Na aofia i iloiloga a le Senate i le vaiaso nei, ia le mata’upu, i se polokalama a le falema’i, o lo o i ai nei, e mafai ona fesoasoani i aiga e vaivai le tamaoaiga, aua le totogia o pili falemai.

O lea polokalama na amata mai i le 2006, ma ua tele foi taimi na fa’ailoa atu ai e  le pulega a le falemai i luma o le Fono i taimi e faia ai iloiloga, ona o ni isi o mataupu e fia malamalama i ai le Fono mai le falema’i.

Na taua e Senatoa Velega Savali Jr e fa’apea, ana le alu lava i le falemai i le fa’ai’uga o le vaiaso na te’a nei, na te le iloa le polokalama o lo o fa’aaoga e le falemai, lea e ta’ua o le “sliding scale program”.

Na fa’amalamalama e Velega i luma o le maota e fa’apea, o le polokalama lea a le falemai e taua i le gagana  faasamoa o le “papa faase’e”, ma e le gata e fou i lana fa’alogo, ae e le malamalama ai foi, ona e foliga mai o se polokalama e fesoasoani ai i tagata e vaivai le tupe maua.

Na umi se taimi na fa’aalu e le alii Senatoa e tau fa’amalamalama ai le uiga moni o le polokalama i luma o le maota, atoa ai ma lona fa’ailoa atu i ai o kopi o se ripoti mai le falemai e uiga i lea polokalama, fa’atasi ai ma lana saunoaga, o se polokalama taua tele lea ua faia e le falemai mo le atunu’u.

Ae na saunoa le afioga i le alii Senatoa ia Fuata Dr. I’atala e fa’apea, e ui e aoga le polokalama lea mo aiga e vaivai le tamaoaiga, peitai o le mea moni, e le mafai ai ona taofia le fa’afitauli lea ua tulai mai i le falemai, o le sauni lea o le pulega e vaea nisi o ana tagata faigaluega.

“E ui i le taua o le polokalama, peitai e le avea lea ma itu e taofia ai le vaea o fomai ma teine tausima’i, aua e ui o lea ua folafola mai e faamamaluina lea fuafuaga i le aso 19 Fepuari, ae o le taimi lava e faataunuu ai le faamalolo o fomai ma teine tausima’i, o lona uiga o se falema’i muamua lea o le a leai ni fomai tipi tipi, sei vagana ai le isi vaega o fomai lea e galulue  pe afai e valaaulia i latou mo se manaoga faapitoa, pau ia o fomai e mafai ona galulue mo le falemai,”  o le saunoaga lea a Fuata.

Pau le fa’afitauli e pei ona taua e Fuata, afai e tiute le fomai lea ua vala’au mai mo se manaoga atoa mo le 24 itula, ae na o le 19 minute sa ia vaaia ai le tagata ma’i, o lona uiga e na o le 19 minute e totogi ae o le isi taimi atoa lea e tiute ai e le maua.

Na fa’amanino e le afioga i le alii Senatoa ia Galeai Tuufuli e fa’apea, e i ai le malosi o le alii kovana na te suia ai le komiti faafoe pe afai o lona finagalo lea e pei ona ia faailoa, ae le mafai ona ia suia le Pulesili leaga o lea ua maea ona saini le konekarate.

Na faamanino e Senatoa Paogofie Fiaigoa i luma o le maota e faapea, o le polokalame lea a le falemai o le LBJ e na o tagata mai fafo lava e agavaa ai, peitai na saunoa le alii peresetene ia Gaoteote Palaie Tofau e faapea, talu mai le tausaga e 2011, ua aofia ai foi ma tagatanuu o Amerika Samoa i le polokalame lea.

Mo se faataitaiga o le polokalame, afai e tusa ma le $4,000 le tupe maua a le tagata ma’i e maua i lona totogi i le tausaga,  ae toatasi le tagata o lona aiga o loo tausia, o lona uiga e totogi e le tagata lea le 10% o lana pili o le falemai, ae afai e silia ma le $9,000 le tupe maua a le tagata ma’i i le tausaga, ae toatasi le  tagata o lona aiga o loo tausi, na te totogiina le 75% o lana pili mai le falemai, ae afai loa e ova  atu ma le $11,000 i le tausaga le totogi a le tagata ma’i, ae toatasi foi le tagata o loo ia tausia, e totogi uma e le tagata lea le 100% o le pili mai le falemai.

O lo o taua i le ripoti mai le LBJ e faapea, o le masina o Oketopa 2011 na toe fai ai e le falemai suiga i lana polokalame lea, ma aofia ai loa tagata mai fafo faapea  ai ma tagata nofomau i Amerika Samoa.