Ads by Google Ads by Google

FILIFILIA 'AU SIVA ASCC FAI MA SUI AM. SAMOA FA’AALIGA PASEFIKA

Ua i’u le filifiliga sa alo atu i ai le Komiti, mo le tau sa'ilia lea o se 'au siva e fai ma sui o Amerika Samoa, i le fa'aaliga lona 11 o Tu ma Aganu'u a le Pasefika e faia i Solomona, ma ua filifilia ai le 'au siva a le Kolisi Tu'ufa'atasi e fai ma sui o le teritori i lea fa'amoemoe.

O le masina o Iulai o le tausaga nei lea ua fa'amoemoe e talimalo ai le atunu'u o Solomona i le Fa'aaliga o Tu ma Aganu'u a le Pasefika, lea fo’i na talimalo ai Amerika Samoa i le 2008.

O fa'afiafiaga sa fa'atautaia e le Ofisa a le Arts Council i le vaiaso a’o lumana’i le fu’a na te’a nei, na fa'avae mai ai le fa'ai'uga e pei ona tu'uina mai e le komiti, mai le silia i le 30 'au fa'afiafia mai A'oga, 'Autalavou, Fa'alapotopotoga ma Kamupani sa fa'afiafia ai.

I se fa'atalatalanoaga a le Samoa News ma se sui o le Komiti, o ia fo'i lea o le Fa'atonusili o le Ofisa o le Arts Council, sa ia fa'amanino mai ai le 'auala na fa'avae ai i luga le filifiliga a le komiti.

Na ta'ua e le faletua ia Leala Pili Elisara e fa'apea, e le’i faigofie le tau sa'iliina o se 'au fa'afiafia e fai ma sui o le teritori i lenei fa'amoemoe, ona o le tulaga lelei uma o 'au siva sa fa'afiafia i le vaiaso o le fu’a.

“O le fa'ai'uga lea ua faia, o le fa'ai'uga sa palota i ai le atunu'u, fa'atasi ai ma le fautuaga na  tu'uina atu e le Komiti, ma filifilia ai loa le 'au fa'afiafia a le Kolisi Tu'ufa'atasi e fai ma sui o le atunu'u i le fa'amoemoe i Solomona,” o le saunoaga lea a Leala.

Saunoa Leala, i le fa'ai'uga o le  palota sa faia, na tula’i mai ai le 'au fa'afiafia a le Kolisi i le tulaga muamua, tulaga lua ia le 'au siva a le a'oga a Fa'asao/Marist, tulaga tolu le 'au siva a le StarKist Samoa, ae tulaga fa ai le 'au siva a le 'autalavou Ekalesia Metotisi mai Malaeloa.

“E le'i faigofie le palota e sa'ili ai se 'au siva e fai ma sui o le atunu'u, ma o ni isi o fautuaga sa tu'uina mai e aofia ai le tulaga lea, o isi 'au siva e mataina ma lelei tama'ita'i i le fa'atinoina o le siva, ae feoloolo ali'i, ae o isi fo'i 'au siva e lelei atu ali'i i le fa'atinoina o le siva nai lo tama'ita'i, ae i le tu'u fa'atasiga o fautuaga uma, na tula'i mai ai le 'au siva a le Kolisi, e le gata e lelei uma ali'i ae fa'apea fo'i ma tama'ita'i,” o le saunoaga lea a Leala.

O se fa'ata'ita'iga o lea manatu o le 'au siva a le StarKist Samoa, fai mai e matagofie le fa'atinoina e ali'i o le siva ae feoloolo le tama'ita'i.

O se tasi o 'au siva sa taula’i i ai le silasila a le komiti, o le 'au siva a Fa'asao/Marist, e fai o le matagofie o le fa'atinoina o le siva, ae tutusa uma fo'i tama ma teine le ola ma mata'alia i le fa'atinoina o le siva, ae na pau le fa'afitauli e pei ona saunoa Leala, o le to'atele o le fanau e laiti ma e faigata ona malaga i ni nofoaga mamao e pei o Solomona.

O le isi la'asaga lea o le a soso'o ai nei, o le galulue fa'atasi lea o le komiti ma le 'au siva ua filifilia i le toe fa'aleleia atili o a latou tapenaga, ina ia mautinoa e a'oa'oina ai ituaiga fa'afiafiaga talafeagai mo le fa'amoemoe.

O lo o i ai le fa'amoemoega e tatau ona to'a 50 le  aofa'i o le 'au malaga atoa lava e malaga i Solomona, e aofia ai le 'au siva ma i latou uma lava o le a tofu sao i le fa'atinoina o isi gaoioiga e fai ai ma sui o Amerika Samoa.