Ads by Google Ads by Google

Filifilia e Nuuuli le afioga Levu e avea ma le isi a latou Senatoa

Ua tasi nei le filiga a le afioaga o Nuuuli e avea le afioga Levu Tulafono F. Solaita Jr, lea foi sa avea ma faipule o le maota o sui i tausaga ua mavae, e fai ma Senatoa e sui tulaga i le tofa ia Seui Laau Sr., ua usufono.

O le fa’ai’uga o le vaiaso na se’i mavae atu, na faia ai lenei filifiliga, ina ua silia ma le masina talu ona avanoa le nofoa o le itumalo i totonu o le Senate.

I le aso 18 Fepuari, na tuuina atu ai e le afioga ile matua ia Togiola Tulafono se poloaiga  e saili ai se tasi e sui tulaga i le tofa Seui ua tuumalo.

I lea poloaiga na saunoa ai Togiola e faapea, o se tasi o le a filifilia e tatau ona faamaonia mai e le Faaao o le itumalo, ma tuuina atu ai loa i lona ofisa mo lana saini e faamaonia ai.

O le afioga ia Levu sa tautua muamua i le Fono Faitulafono mo le silia i le 14 tausaga, ina ua filifilia o ia e avea ma se tasi o faipule o le itumalo i le maota o sui, lea e aofia ai ma le nofoaiga e tasi sa avea ai o ia ma sui fofoga fetalai i le taimi ao avea Saoluaga T. Nua ma Fofoga Fetalai o le maota.

Sa galue foi o ia i nisi o tofiga i totonu o le Vaega Faamalosi Tulafono, e pei o le avea  ma faatonu o le Ofisa o Paka ma Malaetaalo i le taimi o le faigamalo o Coleman. E tele foi tausaga sa tautua ai o ia i le malo feterale.

O le afioga ia Levu, sa avea foi lona tuaa o Levu Solaita ma Senatoa o le maota maualuga mo ni tausaga.

O le taimi nei, o loo tautua Levu o se fautua sinia mo le Ofisa o le tofa ia Faleomavaega Nei, ma ua 7 tausaga talu ona ia galue o ia i le tulaga lea.

Ina ua fesiligia o ia e tusa ai o le  tofiga fou lea ua tuu atu e le afioga ia te ia, na taua ai e Levu lona taliaina ma le agaga maualalo o le valaau faaaloalo a lona afioaga ina ia fai ma Senatoa.

“O se lagona fiafia ma le faagaeetia ua oo mai ia te au, ina ua tasi le filiga a le afioaga e fai a’u ma o latou sui i le maota maualuga a le fono faitulafono, ou te faafetaia ai le pulega a alii ma faipule o le afioaga atoa ona o le faatuatuaga ua lafo mai ia te a’u,” o le saunoaga lea a Levu ina ua fesiligia e le Samoa News i le aso ananafi.

Saunoa Levu, e tele se galuega o loo manaomia le faia i le fono mo le fono, aemaise lava i le tau sailiina lea o se fesoasoani mo le falemai ma le tulaga pagatia o loo tulai mai i le taimi nei.

“Ua ou sauni e ofo atu lou sao ma lau fesoasoani e fesoasoani ai i soo se auala e maua aie le atunuu ma le falemai se fesoasoani i faafitauli o loo tulai mai ai,” o le saunoaga faaiu lea a Levu.

Talu ai o lea ua malolo le fono faitulafono mo le lua vaiaso, e foliga mai faatoa faatauto Levu e avea ma Senatoa o le maota i le aso Gafua, 26 Mati pe a toe a’e mai le fono i lana malologa.

O le nofoa mo le itumalo o Ituau Malosi na nofoia lea e le tofa Seui Laau Sr lea na usufono i le po o le aso 26 Ianuari 2012 i le maota gasegase o le LBJ i Fagaalu, ina ua 69 tausaga o lona soifua.

O Seui na tofia e fai ma Senatoa mo le Nofoaiga lona 32 lenei a le Fono Faitulafono, e toalua ai ma le isi Senatoa mo le itumalo o Ituau, le afioga ia Alo Dr. Paul Stevenson mai Fagasa.

Ao lei avea o ia ma e fai ma Senatoa mo le itumalo, sa avea o ia ma Faatonusili o le Ofisa o Paka ma Malae taalo, ona sosoo ai loa lea o le avea o ia ma Faatonusili o le Ofisa e Pulea Oloa a le malo.