Ads by Google Ads by Google

Filifilia ta’ita’i o le Manu’atele

Ua tasi nei le filiga o aleaga i le mamalu o le Itumalo o Manu’a #1, e toe filifilia le afioga i le alii Senatoa ia Galea’i Moaalii Tuufuli o lo o nofoia le isi nofoa o le itumalo i le taimi nei, na te toe faaauauina le nofoa lea, faatasi ai ma tofiga fou mo le afioga ia Saoluaga T. Nua na te nofoia le isi nofoa.

O se faaiuga e le’i faigofie ona faia e pei ona faamaonia mai e le afioga i le alii Faamasino Lagolago o le Faamasinoga Maualuga ia Faamausili Faasua Poumele i se faatalatalanoaga ma le Samoa News i le taeao ananafi.

“Sa le’i faigofie le tau sailiina o tofi o le itumalo i le fonotaga sa faia i le aso Toona’i na te’a nei, sa i ai foi ni isi sui o le itumalo sa naunau mai i le tofi, mo le fia ofoina atu o le latou tautua mo le itumalo, peitai e ui lava ina tetele i pesega ae tua lava i nu’u lelei e pei o lea muagagana a le atunu’u,” o le saunoaga lea a le afioga a Faamausili, o ia fo’i lea sa taitaia lea fonotaga.

Na faatumulia Malaetele i Tau, Manu’a i faasuaga o le itumalo faapea ai taitai na faamalo’ulo’u atu i le molimauina o lenei faamoeome taua.

Saunoa Faamausili e faapea, o le tofi o le itumalo mo nofoa e lua i le Maota Maualuga a le Senate, e tuu faasolo lava i itumalo e tolu e aofia ai Ta’u, Faleasao ma Fitiuta.

O le isi laasaga lea o le a laa atu i ai le tofi o le Itumalo, e tatau ona saini uma faauluuluga o le itumalo i le latou faaiuga ua faia ona faamaonia lea e le Faalupega, ma tuu atu ai loa lea faaiuga i le Ofisa o Mataupu tau Samoa ma le isi kopi i le Senate.

O le faamaoniaina o tofi mo Senatoa faatoa faia i le aso 3 Ianuari 2013 i le itula e 12:00, i le taimi e faatautoina ai i latou mo le isi nofoaiga fou.

O le isi mataupu sa talanoaina i le fonotaga lea a le itumalo, o le filifilia lea o se tasi e avea ma Kovana Itumalo o le Falelima i Manu’a, lea e aofia ai le faletolu i Ta’u, Faleasao ma Fitiuta, atoa ai ma le Luanuu ia Ofu ma Olosega/Sili.

I le faaiuga o le fonotaga sa faia ua filifilia ai le afioga i le alii Faatui ia Lefiti Atiulagi Pese, e avea ma sui faatui a le Faletolu i le fonotaga ma le Luanuu e sailia ai se tasi o le a nofoia le nofoa o le Kovana Itumalo i Manu’a.

“Sa talanoaina ai foi i le matou fonotaga lea se tasi e avea ma kovana itumalo o le matou faletolu, ma ua matou filifilia ai le afioga ia Lefiti e fai ma o matou sui i le fonotaga ma le Falelua lea o le a talo i se taimi o i luma, e filifilia ai loa se tasi e nofoia le nofoa o le itumalo,” o le saunoaga lea a Faamausili i le Samoa News.

O le afioga i le alii Faatui ia Misaalefua Hudson o lo o nofoia le nofoa o le Kovana Itumalo i le taimi nei.

Saunoa Faamausili, o le tofi mo le Kovana Itumalo o lo o i ai i le Luanuu ia Ofu ma Olosega/Sili, lea e pei ona nofoia e Misaalefua, ma ua oo atu nei le faasologa i le Faletolu.

E lei faailoa mai se aso ua fuafua le itumalo o Manu’a e usuia ai sa latou fonotaga tuufaatasi, mo le talanoaina lea o se tasi e avea ma kovana itumalo.