Ua maea nei ona faia le ulua’i filifiliga a le afioga i le Kovana Sili Filifilia ia Lolo Matalasi Moliga, ma le afioga i le Lutena Kovana Filifilia ia Lemanu Peleti Mauga mo sui o le la Kapeneta i le nofoaiga fou mo le tausaga fou, e pei ona filifilia i ai le afioga i le Aloalii ia Afoa Moega Su’esu’e Lutu e avea ma Loia Sili mo le isi fa tausaga.

O le fonotaga a le komiti a Lolo ma Lemanu sa faia i le nofoaga autu i Matuu i le aso Lulu na te’a nei, na faalauiloa aloaia ai loa lenei faaiuga.

I le maea ai ona faalauiloa e Lolo ma Lemanu o le afioga ia Afoa, na saunoa ai loa Lolo e faapea, afai e i ai se isi tagata na te matua silafia le tulaga o lo o i ai le malo o Amerika Samoa, o le afioga lea ia Afoa.

Na taua e Lolo e faapea, “e matua talitonuina lava e maua ma Lemanu le afioga Afoa na te tauaveina le tofi Loia Sili, i le taimi sa ia tauva ai mo le tofi, o ia o se tagata e alofa, na te amanaia le atunuu, o se tagata foi ua sauni e galue mo le atunuu, o le mafuaaga lena na ma filifilia ai o ia i le tofi.”

“O se faaiuga sa faigata ona ma faia ma Lemanu, ona sa ma taumafai e saili se tagata e tuuina atu atoa o ia mo le galuega, o se tagata foi e tatau ona faamaoni ma naunau e fia galue, ae i le maea ai o la ma sailiga, na ma filifilia ai loa le afioga ia Afoa, o ia ua fetaui mo le galuega,” o le saunoaga lea a Lolo.

Ina ua fesiligia le afioga Afoa e tusa ai o le filifilia o ia i lenei galuega taua, sa ia taua ai lona faafetaia o Lolo ma Lemanu ona o le filifiliina o ia, ma ua ia sauni foi e tauave lenei tofiga taua ma galulue faatasi ma le nofoaiga fou mo le isi 4 tausaga.

Sa ia taua foi lona sauni lea e galulue faatasi ma loia sili lagolago atoa ai ma loia uma  o lo o galulue i le Ofisa o le loia sili.

“Ou te faafetai mo le filifiliina o a’u mo le galuega ma ua ou sauni ou te tautua ma galue mo le atunuu ma le malo o Amerika Samoa,” o le saunoaga lea a le afioga ia Afoa, lea foi sa avea muamua ma Loia Sili i le nofoaiga a le alii kovana o Kolumane.

O le afioga Afoa na lagolagoina malosi le faamoemoe o Lolo ma Lemanu ina ua maea le palota tele sa alo atu i ai le atunuu.

O ia o se alii loia mo le tele o tausaga, ma o lo o galue o ia i mataupu tau i fanua ma suafa matai, o ia foi o le Konesula mo le Republic of Korea i le teritori, o ia foi sa taitaia le komiti na iloiloina suiga o le Faavae.

O le 1997-2004 na avea ai o ia ma loia a le Fono Faitulafono; o le 1996-97 sa avea ai o ia ma loia faapitoa mo le Fofoga Fetalai; 1989-1992 sa avea ai o ia ma loia faapitoa mo le Peresetene o le Senate; o le 1992-1996 sa avea ai o ia ma faipule mo le itumalo o le Maoputasi #7 i le maota o sui.

O isi tautua ma agavaa o le afioga ia Afoa e aofia ai le avea o ia ma taitai mo loia i le Fono o le Faavae a Amerika Samoa i le 1986, sa avea foi o ia ma Faatonu mo mataupu a fanau laiti i le Kolisi Tuufaatasi. O le tausaga e 1975 na amata tatalaina ai lona ofisa loia tumaoti e pei ona galue ai seia oo mai i le taimi nei.

fa’aliliu Ausage Fausia