E tasi lava le auala na taua e le Failautusi o le Ofisa o Mataupu Tau Samoa e mafai ai ona foia fusuaga o lo o tutupu i le va o fanau aoga, o le taofia uma lea o taaloga a fanau aoga o lo o faagasolo i tausaga taitasi.

O se vaega lea o le saunoaga a Satele Galu Satele i le fonotaga sa faatautaia e le Toomaga a le Itumalo o Sua i le aso ananafi, lea na valaaulia ai le Faatonusili o Aoga ma le sui o le Matagaluega o Leoleo, mo se avanoa e fetufaa’i ai ma Alii Mautofi o le itumalo i auala e foia ai faafitauli i fusuaga o lo o aafia ai fanau aoga i le taimi nei.

“Ou te talitonu a’u, pau le auala e mafai ai ona taofia le toe tutupu mai o ni misa ma fusuaga i le va o fanau aoga, o le taofia lea o taaloga aua nei toe faia, ae ave atoa taimi o faiaoga e aoao ai fanau ina ia popoto ma atamamai,” o le saunoaga lea a Satele.

Saunoa Satele e faapea, e o o foi ia te ia le lagona tiga pe afai e alu atu lona afafine i le fale ma le mata ua fula ona o fusuaga a aoga, lona uiga o iina na te le usitaia ai le tulafono ona o le alofa faa matua i fanau.

E ui i le tele o finagalo i le leai lea o se matua na te aoaoina sana fanau ina ia amio le tau pulea, peitai na saunoa Satele e faapea, e tiga lava ona tigaina matua e aoao fanau ae fai lava loto o fanau.

“Ou te iloa o matua lava le faapogai o le faaletonu o fanau, a lelei le pito laau a matua o le a faigofie foi le galuega a le nuu ma faiaoga, ae a faatamala matua o le iuga foi lena e o o i ai fanau,” o le isi lea saunoaga a Satele.

Na taua e le Alo o Salamasina i lana saunoaga e faapea, e le mafai e le matagaluega o Aoga ona faamalie uma finagalo o le atunuu, i le mananao lea o isi matua e faaauau pea taaloga, ae o isi matua ua lagolagoina le faaiuga e taofi taaloga.

O le lua ai lenei o vaiaso talu ona aloaia le faaiuga a le Faatonusili o Aoga a le malo ia Vaitinasa Dr. Salu Hunkin Finau, ina ia taofia taaloga uma a aoga i le atunuu a’o taumafai ai le matagaluega ma le malo e saili ni auala e foia ai le toe tutupu mai o nei faafitauli.

Na taua e Vaitinasa i le fonotaga ananafi e faapea, ua maea ona faataoto ta’iala ma tulafono e faia i soo se tama po o le teine aoga na te toe faatupuina ni vevesi i taimi o taaloga a aoga, ao sauni ai le matagaluega mo le toe faaauauina o taaloga a fanau aoga, e ui e le o mautinoa mai se taimi tonu e toe amataina ai.