Filifilia Lualemana Faoa avea ma Kovana Falelima i Sisifo

O le fonotaga a le Falelima i Sisifo lea na usuia i le Aso Lulu na te’a nei i le maota o le  Failautusi o le Ofisa o Mataupu Tau Samoa ia Satele Galu Satele i Vailoa-tai, na tasi ai le faafitiga o aleaga, o le afioga i le Tama a Aitu ma Tagata ia Lualemaga E. Faoa o le a avea ma Kovana o le Falelima mo le isi 4 tausaga o lo o lumana’i nei.

Peitai na taua e ni isi o sui o le Falelima i Sisifo e faapea, e le’i logoina i latou i se fono e sailia ai se Kovana Itumalo.  Na faate’ia ni isi o i latou i le faa’i’uga ua faia, ““O anafea na tasi ai se Itumalo i se Lualemaga, o lea matou te faatali i se taimi e valaau ai se fono a le Itumalo atoa.”

Ina ua fesiligia e le Samoa News le afioga Satele i le aso ananafi e faatatau i lenei mataupu, sa ia faamaonia mai ai le faaiuga na oo i ai le fono a le  Falelima i Sisifo.

Na saunoa Satele, “E leai se mea na gase i le fonotaga, e le gata na filemu mea uma ae na tasi foi le finagalo o le Falelima ia Lualemaga, e aunoa ma se isi sui na faatuina mai e tauva i le tofi”.

Ua faalua ai nei ona filifilia Lualemaga i le tofi a lona Itumalo o Leasina/Aitulagi, e pei ona filifilia ai o ia i le 2001 e oo mai i le 2004, ona toe filifilia lea i le 2009 e oo mai i le 2012.

Ao i ai o ia i le Senate i nofoaiga ia e lua, sa tofia ai o ia na te taitaia le Komiti Suesue a le Senate (SSIC) ma avea foi ma taitai komiti o Mataupu tau Faamasinoga i le 2001-2004.

O ni isi o tofiga na galue ai le afioga a Lualemaga e aofia ai le avea o ia ma Faamasino Lagolago i le Faamasinoga mo le 9 tausaga, mai le 1981-1989; tofia o ia e avea ma Fesoasoani Faapitoa ia Kovana Kolemane mo le 4 tausaga mai le 1989-1992; atoa ai ma le filifilia o ia e avea ma Faatonu o le Ofisa o Tagata Matutua (TAOA) mo le 4 tausaga, mai le 1997-2000.

O le taimi nei, o lo o avea o ia ma Taitaifono o le Komiti o Mataupu Eseese a le EFKAS, ma ua silia i le 30 tausaga talu ona ia umia le suafa matai a lona aiga o Lualemaga.

I le maea ai o le filifiliga a le Falelima i Sisifo mo sa latou Kovana Itumalo, ua atoa ai loa Kovana Itumalo e tolu mai Falelima e 3 i le atunuu, e pei ona toe filifilia i ai le afioga i le Faatui ia Misaalefua Hudson mo le Falelima i Manu’a, ma le afioga ia Alo Dr. Paul Stevenson mo le Falelima i Sasa’e, ma ua sauni i latou nei mo le faatautoina o i latou i tofiga ua tofia e galulue ai.

“O le taeao nei lea ua faamoemoe e faatauto ai tofi uma o Itumalo i le atunuu, e aofia tofi e tolu o Kovana o Falelima, o tofi Faalupega atoa ai ma Pulenuu ma Leoleo,,” o le saunoaga lea a Satele.

Sa ia saunoa fo’i e faapea, “o se faatonuga mai le afioga i le alii Kovana Sili ia Lolo Matalasi Moliga, ia faatauto tofi nei i le vaiaso nei ao lumana’i ai le tatala aloaiaina o le ulua’i tauaofiaga a le Fono Faitulafono i le vaiaso fou, lea foi ua faamoemoe le alii kovana e saunoa ai i lana ulua’i saunoaga fa’ata’ita’i.”

Na faamaonia mai e le tofa a Iulogologo Pereira e faapea, ua sauni le alii kovana e saunoa i le tatala aloaiaina o le Fono Faitulafono i le vaiaso fou.

E lei auiliili mai e Pereira vaega o le a taula’i i ai le ulua’i saunoaga a le alii kovana, sei vagana ai lona faapea mai, o tulaga i le tamaoaiga o le malo ma le tau faaleleia o tulaga tau tupe, aemaise ai o le soifua maloloina ma aoaoga, o ni isi ia o itu o le a aofia i le saunoaga a Lolo.

O le itula e 10:00 i le Aso Gafua o le vaiaso fou ua faamoemoe e tatala aloaia ai le ulua’i Tauaofiaga a le Fono Faitulafono mo le umi e 45 aso.

Comment Here