Ads by Google Ads by Google

Fia malamalama pea Faipule i tupe fa’asili a le ASPA

Ono o’o le mata’upu a le Fono ma le ASPA i luma o le fa’amasinoga

Na fa’aalia e le Sui Fofoga Fetalai ia Talia Faafetai Iaulualo i le iloiloga a le Fono mo le Paketi a le ASPA e fa’apea, afai e maua e le ASPA ni a latou tupe fa’asili mai le fa’atauina atu o le suau’u i le atunu’u, e tatau ona toe fa’asoa atu e fa’aitiitia ai le tau o le eletise, ae le o le fa’atupe ai o a latou ponesi, ona o lea e oi le atunuu.

I le ripoti o tupe fa’aalu mo le kuata muamua a le ASPA lea ua i luma o le Fono, o lo o manino mai ai le aofa’iga e $772,000 o tupe fa’asili na maua e le ASPA mai le fa’atauga o le suauu.

O le fa’anaunauga o le ASPA i le taimi na o latou fa’atautaia le fa’atauga o le suau’u, ia mafai ona o latou maua se tupe fa’asili, peitai e ui o lea ua manino i a latou ripoti na fa’amanino e le Teutupe a le ASPA o Susana Faiivae, e le o se tupe fa’asili lea pe a latou fa’aigoaina, ona o lea ua toe alu uma e totogi ai le latou aitalafu o lo o i le faletupe  o le ANZ.

E tele nisi galuega o lo o galulue i ai le Fono mo le paketi a le ASPA, ina ia mautinoa e sa’o ma atoatoa fa’amaumauga, a’o le’i tu’uina atu le pili tupe lea ua fa’aulu e le Fono e fa’aauau ai le paketi a le ASPA mo le isi 6 masina.

Na manino i saunoaga a taitai o le fono i le taeao ananafi, o le autu moni lava ua taumafai ai le Fono e fa’asa’osa’o uma fa’amaumauga ma numera o lo o i totonu o le pili tupe lea na fa’aulu i le fono i le vaiaso nei, ina ia aua ai ne’i i ai se isi fa’aletonu i le fuafuaga a le Fono lea ua ta’oto, mo le tu’uina atu o se tagi i luma o le Faamasinoga Maualuga, e saili ai po o ai tonu e tatau ona pasia le paketi a le ASPA.

O le taeao ananafi na maea ai le iloiloga tu’ufa’atasi a le Fono sa fai mo le paketi a le ASPA e fa masina, lea na pasia atu e le Fono i le masina o Setema 2011, ma e ui sa tumau pea le talitonuga a le ASPA o latou e faia le fa’ai’uga mulimuli i le latou paketi, peitai sa finagalo pea le fono e fa’aauau le iloiloga.

E tele nisi o vaega sa mafai ona fesiligia e le Fono i le taimi o le iloiloga o le paketi a le ASPA, e aofia ai le tupe fa’asili o lo o maua mai e le ASPA mai le fa’atauga o le suau’u i le atunuu, ona o lo o finau mai le ASPA e faapea, o le tupe faasili lea, o lo o toe tu’uina atu e totogi ai le latou aitalafu i le faletupe o le ANZ, ma, o se tali sa lei nofo lelei i fonagalo o le to’atele o faipule.

Na saunoa le alii faipule ia Larry Sanitoa, e tatau lava ona manino i le ripoti a le ASPA tulaga o lana tupe fa’asili mai le fa’atauga o le suau’u, lea foi sa lagolagosua i ai le afioga i le Sui Fofoga Fetalai ia Talia Faafetai Iaulualo.

Na toe fesiligia e Sanitoa pulega a le ASPA e uiga i a latou si’itaga ia na amata mai ia Oketopa 1 2011, atoa ai ma le mafua’aga ua latou le taliaina ai le talosaga a le Fono sa tu’uina atu, e fa’ateletelegese ai siitaga nei.

Na taua e le Andra Samoa, le sui pule o le ASPA, na mafua ona latou le  taliaina le talosaga, ona o le taimi tonu lava lea ua matua manomia ai lava e le ASPA se fesoasoani tau tupe.

Sa ia taua, e o’o lava foi ia te i latou o lo o latou lagona le alofa i le atunu’u, peitai afai e le mafai ona fa’atinoina la latou tautua, ua sili ai ona pagatia le atunu’u.

“O le matou alolofa i le atunuu ma le amanaia o le fono na mafua ai ona matou taliaina le uluai talosaga sa outou tuuina atu ina ia faateletelegese la latou uluai siitaga,” o le saunoaga lea a Samoa i luma o le komiti.

Na saunoa le afioga i le alii Senatoa ia Mauga Tasi Ausega, e lagolagoina e le Fono le  tu’u atu o ni fa’amanuiaga i tagata faigaluega e tusa ai o galuega fita, peitai e sese le taimi lea na fai ai e le ASPA ponesi mo nisi o ana tagata faigaluega, aua o le taimi tonu lava lea o lo o oi le atunu’u i le tulaga faaletonu o le taugata o pili.

“O le isi lena mafuaaga na fesiligia ai e le Fono tulaga o tou ponesi sa fai, ona e tuu atu tou ponesi i tagata faigaluega ae o le taimi tonu lea o loo oi ai le atunuu, ona manatu lea o tagata, e faafefea ona outou fai mai o loo manaomia se tupe e faatino ai a outou tautua ae o lea  e  tufa tou ponesi,” o le saunoaga lea a Mauga.

Ua i ai le manatu o le komiti o le a toe faia nisi teuteuga i fuainumera o tupe o lo o i totonu o le pili tupe lea sa fa’aulu i le vaiaso nei, ina ia mautinoa o lo o sa’o ma talafeagai mo mana’oga a le ASPA.

I le pili tupe  lea na fa’aulu i le fono o lo o fuafua e faasoa atu ai le aofaiga e $45 miliona e faatupe ai galuega a le ASPA mo le isi 6 masina o loo lumana’i atu, lea e faamoemoe e faagata mai i le aso 31 Iulai 2012, ona totoe ai loa lea o masina e tolu mulimuli o le tausaga tupe lenei 2012.