E ui o lea ua taoto le finagalo sa autasi i ai le Komiti o le Tu’uga Fautasi o le Fu’a ma susuga i Kapeteni o Sa ta’itasi i sa latou fonotaga sa faia i le vaiaso na te’a nei, ina ia vaevae le tuuga fautasi i vaega e lua, ona filifili mai ai loa lea o Sa e tolu pito i luga mai tuuga taitasi ia e lua e saili ai le siamupini o Faigamea o le Tai o lenei tausaga, peita’i o le Fonotaga a le Komiti o le Fu’a sa faia i le aso Faraile na te’a nei, na folasia ai e le ali’i kovana lona finagalo, e sili lava ae tasi le taimi e fai ai le tuuga o le fu’a ina ia fa’a faigofie ai galuega a le Komiti.

O le afioga i le Lutena Kovana ia Lemanu Peleti Mauga, o ia fo’i lea o le Ta’ita’ifono o le Komiti o le Fua o lenei tausaga na fa’aleoina le fa’aiuga a le Komiti o Tuuga Fautasi sa autasi i ai ma Kapeteni i le vaiaso nei, i luma o le Kovana ma le Komiti o le Fu’a.

Mai le aofa’i o Fautasi e 13 ua fa’amaonia le auai i le tuuga o lenei tausaga, e lua tuuga ua pasia e le Komiti e vaevae i ai le tuuga, o le tuuga a le Group A ma le Group B.

“O Sa uma lava latou te se’iina le Group A i le taimi o le se’iga pepa, o Sa na e aofia i le tuuga a le Group A, e fa’apena fo’i i le Group B, o Sa uma latou te se’iina le Group B, o le a aofia i le tuuga a le Group B,” o le saunoaga lea a Lemanu e tau fa’apupula ai tuuga ua pasia i le fonotaga a le Komiti ma Kapeteni.

Mai tuuga e lua o le a vaelua i ai le tuuga fautasi, e 6 Sa o le a tausinio i le isi tuuga ae 7 Sa o le a tausinio i le isi tuuga.

O le tuuga a le Group A ua fa’atulaga e faia i le taeao o le aso Lua, Aperila 12, 2016 i le itula e 8:00, ae o le tuuga a le Group B ua fa’atulaga e faia i le taeao o le aso Lulu e sosoo ai i le itula fo’i e 8:00.

“O Sa e tolu pito i luga mai tuuga uma ia e lua, o le a aga’i atu mo le sailiina o le siamupini i le aso To’ona’i, Aperila 16 i le itula e 8:00 i le taeao, lea laa saili mai ai le tulaga muamua e oo atu i le tulaga ono, ae o Sa e tolu pito i lalo mai tuuga uma fo’i ia e lua, o le a tausinio i le tuuga ua fuafua e faia i le taeao o le aso Faraile, Aperila 15 i le itula e 8:00, e saili mai ai le tulaga 7 e oo atu i le tulaga 13.

“O le manaia o le fuafuaga lenei, toeitiiti lava atoa le vaiaso o fai tuuga fautasi, o se avanoa lelei fo’i lea mo le atunu’u e maimoa ai i polokalame eseese o le sisiga fu’a o lenei tausaga,” o le saunoaga lea a Lemanu.

O le isi fo’i tulaga sa autasi i ai le Komiti o le Tuuga Fautasi ma Kapeteni o Sa i le latou fonotaga i le vaiaso na te’a nei e pei ona saunoa Lemanu, o le a fa’aaoga taimi mo Sa e 6 pito i luga e saili mai ai Sa mo le sailiga siamupini.

Mo se fa’ata’ita’iga, tusa lava pe mua le Sa mai le tuuga a le Group B, ae afai e sili ai le taimi o le Sa lea sa tulaga 4 i le tuuga a le Group A, e alu le Sa sa tulaga 4 i le tuuga a le Group A, ae nofo le Sa sa tulaga muamua i le tuuga a le Group B.

Na fesili le afioga i le ali’i kovana ia Lolo Matalasi Moliga ia Lemanu pe sa fesiligia Kapeteni o Sa ta’itasi mo sa latou fautuaga, ae na saunoa Lemanu, o le polokalame lea ua fa’ataoto mo tuuga o le fu’a, na afua mai i le fautuaga a Kapeteni o Sa o le a tausinio.

Saunoa Lolo e fa’apea, poo a lava auala e taumafai le Komiti e fa’atulaga ai le tuuga fautasi o le fu’a, o le mea moni lava e le taitai mafai ona fa’atulaga lelei Sa i tai i le taimi o le tuuga, o le mafua’aga fo’i lea e faigata ai ona fa’atulaga taimi o Sa e 6 pito i luga.

“O la’u fautuaga, e sili pe a fa’aaoga le auala tuai lea sa masani ona fa’agasolo mai ai tuuga fautasi a le atunu’u i le tele o sisiga fu’a ua mavae atu, ave uma Sa i tai e fai mai ai le tuuga, o le Sa lava e muamua, o le Sa lena e siamupini, ae afai tatou te taumafai e fai ni suiga fou, e uma ane fo’i nei mau fuafuaga ua tele le muimui ma le fa’asea a le atunu’u, ona nofonofo lea o le au ali’i kapeteni na ae amo uma e tatou le tele o le fa’aletonu,” o le fautuaga lea a le ali’i kovana.

Na fa’afetaia e le afioga i le Maoputasi ia Mauga Tasi Asuega, o ia fo’i lea o le isi Ta’ita’ifono o le Komiti o le Fu’a ma le Tuuga Fautasi le fautuaga a le alii kovana ae i lona talitonuga, na mafua ona autasi le komiti ma kapeteni i le fa’aiuga lenei, “o se faiga ina ia fa’amalilie uma ai Sa o le atunu’u”.

Na talosagaina e Mauga ma Lemanu ia le afioga i le ali’i kovana ina ia taoto atu lana fautuaga se’i latou toe talanoa i ai ma kapeteni o Sa i le isi a latou fonotaga o lo o sosoo, ae o le fuafuaga ua i ai, o le soona tuua i tai le tuuga e amata mai ai, ae ua fuafua e amata mai i gatai o Fatu ma Futi.

Na lagolagoina e le afioga a Uta Dr. Laloulu Tagoilelagi le finagalo o le ali’i kovana, fa’atasi ai ma lana fautuaga, e sili pe a amata mai i uta le tuuga, e lelei lena e faigofie ai ona fa’atulaga lelei va’a.

O Sa e 13 ua fuafua e tausinio i le tuuga o lenei tausaga o lo o aofia ai le Sa mai Samoa, fa’apea ai isi Sa fou e lua o le taimi muamua lenei ua tausinio ai i le tuuga o le fu’a, le Sa mai le Fono Faitulafono ma le Sa mai le vaega Fa’amalosi Tulafono.

O isi Sa e aofia ai le Fuao, Aeto, Fealofani Samoa II, Fetu o le Afiafi, Isaulaolemoana II, Matasaua, Taema, Paepaeulupoo II ma Sa e 2 o le Manulele Tausala.