Fiamalamalama Faipule tulaga o lo o i ai tupe a le malo

O le itula e 8:30 i le taeao o le aso Tofi o le vaiaso nei lea ua fa’atulaga e feiloa’i ai le Komiti o le Paketi a le maota o sui ma le Teutupe a le malo, mo le fa’amalamalamaina o ni isi o mataupu tau tupe o lo o fia malamalama i ai afioga i faipule.

 

O lea iloiloga na fa’atulaga e le taitaifono o le komiti o le paketi a le maota o sui, le afioga i le ali’i faipule ia Timusa Tini Lam Yuen, i le mae’a ai lea ona fesiligia e ni isi o sui mamalu o le maota mataupu e faatatau i lo latou fia malamalama lea i tupe maua a le malo; o le tulaga i le paketi a le malo; tulaga o lo o i ai nonogatupe a le malo o lo o tau totogi; aemaise ai le mataupu o lo o tula’i mai pea i ovataimi o tagata faigaluega.

 

Saunoa le afioga Timusa e faapea, e le mafai ona malamalama le maota i tulaga o tupe a le malo se’i vagana ua aami le teutupe faatasi ai ma le faaatonusili o le paketi ina ia o’o atu i luma o le komiti latou te fetufaa’i i le tulaga o tupe a le malo.

 

O le afioga i le teutupe ia Falema’o Phil Pili o le a to’alua ma le faatonusili o le ofisa o le paketi ia Catherine Aigamaua-Saelua i le taimi o le iloiloga a le maota o sui.

 

O le vaiaso na te’a nei na lagaina ai e ni isi o faipule mataupu e pei ona taua i luga aemaise ai le tulaga o lo o i ai tupe a le malo, ma o latou taua ai le leai o se ata manino o lo o faailoa mai e mafai ona foia le tulaga i ova taimi a tagata faigaluega.

 

Na taua e le afioga i le ali’i faipule ia Taotasi Archie Soliai e faapea, talu ai o lea ua latalata mai le taimi o le paketi, e tatau i le malo ona latou tu’uina muamua mai i le fono ripoti i tulaga o tupe maua faalotoifale, ma aumai se tulaga sa i ai tupe na ao e le malo i kuata tupe ua tuana’i atu, ina ia faa faigofie ai ona malamalama faipule i le tulaga tonu e tatau ona taoto ai tupe a le malo i le taimi e fesiligia ai le paketi.

 

“E le mafai ona tatou iloiloina le paketi a le malo o le a tuuina mai pe afai tatou te le malamalama i le tulaga o lo o i ai tupe maua a le malo i kuata taitasi ua mavae atu, o iina fo’i e tatau ona faavae ai se faaiuga i le paketi pe a talanoaina,” o le saunoaga lea a le ali’i faipule mai Ituau.

 

O le finagalo fo’i lea o le afioga i le ali’i faipule ia Larry Sanitoa e faatatau i ripoti o tupe maua a le malo, ina ia vave tuuina atu i luma o le maota e faitau ma auiliili e faipule a’o le’i tu’uina atu le paketi e talanoaina.

 

Na taua e ni isi o faipule lo latou le toe fia vaai i ni isi o faaletonu sa tula’i mai i le taimi e talanoaina ai e le fono paketi a le malo i tausaga ua mavae atu, e oo ane lava i le taimi e iloilo ai le paketi e le’i tuuina atu lava ni ripoti i tulaga o tupe a le malo o lo o i ai.

 

O lo o fia malamalama fo’i ni isi o faipule i le tulaga i ova taimi o tagata faigaluega a le malo, pe aisea ua faalogoina so’o ai pea lea faaletonu a’o lea ua maea ona pasia e le fono le pili e totogi ai ova taimi a tagata faigaluega.

 

O le mataupu i ova taimi na fesiligia fo’i e ni isi o senatoa i le vaiaso na te’a nei, ma o latou taua ai le tatau lea ona o’o atu le Teutupe a le malo e fai atu sana fa’amatalaga e tusa ai o lenei mataupu.

 

Na taua e afioga i ali’i senatoa ia LeAtualevao S. Asifoa ma Soliai Tuipine Fuimaono i le aso Tofi na te’a nei e faapea, e tatau ona faamanino mai e le malo le mataupu i ova taimi a tagata faigaluega, pe aisea ua totogi ai isi ae le o totogiina ova taimi a isi e ui o lea ua pasia e le fono le paketi faaopoopo a le alii kovana e $5 miliona e faatupe ai ni isi o manaoga tau tupe a le malo e aofia ai ma ova taimi a tagata faigaluega.

 

O le amataga o le tausaga nei na taofia ai e le alii kovana ia Lolo Matalasi Moliga matagaluega ma ofisa uma a le malo mai le toe faia o ni ova taimi a tagata faigaluega, se’i vagana o ni ova taimi e fa’ataga atu e le ofisa o le kovana.

 

Sa ia fautuaina fo’i ni isi o Ofisa a le malo o lo o mafuli i ai tulaga o ova taimi e pei o le Ofisa o Femalagaaiga ma le Ofisa o Tiute ina ia fa’a faigaluega ni isi tagata faigaluega fou e fa’atumu ai avanoa o lo o mo’omia, ma taofia ai le toe galulue ova taimi o ni isi o tagata faigaluega.

 

O le agaga o le alii kovana e pei ona ia faailoa i lana kapeneta, afai e ave tupe o lo o totogi ai ova taimi a ni isi o tagata faigaluega e faa faigaluega ai ni isi tagata faigaluega fou, o se tulaga lelei lea i lona manatu, aua o le a maua ai fo’i e isi tagata le avanoa e faigaluega ai ma maua tupe e tausi ai o latou aiga aemaise ai o le fesoaosani i le atina’e o le malo.

Comment Here