Ua taoto nei le faaiuga e pei ona tasi i ai le filiga a le Itumalo o Aitulagi/Leasina, ina ua maea se fonotaga sa faia i le malae i Siliaga i le afioaga o Aoloau i le faaiuga o le vaiaso na te’a nei, o le afioga ia Atualevao Sosene Asofia o le a avea ma Senatoa mo le Itumalo i le nofoaiga fou a le Fono Faitulafono o lo o soso’o nei.

I se faatalatalanoaga ma le afioga i le alii faipule o le itumalo, le tofa ia Maneafaiga Faoa i luga o le telefoni i le taeao ananafi, na faamaonia mai ai e le alii faipule le faaiuga o le fono a le Itumalo sa faia.

Saunoa Maneafaiga, e lei i ai se lavelave i le taimi o le fono a le Itumalo e saili ai tofi, ona o le isi lenei Itumalo ua maea ona taoto ona upu fai mo le faasologa o tofi i le Fono Faitulafono.

“O lea ua tasi nei le filiga o le afioga i le Tei o Fuimaono ia Atualevao o le a avea ma Senatoa o le Itumalo mo le isi nofoaiga o lo o sosoo nei,” o le saunoaga lea a Maneafaiga.

Saunoa Maneafaiga e faapea, o le tofi o le Itumalo e tuu faasolo, o Aasu lea o lo o i ai le tofi i le taimi nei, e pei ona i ai le afioga i le alii Senatoa ia Lualemaga Faoa, lea la ua see atu nei i luga i Aoloau e pei ona tofia ai le afioga ia Atualevao ma le fuafuaga afai ae maea Aoloau, ona oo atu loa lea o le tofi ia Aitulagi i Malaeloa.

“E faapena le faasologa o tofi o le Itumalo lenei, e le tauva poo ai e fia alu, e le finauvale foi se isi i le tofi, ae tuu faasolo lava i faasuaga ma faauluuluga o le Itumalo, o le mafuaaga foi lena e taoto lelei ai lava fuafuaga a le Itumalo i soo se taimi e saili ai ana tofi,” o le saunoaga lea a le alii faipule.

Na faigofie le fono a le Itumalo i le faaiuga o le vaiaso na te’a nei, ina ua autasi uma le afioaga o Aoloau i le afioga ia Atualevao e fai ma Senatoa o le Itumalo, ma talisapaia ai loa foi e le Itumalo atoa lea faaiuga.

O le afioga ia Atualevao o lo o avea ma Faalupega o le Itumalo i le taimi nei, peitai ina ua filfiilia o ia e avea ma Senatoa, ua tofia ai loa le afioga i le alii Faipule ia Maneafaiga e fai ma Faalupega o le Itumalo mo le isi 4 tausaga o lo o muamua.

Na faamaonia mai foi e Maneafaiga i le Samoa News le filifilia o ia e le Itumalo e avea ma Faalupega o le Itumalo.

O le isi laasaga o le a sosoo ai nei, o le saini lea o faauluuluga o le Itumalo e faamaonia ai le faaiuga ua latou faia, ona faamaonia lea e le Faalupega o lo o i ai nei, ma tuuina atu ai loa la latou faaiuga i le Ofisa o Mataupu Tau Samoa, ma se kopi i le Senate.

E na o le tolu Itumalo e oo mai i le taimi nei ua maea ona filifilia a latou Senatoa mo le nofoaiga fou, ma o ia Itumalo e aofia ai Manu’a #1, Vaifanua ma Aitulagi/Leasina.

O le afiafi ananafi na fono ai le afioaga o Pago Pago mo le sailia o se tasi e avea ma o latou Senatoa mo le isi 4 tausaga o lo o lumana’i nei.