Ua fautuaina e le afioga i le ali’i senatoa ia Soliai Tuipine Fuimaono le Pule o le Polokalame o le School Lunch a le Ofisa o Aoga a le malo, ina ia taofi le toe fa’atauina mai o fualaau ‘aina o lo o toto e tagata Asia, ae lelei pe a fa’aaoga fualaau ‘aina o lo o fa’atau mai i fafo e mautinoa e saogalemu mo le soifua maloloina o fanau aoga.

O lea fautuaga mai le alii senatoa, na tuuina atu i le taimi o le iloiloga a le Komiti o Fa’atoaga a le maota maualuga ananafi, ma sui o le malo sa molimau ona o le mataupu e faatatau i faaletonu o lo o tula’i mai i fualaau aina o lo o kuka ai taumafa mo fanau aoga.

Na faailoa e le Faatonusili o le Matagaluega o Faatoaga ia Lealao M. Purcell i le taimi o le iloiloga e faapea, ua sauni le latou ofisa, o le ofisa o le AS-EPA; Soifua Maloloina atoa ai ma le Land Grant, e faatau mai se masini e mafai ai ona siaki le malosi o le vailaau i luga o fualaau ‘aina o lo o faaaoga i meaai a fanau aoga.

Saunoa Soliai e faapea, e le tatau ona toe taliaina e le School Lunch fualaau ‘aina o lo o toto e tagata Asia e kuka ai meaai mo fanau aoga, ona e le o mautinoa le malosi o le vailaau o lo o i totonu o fualaau ‘aina nei.

“E tatau ona outou manatu alofa i le saogalemu o fanau aoga ma lo latou soifua maloloina, aua o latou nei e faalagolago i ai le lumana’i manuia o le malo ma le atunuu,” o le saunoaga lea a Soliai.

“E le taua i lo’u mafaufau tupe ae taua le saogalemu o fanau aoga, e tatau fo’i ona mautinoa lelei e ofisa a le malo o lo o galulue i polokalame o taumafa a fanau aoga, o fualaau ‘aina uma nei o lo o la’u atu i le polokalame o lo o saogalemu mai vailaau oona po o isi lava mea e ono aafia ai le soifua maloloina o fanau ma le atunuu,” o le isi lea saunoaga a Soliai.

Na taua e le alii senatoa mai le itumalo o Ituau e faapea, e le o le taimi nei po o le tausaga fou e aliali mai ai aafiaga i tino o fanau ona o vailaau i totonu o fualaau ‘aina, ae faatoa alia’e mai i ni tausaga o i luma.

Saunoa le afioga i le alii senatoa ia LeAtualevao Asifoa e faapea, o tausaga ua mavae sa mafai ai ona ave e le Ofisa o Faatoaga lau laau e su’e mai i Hawaii ina ia mautinoa o lo o saogalemu ia lau laau mo le fofoga taumafa a le atunuu, ae foliga mai e le o toe faia lea auaunaga.

Na faamanino e Lealao e faapea, o le faafitauli o le auaunaga lea sa faia i tausaga ua mavae o le ave o lau laau e su’e mai fafo le malosi o le vailaau o lo o i ai, e taunuu mai le faaiuga o le suega ua uma ona faaaoga fualaau ‘aina mo le fofoga taumafa o le atunuu ma fanau aoga, ae o le tulaga lelei o le masini lea ua fuafua e aumai, e maua lava i le taimi nei le faaiuga o le suega pe a fai.

I le fautuaga ina ia taofi le toe faatauina atu o fualaau ‘aina sei taunuu mai le masini, ua manatu sui o le malo, o le a latou vaavaai muamua ma fesiligia le Ofisa o le feterale o lo o latou faatupeina maia le polokalame a le School Lunch, pe i ai se aafiaga o le vaega tupe pe afai ae taofi lea tulaga.

Afai e leai, o le a taofia loa ae faatau mai fualaau ‘aina mai fafo e faaaoga i meaai a fanau aoga, se fa’atali ai le taimi e taunuu mai ai le masini o lo o galulue i ai ofisa o le malo.