Ads by Google Ads by Google

Filogia sami ma le toto tuuga fautasi fu’a Samoa

O se aso pagisa le aso Lua o le vaiaso na te’a nei mo le au va’a o le Tolotolo o Tama Uli mai Salelologa, ina ua manunu’a nisi o lana au vaa ao lumana’i le tuuga fautasi e saili ai se siamupini i le faamanatuina Iupeli Auro a Samoa, ma avea ai ma itu na filogia ai le sami ma le toto mai manu’a o nisi o le au va’a, a’o alu pea le tuuga.

I se ripoti na fa’asalalau e le Samoa Observer i le vaiaso nei na fa’amatala ai e le kapeteni a le Tolotolo o Tama Uli ia Ivan Pauli ma ona loimata le momomo o lona loto, a’o vaai atu i nisi o lana au vaa o loo sisina le toto mai o latou manu’a, ae o loo alo malosi pea i le tau sailiina lea o se latou tulaga i le tuuga.

O le vevesi na tulai mai i le taimi o le a amata ai le tuuga, ina ua faaaoga e nisi o le au va’a a le Little Rina mai Apia a latou foe e sasa ai nisi o le au va’a a le Tolotolo o Tama Uli e aofia ai ma le latou tama ta atigi apa.

Fai mai ripoti mai Samoa, e toa 12 le au vaa a le Tolotolo o Tama Uli na manunu’a i lea faalavelave, peitai e na o le to’atasi na ave i le falema’i ona o le tuga o manu’a na aafia ai, ae o le isi toatele sa nonofo ai pea i luga o le vaa mo le taimi atoa o le tuuga e ui sa vaaia le sisina o toto mai o latou manu’a.

O le ta apa a le Tolotolo o le Tama Uli ma se tasi o le au vaa na pauu i lalo o le sami ina ua osofai e le au vaa a le Little Rina, peitai sa faaauau pea e le komiti le tuuga i lea aso, e ui na taua e Ivan i lona manatu faa kapeteni, sa tatau ona taofi le tuuga.

Na taua i ripoti mai Apia le to o le pulou o le susuga Ivan i lana au vaa ona o le loto toa ma le saili malo, e ui sa manunu’a le toatele mai le faalavelave, ae sa latou finau pea ina ia maua so latou tulaga lelei.

O le Tolotolo o le Tama Uli sa avea ma Siamupini o le sisiga fu’a a Samoa i le tausaga na te’a nei, peitai na tulaga 5 i latou i le tuuga na maea atu nei, ina ua sola le Segavao Digicel III ma le siamupini, o le Ipu atoa ai ma le faailoga tupe e $50,000.

Na taua e Ivan le maea lea ona tuu atu o sana talosaga i le komiti o le sisiga fu’a, mo se avanoa e toe fai ai le tuuga fautasi o le fu’a. E lei maua mai se faamatalaga mai le Sui Taitaifono o le Komiti, le afioga i le alii minisita ia Tolofuavalelei Leiataua Falemoe e uiga i lea mataupu.

Ina ua fesiligia e le au faasalalau i Apia le kapeteni o le Little Rina ia Tialino Talauati Tolovai e uiga i lenei mataupu, sa ia faamaonia ai le moni o le faasea o loo taua e le au vaa a Salelologa.

Na taua e Tialino e faapea, o lana au vaa e sese ina ua latou ui i le alavaa a le Tolotolo o le Tama Uli, ma latou faaoolima i sui o lana au vaa.

Sa ia faamaonia foi le faaoolima o nisi o lana au vaa i sui o le au vaa a le Tolotolo o le Tama Uli, o le mafuaaga lena sa latou manatu ai e tatau ona alu sa latou faatoesega aloaia i le afioaga ma le au vaa.

Peitai i se ripoti mai Samoa na taua e nisi e faapea, na teena e le au vaa ma nisi o matai o le nuu sa i ai le ifoga, ona e talitonu i latou, e le gata e le o sa’o le taimi o le faatoesega, ae le’i i ai foi le toatele o matai matutua o le nuu i le taimi nei,  ma o popolega sa i ai, ina ne’i tula’i mai se vevesi ae leai ni matai latou te faato’ato’aina ma taofiofi.