Ua talosagaina e le afioga i le ali’i senatoa ia Galea’i M. Tu’ufuli le mamalu o le maota maualuga a le senate, ina ia vave fai sa latou fa’aiuga i le fa’alavelave lea na manu’a ai se ali’i leoleo i le masina na te’a nei, ina ne’i avea le tuai o se fa’aiuga a le malo e fai ma itu e fa’aauau ai pea ona tutupu fa’afitauli fa’apenei i le atunu’u.

O lea saunoaga mai Le na Muaiao, o ia fo’i sa avea ma Komesina o le Matagaluega o Leoleo i ni tausaga ua mavae, sa tu’uina atu i luma o le maota maualuga i le taeao ananafi, i le mae’a ai lea ona fa’alauiloa e le taitaifono o le Komiti o le Puipuiga o le Saogalemu Lautele ia Faletagoa’i Tuiolemotu, le iloiloga ma le Matagaluega o Leoleo ua fuafua e faia i le taeao nei, e talanoaina ai tulaga e uiga i le mataupu lea na manu’a ai se ali’i leoleo.

O le leoleo sa manu’a i lenei fa’alavelave, o le susuga ia Time Loia, lea na manu’a i se pulu fana, ao fa’atinoina ai ona tiute fa’aleoleo ma isi leoleo e to’alua i le masina o Tesema na te’a nei.

Saunoa Galea’i e fa’apea, o le masani a tagata o lo o latou fa’atupuina fa’alavelave fa’apenei e a’afia ai ma soifua o leoleo a le malo, afai loa e tuai ona tali atu le malo, ona ta’u atu ai loa lea ia te i latou, ua palaai le malo e tali atu i a latou gaioiga.

“A e aua ne’i galo ia outou afioga i senatoa, o i latou nei e a’afia o latou soifua i fa’alavelave matuia nei, o leoleo o le malo, o i latou na tofia e ofo atu o latou soifua e puipuia le saogalemu o le atunu’u, ae afai tatou te nonofo pea e leai sa tatou fa’aiuga e fai ae fa’aauau pea ona a’afia o latou soifua, o ai o le a tula’i mai e tali atu”, o le saunoaga lea a Galea’i.

E le i nofo lelei i le finagalo o Galea’i le saunoaga a le afioga i le alii kovana ia Lolo Matalasi Moliga, lea na saunoa ai i le aso na tatala aloaia ai le tauaofiaga a le Fono Faitulafono i le vaiaso na tea nei, ma ia taua ai le amata ina mavae atu le mamalu o pulega a ali’i ma faipule i totonu o nuu ma itumalo o le atunu’u.

Saunoa Galea’i e fa’apea, e le tatau i le ali’i kovana ona ia tau le pua ma lafo atu i nu’u ma itumalo, aua o lo o fa’atino fo’i le pito laau a afioaga ma itumalo ta’itasi i le atunu’u, e ala i lona maitauina o leoleoga i afiafi o aso ta’itasi i le itu i Sisifo, e talitonu fo’i o ia e fa’apena le itu i Sasa’e.

Saunoa Galea’i e fa’apea, e mafua ona tutupu ni isi o fa’afitauli i le malo, e le o galulue fa’atasi matagaluega ma ta’ita’i o vaega ta’itasi o le malo, ae i lona talitonuga, ana galulue fa’atasi vaega ta’itasi o le malo, e leai ni fa’alavelave e tutupu mai, e manuia fo’i le tautua a vaega ta’itasi.

Mo se fa’ata’ita’iga lelei na si’itia e Galea’i, o le taimi na avea ai le tofa a Tuaolo M. Fruean e fai ma Komesina o Leoleo i ni nai tausaga ua mavae atu, e ui e le o ia o se leoleo, ae o lana tofa fa’a matai sa faavae ai le faiga o ana faaiuga, atoa ai ma le la galulue soosoo tauau ma le Faatonusili o le Matagaluega o le Puipuiga o le Saogalemu Lotoifale ia Mike Sala, lea na mafua ai ona manuia le tele o fa’aiuga sa fai.

Na taua e le peresetene o le Senate ia Gaoteote Palaie Tofau le moni o le saunoaga a Galea’i, ma ua mana’omia fo’i le vave faia o se finagalo a le maota e tusa ai o lenei mataupu.

Ua i ai le finagalo o le maota maualuga, o le mae’a ai o le iloiloga i le taeao nei, o le a fa’ataoto ai loa sa latou fautuaga e tusa ai o lenei mataupu, ma tu’uina atu loa i luma o le ali’i kovana.