Ads by Google Ads by Google

FINAGALO SOLIAI AVE MATAUPU FA’AVAE I LE PALOTA 2014

Ua talosagaina e le afioga i le alii senatoa ia Soliai Tuipine Fuimaono le peresetene o le Senate, e le gata ia filifili e le Fono mataupu taua o le Faavae e tatau ona tuuina atu i luma o le atunuu e palota i ai, ae ua tatau foi ona palota i ai le atunuu i le palota o le tausaga fou 2014.

 

Na taua e Soliai i luma o le senate i le vaiaso nei e faapea, e ui e lei manuia taumafaiga mo ni isi o suiga i le Faavae o Tutuila ma Manu’a, ae talitonu lona taofi e i ai lava mataupu taua e tatau ona palota i ai le atunuu.

 

Fai mai le alii senatoa, o se tasi o faafitauli na mafua ai ona teena e le atunuu mataupu uma o le faavae, e lei lava se taimi o le atunuu e malamalama atili ai i le aano o suiga, ae afai e taulamua le fono i le faalauiloaina o mataupu e tatau ona palota i ai le atunuu ma filifili na o mataupu talafeagai, o se itu lelei lea i lona taofi.

 

Na lagolagoina e Laolagi Fonoti Savali Vaeao ma le peresetene o le senate ia Gaoteote Palaie Tofau le finagalo o Soliai.

 

Saunoa Gaoteote e faapea, e i ai mataupu i le suiga o le Faavae sa le tatau ona tuuina atu i le atunuu e palota ai, ae o le mea ua tupu, ua avatu faatasi uma mataupu ma ua tasi ai lava le faaiuga a le atunuu o le teena uma.

 

Na lagolagoina e Gaoteote le tatau lea ona filifili e le fono ni mataupu talafeagai e soalaupule i ai le atunuu ina ia malamalama lelei, faatoa fai lea i ai o le palota.

 

Saunoa le alii peresetene e faapea, e le fou mataupu nei i le faafofoga a le fono, ae o le itu taua e tatau ona manino i ai le atunuu, e i ai mataupu e tatau ona matua iloilo toto’a e le fono ma faamanino i le atunuu a’o le’i tuuina atu e fai i ai le finagalo o le atunuu.

 

O se tasi o mataupu o le Fa’avae na teena e le au palota i le palota na mavae atu nei, o le fesili lea pe tatau ona sui e le Fono Faitulafono le faaiuga a le kovana sili e teena ai se pili na pasia e le fono.

 

A’o le’i tuuina atu lenei mataupu e palota i ai le atunuu i le palota na te’a atu nei, na maua le avanoa e fa’amanino ai i le atunuu ni isi o mafuaaga e tatau ai ona faia lea faaiuga.

 

O se tasi o mataupu sa masani ona finauina ina ua maea le fono o le Faavae a le atunuu na te’a atu nei, o le fesili lea pe tatau ona tutoatasi Amerika Samoa.

 

Na faamanino e le alii kovana ua mavae atu ia Togiola Tulafono i le tele o ana polokalame i faaiuga o vaiaso ina ua fesiligia o ia e le atunuu, e le o i ai se manatu faapea e tutoatasi Amerika Samoa e pei ona tutoatasi le malo o Samoa, ae o le agaga o le tutoatasi e pei ona talanoaina, o le faatautaia lea e Amerika Samoa o ana lava faaiuga fai ae tumau pea le faamalumaluga a le malo tele o Amerika.

 

O le toatele o tagata na faaali o latou tetee i le mataupu o le tutoatasi o Amerika Samoa, o lo o popole i latou ina ne’i avea le tutoatasi o Amerika Samoa ma itu e motusia ai fesoasoani tau tupe o lo o sasa’a mai e le malo tele o Amerika.