Ads by Google Ads by Google

Fiafia aveta’avale i le toe pau tau o le kesi, suau’u

Na faaalia le fiafia o le to’atele o le au fai ta’avale afi i le atunuu aemaise ai lava ave pasi ma taxi, ona o le suiga tele ua i ai le tau o le kesi ma le suau’u i le taimi nei.

Na taua e isi le avea o le pau o le tau o le kesi ma le suau’u o se faamama avega i le taimi faigata o loo i ai le tamaoaiga, ae o nisi na taua o le pau o le tau o le kesi ma le suau’u ua faasao mai ai se tasi o vaega tupe tele sa faaalu e tagata e utu ai a latou taavale, poo le totogi ai foi o pasese i pasi ona ua faatutu taavale i le fale talu ai ua le gafatia le tau o le kesi.

“O se faamama avega lelei lenei mo si o tatou atunuu aemaise lava matou le aufai taavale la’upasese, ona o taimi uma o le aso e fealua’i ai la’u pasi ma ou te iloa o isi lava aso e tele atu le kesi e alu e fealua’i ai nai lo le kesi o loo alu ma maua mai ai pasese,” o le tala ata lea a le alii ave pasi o Anetele’a Lavata’i o Aua.

Ae na taua e Tommy Apulu, o se alii e malaga mai i Lauli’i ae faigaluega i Tafuna, o nisi o aso e tu ai lana taavale i le fale ae alu i le pasi i lana galuega, pe afai ua le lava le tupe e utu ai le kesi, peitai o le pau i le tau o le kesi, e le gata o le a sefe mai ai le $6 lea e totogi mo lana pasese i le pasi, ae o le a maua ai foi ma le avanoa e toe ti’eti’e ai i lana taavale i lana galuega.

“O isi taimi ua tau leai ni tafaoga mo le aiga e faia ona ua taugata le kesi, ua na o le fale lava ma le fale faigaluega, ae atonu o le a maua se isi avanoa e ti’eti’e ai ma matamata i mea o loo tutupu i isi itu o le tatou motu nei, “ o le saunoaga lea a Ruta Finau mai Tafuna.

O nisi na fesiligia e le Samoa News, sa latou taua e faapea, ua avea le umi o sii maualuga le tau o le kesi ma le suauu ma itu ua masani ai le au fai taavale afi i le tau o oloa ia, ae o le suiga lea ua maua mai o se faamama avega mo tagata uma.

Na lolofi le to’atele e utu a latou taavale i pamu kesi eseese i le atunuu, ina ua latou maua le tala ua pau le tau o le kesi.

I se pepa o faamatalaga na tuuina mai i le Ofisa o loo vaavaaia le suau’u a Amerika Samoa, na taua ai le pau e .24 sene i le kalone kesi ma le suau’u, ma ua atagia mai ai le faaitiitia foi o le au o ia oloa mo le masina lenei o Iulai.

E $4.18 i le $4.19 le tau o loo faatauina ai le suauu ma le kesi i pamu kesi i le taimi nei, peitai na taua e Sione Kava, e tatau ona pau i le $3.49 i le kalone, ae mo suauu vaalele, vaa fagota atoa ai ma le karasini, e $3.48 e tatau ona faatau atu ai, tusa lea e .21 sene ua faaitiitia mai ai i le tau tuai sa i ai i le masina na te’a nei.

Na taua e le susuga Kava, o le faaitiitia o le tau o le kesi ma le suauu e mafua mai i le faaitiitia lea o le tau o loo faatauina ai le kalone suauu i le lalolagi i le taimi nei, ma le $137 i le $90 e pei ona i ai, e le gata i lea, ua faaitiitia foi le manaomia o le suauu i maketi tetele o le lalolagi e aofia ai Saina ma Initia ona o le tulaga vaivai ua i ai le tamaoaiga.