Ads by Google Ads by Google

Fia manino Kruse i le teuina o mea molimau i le ofisa leoleo

I le lauina o le faasalaga o Reupena Siaulaiga i le aso ananafi, na fesiligia ai e le alii faamasino sili ia Michael Kruse le loia a le malo ia Kimberly Hyde, po o ai o lo o vaaia le potu o lo o teu ai mau faamaonia a le malo i le Ofisa o Leoleo i Fagatogo.

 

O Siaulaiga ua ta’usalaina i lona umia faasolitulafono o ni vaega o mariuana.

 

O le Aso Gafua na te’a nei na tuu e lau ai le faasalaga a Siaulaiga, ae talu ai e le’i maua e le faamasinoga se ripoti i le aofaiga o mariuana o lo o tuuaia na maua ia te ia, na toe tuu mai ai lana mataupu i le aso ananafi, lea sa maua ai le avanoa o le alii Leoleo ia Lt. Pele Uia na te tauaao atu ai se vaega o mea molimau o lenei mataupu i luma o le faamasinoga.

 

Na fesiligia e Kruse i le alii Leoleo po o ai o lo o vaaia le potu o lo o teuina ai mea molimau a le malo i le taimi nei, na tali le alii leoleo, o ia.

 

Na toe fesili Kruse pe ua i ai se ripoti e faatatau i se suega sa faia i mariuana ia na maua i le ua molia, ae na tali Lt. Pele, e leai, ona o le ripoti lena e tatau ona maua mai i le alii Leoleo ia Capt. Paulo Peau Leuma, o ia lena sa ia tuuina atu i ai mariuana mo le auina atu i fafo e fai i ai suega.

 

(O Capt. Leuma o lo o faauluulu i ai le Vaega o lo o gafa ma le suesueina o mataupu tau i Fualaau Faasaina i le Ofisa o Leoleo.

 

O le aso 6 o Fepuari, 2013 na taua e Lt. Pele i le faamasinoga na aveese mai ai mariuana mai totonu o le potu o lo o teu ai mau faamaonia a le malo ma tuu atu ia Capt. Leuma mo le auina atu i fafo mo suesuega.

 

Ae na fa’aailoa mai e Leuma i le Samoa News i le aso ananafi, o lo o ia faatalia pea se ripoti mai i fafo, i le faaiuga o a latou suesuega i fualaau faasaina.

 

Na ta’ua e Kruse e faapea, a’o le’i ulufale mai i le teritori ma avea ma loia i le Ofisa o le Loia Sili, sa i ai ni faafitauli na tulai mai i le potu o lo o teu ai mau faamaonia a le malo, e pei o le savavali o mau faamaonia mai totonuu o le potu.

 

“O le alii lea sa ia vaaia muamua le potu e teu ai mau faamaonia a le malo, na faasala e le faamasinoga i le falepuipui ona o ni mataupu na tulai mai i taimi ua te’a, ma o le isi lena mafuaaga o lo o atugalu ai le faamasinoga i le mataupu lenei,” o le saunoaga lea a Kruse.

 

O le aso Faraile nei lea ua toe faatulaga i ai le iloiloga o lenei mataupu, i lalo o se poloaiga a le faamasinoga, ina ia oo mai se sui o le Ofisa o Leoleo e faamatala i le faamasinoga le tulaga ua i ai mariuana sa ave i fafo mo suesuega, ma ua maua e le Samoa News se faamatalaga, o le susuga a Capt. Leuma lea ua sauni e molimau e uiga i lenei mataupu.

 

E 5 tausaga na manatu le faamasinoga e faasala ai Siaulaiga i le falepuipui i Tafuna, peitai o le a faamalumalu lea faasalaga, ae nofovaavaaia o ia mo le 5 tausaga i lalo o tuutuuga a le faamasinoga, e aofia ai lona totogia o se salatupe e $2,000, faasa ona ia toe tagofia le pia po o fualaau faasaina.

 

Ua poloina foi o ia ina ia auai i ni aoaoga e faamalamalama ai aafiaga o le leaga o fualaau faasaina, ma, o le a mafai ona suesueina ana meatotino i soo se taimi e pei o lona fale, taavale ma lona tino atoa e leoleo poo sui o le Ofisa nofovaavaaia, ina ia faamaonia ai na te le o toe tagofia ni fualaau faasaina.

 

E 12 masina le umi na manatu le faamasinoga e loka mo’i ai Siaulaiga i le toese, peitai o lea faasalaga o le a taofi lona faataunuuina, ae ua lava le umi lea ua maea ona loka ai o ia i le toese e fai ma ana faasalaga mo lenei mataupu, tusa lea ua silia ma le 4 masina.