mulimulita’i uma o le malo i le fa’aaogaina o le fua e tasi e faatulaga ai totogi o ana tagata faigaluega,” o le isi lea saunoaga a Tuaolo.

“O le fesili tele la, o ai la e fa’asaoa nei mea lau afioga i le ali’i peresetene, o le manatu sa’o lava, ua tatau i le ali’i kovana ona fa’asa’o, e leai lava se faigata, na ona fai lava o sana poloaiga faatasi ma lana fa’atonuga, ia usitaia uma e vaega o le malo le tulafono e fa’atulaga ai totogi o tagata faigaluega uma a le malo, ona uma lava lea,” o le saunoaga lea a Tuaolo.

Saunoa atili Tuaolo e fa’apea, ua tatau ona aami le Fa’atonusili o le Matagaluega o Tagata Faigaluega a le malo, o ia tonu lea e tatau ona faamalosia le tulafono o loo fa’atulaga ai totogi o tagata faigaluega uma a le malo, aua e i ai lona talitonuga, o tagata uma lava ua taua o tagata faigaluega tumau a le malo, e agava’a uma i lalo i lalo o le tulafono e fa’atulaga ai o latou totogi.

Na lagolagoina e afioga i ali’i senatoa ia Laolagi Fonoti Savali Vaeao ma Galea’i M. Tu’ufuli le finagalo o Tuaolo.

Saunoa Laolagi e fa’apea, ua leva ona i ai le tulafono, ma ua tatau fo’i ona fa’amalosia, o loo i ai fo’i le malosi i le Fa’atonusili o Tagata Faigaluega a le malo na te fa’amalosia ai le tulafono.

Ae na saunoa le afioga a Galea’i e fa’apea, o se tasi lenei o fa’afitauli o loo tulai soo mai i le faigamalo, o le tuuaia lea o le Fono ma taumafai e lafo mai i ai le ululu o le laau, ona o faaletonu o loo tutupu i le malo, ae i lona talitonuga, o le tiute tonu lena a le malo, o le fa’amalosia o tulafono ua mae’a ona pasia e le fono.

Saunoa Galea’i e fa’apea, afai e le mafai e ta’ita’i ua mae’a ona tofia e le kovana ona fai le galuega ma fa’amalosi tulafono, e sili pe a fautua i le kovana e toe saili mai nisi tagata faigaluega fou e faia le galuega.