Na sologa lelei le aso o le sailiga tofi a le atunuu i le Aso Lua na te’a nei, e aunoa ma ni faalavelave tutupu, ae na faatoa vevesi lava ina ua uma ona lau le faaiuga o le palota, ina ua ripotia mai le tauai e ni isi o ni taavale i le afioaga o Nu’uuli.

Na taumafai le Samoa News e saili se atoaga o lea mataupu mai le Sui Komesina o Leoleo, peitai na faamaonia mai e le tofa Leseiau Laumoli e faapea, e moni sa i ai se faalavelave na tulai mai i Nuuuli ae o le itu e lelei ai e leai se isi na manu’a poo ni taavale fo’i na faaleagaina ai.

Saunoa Leseiau e faapea, na vave ona taunuu leoleo i Nuuuli ina ua ripotia mai le faalavelave, ona o le manatu ia puipui le saogalemu o le atunuu mai ni faalavelave e ono tutupu mai ai.

“O le itu taua la i latou vaavaai atu i ai, e ui lava na tulai mai lenei faalavelave i Nuuuli, ae le o se faalavelave matuia, e leai se isi na manu’a poo ni taavale foi ma ni meatotino na faaleagain ai,” o le saunoaga lea a Leseiau.

Na fai foi o ia ma sui o le afioga i le Komesina o Leoleo, le tofa Tuaolo M. Fruean e faafetaia ai le atunuu atoa i lo latou fesoasoani i le galuega a le matagaluega o leoleo sa feagai ai, i le puipuiina lea ma le tausia o le saogalemu ao alo atu ai le atunuu i lana palota.

Sa ia faafetaia foi pisinisi ma faleoloa uma i le atunuu, i lo latou usitaia lea o le tulafono e faasa ai ona faatau atu se ava malosi i le aso atoa o le palota.

Saunoa Leseiau, e le mafai e le Matagaluega ona faatino lana tautua pe ana leai le lagolago mai o le atunuu atoa.

E tusa ai o le faatonuga sa tuuina mai i luga o le Ofisa o le alii Komesina o Leoleo, o le Vaega o Leoleo Suesue latou te leoleoina le saogalemu o le nofoaga autu o lo o i ai le Ofisa o Palota i Tafuna, ae o le sdusuga ia Taloloioufaiva Captain John Cendrowski o le a faauluulu i ai le vaega e puipuia le saogalemu i luga o le alatele.

Na taua e le Taitai o le Vaega o Leoleo Suesue (CID) ia Commander Lavata’i Taase Sagapolutele e faapea, sa tulaga lelei gaioiga uma i le aso o le palota i le vaega sa latou tautua ai.

“Na amata mai lava i le taeao seia oo i le taimi na amata la’u mai ai pusa palota mai fale palota eseese i le atunuu, sa filemu mea uma i le nofoaga o lo o i ai le Ofisa Autu o Palota i Tafuna, leai se vevesi leai foi ni faaletonu na tulai mai ai,”

I luga o le alatele, e leai ni faalavelave matuia na tutupu mai ai, poo ni isi foi na taofia ona o le feoa’i onana i luga o le auala ma ave taavale, sei vagana ai lava se faalavelave lea na tupu ina ua solomuli atu le isi taavale ma so’a ai luma o le isi taavale sa paka i le vaega lava lea e tasi, e pei ona faamaonia mai e le tofa ia Taaloloioufaiva.

Saunoa Taaloloioufaiva, na pau lava le isi faalavelave na talosagaina ai le fesoasoani a leoleo, o gaioiga a tupulaga i le nofoaga autu a le vaega a Lolo Matalasi Moliga ma Lemanu Peleti Mauga i Matu’u, ina ua taufetuli solo tupulaga ma uu saini a Lolo ma Lemanu i luga o le alatele, ae o isi ua paka a latou taavale i luga o le auala, ae agai atu e faafeiloa’i sui tauva ina ua faatoa maea lava ona lau le faaiuga o le palota.

Saunoa Taaloloioufaiva, e ui sa manino le mafuaaga o gaioiga a tupulaga talavou, o le faailoa lea o le fiafia ina ua manumalo le latou vaega, peitai e le saogalemu gaioiga sa latou faia ona sa taufetuli solo i luga o le auala ao feoa’i taavale.

E ui la i nai faalavelave laiti na tutupu mai, o le aotelega atoa lava ia o le aso o le palota na mavae atu nei, e leai se soifua na maimau poo ni isi foi na manunu’a i ni faalavelave matuia.