Ua faasoa atu e le afioga i le kovana sili ia Lolo Matalasi Moliga i le faipule a Amerika Samoa i le Konekeresi sona manatu i le si’itaga i totogi amata maualalo (po’o le minimum wage), lea ua fuafua le isi siitaga e 50 sene i le itula ia Setema 30 o le tausaga lenei.

O le manatu o le afioga i le kovana sili, ina ia i ai se vaega tupe mai le malo fetarale e faatupeina si’itaga o totogi maualalo, ae afai e le talafeagai lea tulaga ona toe faafoi mai lea o le mataupu lenei i le teritori e iloiloina e se komiti faapitoa e vaavaaia e le fetarale.

O le finagalo o le afioga i le kovana sili i se fesoasoani mai le fetarale e faatupeina siitaga o totogi maualalo sa ia faaleo ina i le fonotaga ma lana kapineta lea sa faia i le lua vaiaso ua te’a.

I sana tusi i le aso 30 o Iuni ia Aumua Amata, le faipule a Amerika Samoa i le Konekeresi, sa taua ai e Lolo tulaga o le siitaga o totogi maualalo, o se mataupu tuga i le atunuu. Saunoa le kovana e faapea, talu mai se la talanoaga ma Aumua i se vaitaimi ua fano, sa alo pea lana faigamalo e tuu faatasia manatu ma tulaga aafia o Amerika Samoa pe afai e le mafai ona toe taofia le siitaga o totogi maualalo, e pei ona faatulafonoina e le malo tele.

Taua foi e Lolo e faapea, ua ia talosagaina ni manatu tusitusia mai kamupani ‘ia e lua ae maise le faalapotopotoga o le au fai pisinisi (Chamber of Commerce) i lenei mataupu atoa ai ma a latou fuafuaga peafai e le mafai ona taofia le siitaga o totogi maualalo.

Taua i le tusi a le kovana o lenei mataupu i totogi amata e le faigofie, ona a tagai i le itu mo tagata faigaluega, o le siitaga o totogi e fesoasoani lea i aiga i le alu i luga o le tau o le soifuaga.

A vaai i le itu tau pisinisi, e pei ona saunoa Lolo, o le si’itaga o totogi, o le alu fo’i lea i luga o le tupe fa’aalu i le faafoeina o pisinisi ma a tupu lea tulaga o lona uiga e ono faaitiitia le numera o tagata faigaluega pe o le sii foi i luga o le tau o oloa ma tautua.

Sa taua foi e le kovana e faapea, ua i ai faamaumauga ma tulaga maoti e faamaonia ai e le mafai e le tamaoaiga o le teritori ona gafatia se isi siitaga o totogi, se ia o’o atu lava i totogi faatulafono a le fetarale.

I lana tusi sa faatepa ai e Lolo ia Aumua i le tausaga e 2009 lea na tapunia ai le kamupani ‘ia o le COS Samoa Packing ona o le siitaga o totogi amata maualalo, ua le mafai e lea kamupani ona gafatia isi tupe fa’aalu.

Sa faailoa e le kovana i lana tusi e faapea, o lo’o galulue pea lana faigamalo e maua mai ni kampani fou i le teritori ma o ia ituaiga kamupani e le faalagolago i totogi maualalo, ina ia fesoasoan i le atina’e o Amerika Samoa. Ae peita’i o nei galuega e tusa i le tasi i le lua, pe tolu tausaga faatoa tulaia mai.

Pau le tulaga ua manatu le kovana e fesoasoani ia Amerika Samoa i le taimi nei o le toe faaopoopo lea o le isi lima tausaga e le maua ai se siitaga o totogi maualalo, ma o lea lima tausaga maua ai le avanoa mo Amerika Samoa e faatulai ai nisi o atina’e fou o lo’o galulue ai i le taimi nei.

Ae peitai, o lea tulaga o le a atili afaina ai tagata lautele i le alualu i luga o le tau o le soifuaga. Afai foi e faaauau le siitaga o totogi maualalo o le a aafina ai galuega i le atunu’u i le faaitiitia o tagata faigaluega, ma atili ona toatele ai tagata e leai ni galuega, ma afaina atu ai ma soifuaga o tagata lautele ma o latou aiga.

O le manatu faalia o le kovana, e pei ona taua i lana tusi, na te lagolagoina le siitaga o totogi amata maualalo pe afai e tuuina mai se vaega tupe mai le malo feterale.

Ma o se fesoasoani tupe mai le fetarale mo totogi maualalo, e pei ona saunoa Lolo, o le a mafai ai e Amerika Samoa o le faalautele lona tamaoaiga ma o le fuafuaga o lo’o i ai e uma ifo le lima tausaga ua le toe manaomia se fesoasani tupe mai le malo tele.

Afai e le talafeagai se fesoasoani tupe mai le fetarale, saunoa Lolo e faapea, o le isi loa itu ia toe foi i le tulaga sa i ai muamua i le tausaga ua mavae, o le faatulagaina lea o se komiti faapitoa latou te iloiloina totogi i Amerika Samoa ma o lea komiti e i lalo o le vaavaiga a le Matagaluega o Leipa a le malo tele.

I lana saunoaga mulimuli, sa taua ai e Lolo faapea o lo’o tuufaatasia e lana faigamalo manatu o Amerika Samoa i le tulaga o totogi amata maualalo ona tuuina atu lea ia Aumua e tagai i ai ma e fia maua foi e le faigamalo se manatu o Aumua i le mataupu o se tupe mai le fetarale e fesoasoan i le siitaga o totogi amata maulalo.

Ua le gata i lea, ua talosaga foi le kovana i le faipule i Uosinitone e fesoasoani ia Amerika Samoa i le tulaga o penefiti mai le fetarale lea o lo’o maua e kamupani ‘ia ina ia mafai foi ona maua e isi kamaupani i le teritori ae maise kamupani fou o lo’o fia inivesi i Amerika Samoa.