O le a’oga tulaga lua i Aua, lea ua amatalia ai ona fa’atautaia le Polokalama “Fanau Ia Ola Maloloina!” O se gaoigaoiga e fa’atautaia so’ofa’atasi e le Iunivesite o Hawaii i Manoa ma le ASCC Land Grant Polokalama a le CNR i lalo o le va’ava’aiga toto’a a le susuga Aufa’i Areta Ropeti ma lana aufaigaluega e silia ma le to’a 10, ua latou fa’amautu fa’amaumauga tatau mo le fa’atautaiga mae’amae’a o lea polokalama.“E muamua lava ona fa’amatala i Matua le polokalama ma sona aoga i le soifua tuputupu a’e o le fanau i lo tatou atunu’u, fa’atasi ai ma se a’afiaga o lea ituaiga o a’oa’oga tamau mo le soifua mulimuli mai o fanau, ua tagata matutua! O le fa’aitiitia o le tino puputa e avea o se ala e mataala ai le fanau, ma e agava’a ai mo le tele o nisi galuega i le lumana’i e aunoa ma ni lagona fa’aituau!” O se fa’amatalaga lea a le ali’i o faia le a’oga mo matua, Aufai Areta Ropeti.Ua fa’ailoa mai nei, o Aua lea ua ulua’i fa’atautaia ai lea galuega fa’atino aoga, peita’i ua fa’atulaga mai e le Iunivesite i Hawaii e ao ina maua mai Aua le aofai e 180 tamaiti e fa’aulu ma faia ai fa’amaumauga. Ua mae’a fa’atautaia le polokalama i le vasega ECE, ma ai le aofaiga’i e 54, ua mae’a fo’i le vasega Level K5 maua ai le aofaiga e 30, peita’i o le aso ananafi ua amatalia ai le vasega Level 1 ma ua silia fo’i ma le 30 i latou ua mae’a pasia le vaega muamua, aua o le sapaia ia e matua o lea a’oga o le polokalama lenei mo latou alo.“O se mea lelei le naunau mai o Matua, ma e tatau lava fo’i ona taga’i toto’a i matou ua mulimulita’ia le fa’ata’atiaga o le polokalama i tulaga o le aia tatau a matua ma fanau mai lava i le amataga, se’ia o’o ina mae’a le polokalama lenei.” O se isi lea toe fa’amanatu mai a le susuga Ropeti.O lo ua toe malaga mai Marie o le UH Manoa, ina ia toe taga’i toto’a i ala ua fa’atautaia ai le Polokalama i lona amataga, o lenei fo’i se tasi o polofesa o le polokalama i lona fa’atautaia ai i Hawaii, ae ua matua maofa o ia i le tele o le sapaia e matua i Aua o lenei taumafaiga aoga mo le soifua maloloina o latou fanau.“O le aoga sili lava mo matua, o le a’otauina lea i le fuaina o mea’ai a le fanau ma toe fa’amaumau, pe afai e mae’a nei a’oa’oga, o le a pule le matua pe fa’aauau ai lona faia fa’apea o isi fanau e toe tutupu mai, pe leai, ae o le a iloa lelei ai, aga e tatau ona faia e matua, ia le toe so’ona fafaga le fanau, ae o le fafaga ia ola maloloina e sili lea!” Ina ua fesiligia Marie mai le Iunivesite i Hawaii e tusa ai o fa’amaumauga ua o’o atu ma ua va’ai toto’a i ai i latou le Ofisa ulu o le polokalama, ae ua ia fa’ailoa mai, “O se galuega lelei ona fa’atautaia, o le aoina fo’i o fa’amaumauga e aoga tele mo sailiga o lo’o fa’atautaia i lenei polokalama, ma ua iloa patino ai, e le o fa’atamala lava le aufaigaluega nei i o latou tiute fa’atino, ae o lo’o lelei ona fa’asolo atu fa’amaumauga nei i le matou fo’i itu.” O le tele o nei fa’amaumauga e mua’i taga’i toto’a i ai le taiulu o le ASCC Land Grant CNR ma ona vaega uma, le susuga le Fa’atonu Tapa’au Daniel Aga, e toe siaki a’o le’i fa’ao’o atu i fafo mo le fa’amauina tumau o nei mea uma!