Ads by Google Ads by Google

Fiailoa Kruse tu’utu’uga tatala ai pagota tua faigaluega

I le toe tolopo ai o le lauina o le fa’asalaga a le ali’i o Filipo Ioane Tavita i le aso 10 Iulai 2014, e le gata ua poloaina ai e le fa’amasinoga fa’amaumauga e fa’atatau i moliaga na ta’usala muamua ai lenei ali’i, ae ua talosagaina fo’i e le ali’i fa’amasino ia Michael Kruse le itu a le malo, ina ia fa’amanino atu aiaiga o le polokalame lea e tatala ai pagota i tua e faigaluega a o tuli a latou fa’asalaga.

 

E mafua lea tulaga, ona o le mataupu lea ua sauni le fa’amasinoga e fa’asala ai Tavita, na alia’e mai i le taimi na tatala ai o ia i tua e faigaluega ao tuli ai lana fa’asalaga fa’afalepuipui i le fa’aiuga o le tausaga na te’a nei, ina ua toe fo’i atu i totonu o le falepuipui ae maua ai e leoleo o le toese se sikaleti mariuana ia te ia.

 

“E fiamalamalama le fa’amasinoga pe fa’apefea ona fa’atulaga aiaiga e tatala ai pagota i tua e faigaluega ao tuli a latou fa’asalaga, ae aisea fo’i ua tula’i so o mai ai le fa’afitauli lenei o le taumafai o pagota o lo o tatala i polokalame nei e fa’aulufale fualaau fa’asaina i totonu o le toese”, o le saunoaga lea a Kruse i le loia a le malo o Tony Graf.

 

I ni nai masina e le i mamao atu, na fa’asala ai e le fa’amasinoga ni ali’i se to’alua i le moliaga o le umia fa’asolitulafono lea o vaega o le fualaau fa’asaina o le mariuana, e mafua mai ina ua maua e leoleo o le toese ni sikaleti mariuana i o la tino, i le taimi na toe fo’i atu ai i totonu o le toese.

 

E ese mai i le taumafai e fa’aulufale fualaau fa’asaina i totonu o le toese, e to’alua isi ali’i pagota o lo o fa’agasolo a laua mataupu fou i luma o le fa’amasinoga maualuga i le taimi nei, ona o tu’uaiga i lo la le usitaia lea o aiaiga o le polokalame sa tatala ai i laua i tua e faigaluega, ina ua maua ane e le malo e ese nofoaga sa la aga’i i ai i le taimi na tatala ai laua i tua e faigaluega.

 

Na taua e Kruse i le masina na te’a nei ina ua ia fa’asala e le fa’amasinoga ali’i e to’alua ia na ta’usala i lo la umia fa’asolitulafono o vaega o le fualaau faasaina o le mariuana ina ua toe fo’i i totonu o le toese e faapea, e tatau ona i ai ni aiaiga mautu a le ofisa o leoleo e puipuia ai pagota o lo o agavaa i le polokalame lea e tatala ai i tua e galulue ma toe fo’i i totonu o le toese.

 

E talitonu le fa’amasinoga, afai e fa’atamala le pulega o le falepuipui e fa’amalosia le tulaga lea, lona uiga o le a avea pea lea ma faafitauli i le lumana’i.

 

Na taua e le Komesina o Leoleo ia William E. Haleck i le Samoa News i le vaiaso na te’a nei e fa’apea, talu mai fa’afitauli e pei ona atugalu i ai le fa’amasinoga, ua matua malosi i le taimi nei puipuiga a le pulega o le falepuipui, ina ia mautinoa e le toe tula’i mai fa’afitauli nei i le lumana’i.

 

Na fa’amatala e Haleck e fa’apea, o fa’afitauli nei na tula’i mai i le fa’atamala o leoleo o le toese e fa’atino a latou tiute, ma ua fautuaina i latou ina ia fa’amaoni i so o se auala e fa’atino ai a latou tiute.

 

O le aso 5 Tesema 2013 na fa’asala ai e le fa’amasinoga fa’aitumalo ia Tavita e taofia i le toese i Tafuna mo le 90 aso, ina ua ta’usala o ia i le moliaga mamafa o le ave ta’avale a o se’i le laisene, e mafua mai lea ina ua ta’usala o ia i le moliaga o le ave ta’avale ‘ona.

 

E tusa ai o fa’amaumauga a le fa’amasinoga, o le fa’atolu ai lea ona ta’usala Tavita i le moliaga o le ave ta’avale ‘ona.

 

Na taua e le itu a le malo e fa’apea, ina ua taofia Tavita i le toese, sa agava’a o ia  i le polokalame lea e tatala ai pagota i tua e faigaluega, i lalo o le vaavaaiga a le Pule o le Falepuipui.

 

I le aso 31 Tesema 2013, na tula’i mai ai loa le fa’alavelave fou lea e pei ona ta’usala ai Tavita, ina ua maua e leoleo o le toese i lona tino se sikaleti mariuana na taumafai e fa’aulufale fa’asolitulafono i totonu o le toese.

 

Na fa’atoese le ua molia i le fa’amasinoga e tusa ai o lana solitulafono sa faia, ma ia talosagaina ai se avanoa e tatala ai o ia i tua e saili ai ana galuega e tausi ai lona aiga.

 

Na talosaga le loia a Tavita o Douglas Fiau i le fa’amasinoga ina ia fa’asala le ua molia i le toese mo le umi e 8 masina, ina ia maua ai le avanoa e vave tatala ai o ia i tua e saili sana galuega e tausi ai lona aiga, peita’i na finau le loia a le malo ia Graf ina ia fa’asala le ua molia i le toese mo le 18 masina, faapea ai ma le salatupe e $500.

 

Ina ua mae’a ona iloilo e ali’i fa’amasino fa’afinauga a loia atoa ai ma le ripoti a le ofisa faanofovaavaaia e uiga i lenei mataupu, na manatu ai loa ali’i fa’amasino o le a toe tolopo le lauina o le fa’asalaga a Tavita, ae se’i aami muamua lana faila o lo o i luma o le fa’amasinoga fa’aitumalo, se’i vaavaai ali’i fa’amasino pe fia avanoa sa tuu atu e le fa’amasinoga i lenei ali’i, ae pe sa i ai fo’i se lesona aoga na maua mai taimi na molia muamua ai o ia i luma o le fa’amasinoga.

 

O lo o taofia pea Tavita i le toese e fa’atali ai le aso lea ua fa’atulaga e lau ai lona fa’asalaga.