Ua maea nei ona taoto faaiuga a ni isi o Itumalo i le atunuu, mo le filifilia lea o latou sui i le maota maualuga a le Senate mo le isi nofoaiga o lo o sosoo ai nei.

O le vaiaso na te’a nei na feiloa’i ai le itumalo o Tualatai mo le faamaoniaina o le latou tofi Senatoa, atoa ai ma le Itumalo o Manu’a #2.

ITUMALO TUALAUTAI

Ua maea nei le filifiliga a le Itumalo o Tualatai  o sa latou sui i le maota maualuga a le Senate, ma ua filifilia i ai le afioga i le Sa’o ia Tuiasina Siolosega Esera.

Na taua e se sui o le Itumalo i le Samoa News e faapea, e le’i i ai se umi o le fono, e le o se fonotaga faigata foi, aua na au tasi le Itumalo atoa e see atu le tofi i le afioga a Tuiasina o Vailoatai.

Ina ua fesiligia le afioga i le Sa’o ia Tuiasina e faatatau i le faaiuga a le itumalo, sa ia faamaonia mai ai i le Samoa News le filifilia lea o ia e fai ma Senatoa o le itumalo mo le isi 4 tausaga.

E pei ona silafia e le atunuu, o le afioga ia Tulifua Tini Lam Yuen o lo o ia umia le tofi Senatoa o le Itumalo i le taimi nei, ina ua sosoo nofoaiga e lua o ia tauaveina pea le tofi o le Itumalo.

Sa faapea foi ona sailia ai se Faalupega o le Itumalo, ma ua toe filifilia ai Ulufale Lupe mai Futiga na te toe faaauauina le tofi Faalupega o le Itumalo.

ITUMALO MANU’A #2

I le fonotaga a le Itumalo o Manu’a #2 na usuia i Olosega i le aso Faraile na te’a nei, ua tasi ai nei le faafitiga o aleaga, o le tofa i le Tootoo ia Malemo Tausaga o le a fai ma sui o le latou Itumalo i le maota maualuga, ma sui tulaga ai i le afioga i le alii Senatoa o lo o i ai nei, le tofa Velega Savali Jr.

Na taua e se molimau i le Samoa News e faapea, e le’i faigofie le feiloaiga a Olosega ma Sili i le tau sailiina o so latou sui i le Senate.

O le tofa ia Malemo na au tasi uma i ai Olosega e fai ma o latou sui i le nofoa, ae o le afioga i le alii Faatui ia Laolagi Fonoti Savali Vaeao na autasi i ai Sili e fai ma o latou sui.

Fai mai le molimau, sa faigata le sailiina o le tofa ina ua le maua se tasi, ma taoto atu ai loa le faaiuga e fai e Tootoo, ma tofia ai loa le tofa Malemo e fai ma sui o le Itumalo.

Na taua e le molimau e faapea, o le tofi a le Itumalo o Manu’a #2, e tuu faasolo ia Ofu ma Olosega/Sili. O Ofu lea o lo o i ai le tofi i le taimi nei, ma ua oo atu le faasologa ia Olosega/Sili.

Na fesiligia e le Samoa News le tofa Malemo e tusa ai o le faaiuga ua i ai le fono a le Itumalo, ma ia faamaonia mai ai le au tasi o le Itumalo e fai o ia ma o latou sui i le Senate.

Saunoa Malemo, ua maea ona saini e le Faalupega le pepa e faamaonia ai le filifilia o ia, ma ua faamoemoe e tuuina atu lea pepa i le Ofisa o Mataupu Tau Samoa i le vaiaso nei.

Sa sailia ai foi ma se Faalupega o le Itumalo mo le isi 4 tausaga, lea ua toe filifilia i ai le tofa Puletasi na te toe faaauauina le tofi Faalupega.

E pei ona silafia, o le tofa Malemo o lo o avea nei o ia ma Faatonusili o le Ofisa o le Paketi a le malo, o lea tofiga e maea i le aso 3 Ianuari 2013, o le taimi foi lea o le a faatautoina ai le nofoaiga fou e taitaia le malo mo le isi 4 tausaga.