Fia vaai Kruse i latou na aumaia Maiava i le atunuu

Ua poloaina e le Fa’amasino Sili ia Michael Kruse le aami o i latou uma sa talosagaina pemita e ulufale mai ai Pelenato Maiava i le teritori, ina ia auai i le isi iloiloga lea ua fa’atulaga e faia i le aso 26 Aokuso 2015.

 

“O i latou uma lava sa talosagaina pemita e ulufale mai ai le alii lea (Maiava) i le teritori, o i latou na ou te fia vaai i ai i le isi iloiloga lea o le a sosoo o le mataupu lenei,” o le saunoaga lea a Kruse, ae na fa’ailoa atu e le loia a le malo ia Mitzie Jessop-Ta’ase e fa’apea, o loo i totonu o le lisi sa tuuina atu e le malo suafa o i latou nei, ae ma tali Kruse, “Ou te fia vaai i o latou foliga.”

 

O le taeao ananafi na toe valaau ai i luma o le fa’amasinoga maualuga le mataupu a Maiava, lea na tolopo mai i le masina a te’a nei, ona o ni isi o fa’amaumauga sa fia manino atili i ai le fa’amasinoga.

 

Ao fa’agasolo le iloiloga o le mataupu a Maiava ananafi, na fa’ailoa e Kruse i molimau sa fa’atauto i luma o le fa’amasinoga fa’apea ai ma loia, e foliga mai ua matua nenefu le faamasinoga i le eseese o faamatalaga o loo tuuina atu e i latou o loo fesiligia e uiga i lenei mataupu.

 

O le to’atele o tagata ua mae’a ona fesiligia e le fa’amasinoga i le mataupu a Maiava talu ona amata mai, e aofia ai le Pulesili o le Ofisa o Femalagaaiga ia Peseta D. Fuimaono ma ni isi o ana tagata faigaluega, atoa ai fo’i ma le Pulesili o le Vaega o Fa’amaumauga (I.T. Manager) a le Ofisa o le Loia Sili ia Ken Dalle.

 

“E na o le lua lava fesili tetele o loo naunau le fa’amasinoga na te fia iloa mai le mataupu lenei, o le fia iloa lea poo ai na mafua ai ona toe ulufale mai le alii lea na ta’usala i lona faia o uiga mataga i se teineititi talavou, atoa ai ma le isi fesili, poo le a se gaioiga a le fa’amasinoga e faia ina ia foia ai le toe tula’i mai o lenei fa’afitauli i le lumana’i,” o le saunoaga lea a Kruse i luma o loia ma molimau ananafi.

 

Ina ua mae’a le saunoaga lea a Kruse, sa ia fa’asaga i le itu o loo nonofo mai ai Maiava ma lana loia fautua ia Douglas Fiaui ma fa’ailoa i ai e fa’apea, “E lua fa’aiuga o loo filifili le fa’amasinoga e tatau ona faia i le mataupu lenei, o le fa’aleaoga o le nofovaavaaia a Maiava ae poloa’i o ia e tuli le vaega o loo totoe o lana fa’asalaga i le falepuipui, poo le vaavaai i se auala e taofia ai le toe tula’i mai o le fa’aletonu lenei i le lumana’i.”

 

E tusa ai o le kalena a le fa’amasinoga, o ananafi lea sa fa’atulaga e tuu atu ai se fa’aiuga a le fa’amasinoga fa’asaga ia Maiava, i le mae’a ai lea ona ta’utino le ua molia i le masina na te’a nei, ua ia le usita’i i tuutuuga o lana nofovaavaaia, e fa’asa ai ona ia toe ulufale mai i totonu o le teritori.

 

Na fesili Kruse ia Fiaui pe mana’o e tu’u atu loa le fa’aiuga a le fa’amasinoga fa’asaga ia Maiava ananafi, pe faatali se’i uma le isi iloiloga lea ua fa’atulaga i le aso 26 Aokuso, ae na tali Fiaui, o le a fa’atali se’i uma le iloiloga lea ua fa’atulaga mo le masina fou, ona o loo i ai ana fesili e fia fesiligia ai isi molimau lea ua fuafua le fa’amasinoga e aami, e fa’atatau lava i lenei mataupu.

 

O Maiava na ta’usala e le fa’amasinoga maualuga i le 2011 i lona faia o uiga mataga i se teineitiiti e laititi i lalo o le tulafono, ma poloaina ai loa o ia na te tuua le teritori pe a mae’a ona ia tulia masina e 20 i le falepuipui, o se tasi lea o tuutuuga o lana nofovaavaaia e 5 tausaga.

 

O tu’uaiga fa’asaga ia Maiava i lona faia lea o ni gaioiga e save’u ai le nonofo filemu o tagata lautele i le amataga o le tausaga nei, na mafua ai loa ona alia’e mai lenei mataupu.

 

O loo taofia pea Maiava i le toese i Tafuna e fa’atali ai le isi ana iloiloga i le ao 26 Aokuso.

Comment Here