O Elama Ama o Samoa sa umi se taimi o galue i le polokalama a le Coral Reef Academy i Suva, Fiti, ua mae’a ana galuega fa’atino, mae’a ma ana a’oa’oga fa’apitoa ina ia mafai ai ona ia fesoasoani e tima’ia tupulaga talavou ia suia o latou olaga faigata, le fa’alogo ma le le usiusita’i i tulafono, matua ma le pulega a ta’ita’i ma aiga i totonu o latou nu’u.

O Elama e na’o le 33 tausaga o lona soifua, peita’i, sa mauaina se sikolasipi e a’ota’uina ai o ia i le Australian Pacific Training College ina ia fa’alautele lona atamai e galue ai e avea ma se so’oupu lelei i talavou i totonu o nu’u po’o galuega fo’i.

O le Polokalama lea o le Coral Reef Academy o se polokalama na fa’atuina e le ali’i Amerika o Rodney Rice ina ia toe taumafai ai ona timata olaga o fanau ua solitulafono a’o laiti, a’afia i fuala’au fa’asaina ma le ‘ava malosi ma ua le mafai ona toe nonofo fa’atasi ai ma aiga.

O  fanau solitulafono nei a’o le’i uma le pulega fa’alemalo, e le na’o Amerika po’o malo tetele o aumaia ai, ae ua so’o se atunu’u lava o le lalolagi. “O le taumafaiga ina ia toe talitonu lenei vaega o le fanau, o i latou lava o ni tamaiti lelei ma e mafai ona suia o latou olaga faigata o i ai, e le faigofie, ae peita’i, e silia ma le 80% o  fanau ua toe taliu i o latou aiga ma malo, ua matua tele le suiga lelei ua latou toe fo’i ma i latou.” O se tala lea a Elama.

Ina ua fesiligia sona manatu po’o le auala ua ia faia e mafai ai ona maua lea suiga lelei, ae ata le ali’i Samoa ma ia fa’ailoa mai, “O le avea o oe ma se uo ia i latou, e maufa’atuatuaina e i latou, o le ala tonu lava lea e mafai ai. E gaua’i ai o latou lagona, o lo’o i ai se tasi o lo’o taua o latou lagona ia te ia!”

O lenei polokalama o lo’o fa’atauatia i Fiti, peita’i, ua manatu Elama Ama o le a taliu mai i Samoa e fa’aaoga ai lona lea a’oa’oga fa’apitoa.